Ինչո՞ւ իշխանությունները չեն հստակեցնում նախարարների և պատգամավորների թեկնածուների ցանկը

Իշխանությունները կարծես թե ի սկզբանե այնպես էին պլանավորել այս տարվա խորհրդարանական եւ Երեւանի ավագանու ընտրությունները, որ դրանք ոչ միայն միմյանց չխանգարեն, այլեւ՝ օգնեն: Նման վիճակ ապահովելու համար նրանք ամեն քայլի դիմեցին՝ ընդհուպ մինչեւ Սահմանադրության խախտումը:

Հայտնի է, որ խորհրդարանական ընտրությունների օրը ապրիլի 2-ին նշանակելը հակասում էր գործող Սահմանադրությանը, ճիշտ հաշվարկ կատարելու դեպքում այն պետք է անցկացվեր հենց վաղը կամ հաջորդ կիրակի: Ու երբ այդ մասին առաջինը բարձրաձայնեց «Համախմբում» կուսակցության պատգամավոր Էլինար Վարդանյանը, եւ աղմուկ բարձրացավ, կառավարության աշխատակազմի ղեկավար-նախարար Դավիթ Հարությունյանը առանց սեթեւեթելու արձագանքեց, թե դա «ներսահմանադրական անհամապատասխանություն է»: Բայց նա ոչ թե այդ անհամապատասխանությունը կամ թույլ տրված իրավական կազուսը էական համարեց, այլ կարեւորեց հետընտրական հավանական գործընթացները` նշելով, որ կարող է հանկարծ ընտրությունները մի փուլով չավարտվեն, եւ երկրորդ փուլի անհրաժեշտություն առաջանա, ինչն էլ կարող է խաթարել ընտրական գործընթացի բնականոն ընթացքը: Եվ խորհրդարանի ընտրությունները առանց երկրորդ փուլի ունեցան նրա ասած «բնականոն ընթացքը»:

Մինչդեռ իշխանությունները չէին ցանկանում խորհրդարանական ընտրությունների օրը Սահմանադրությանը համապատասխանեցնել, քանի որ այն կարող էր համընկնել Երեւանի ավագանու քարոզարշավի մեկնարկի հետ: Երեկ արդեն այդ քարոզարշավը սկսվել է եւ այն տեւելու է մինչեւ մայիսի 12-ը: Պատկերացրեք, որ վաղը նոր տեղի ունենային ապրիլի 2-ի ընտրությունները, եւ անգամ եթե երկրորդ փուլի անհրաժեշտություն չառաջանար, այդ երկու ընտրական գործընթացները կմիախառնվեին ու հատկապես իշխանությունների վրա բացասական ազդեցություն կթողնեին: Ահա թե ինչու իշխանությունները Սահմանադրություն խախտեցին ու ամեն ինչ իրենց ուզածով արեցին:

Իսկ հիմա արդեն եկել է նոր Ազգային ժողովը, այնուհետեւ՝ կառավարությունը ձեւավորելու փուլը: ԱԺ-ն իր առաջին նիստը պետք է աներ ապրիլի 27-ին, բայց քանի որ Սահմանադրական դատարանը դեռ պետք է քննարկի ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումը, այն կտեղափոխվի մայիսի 18-ին: Իսկ Երեւանի ավագանու ընտրությունները մայիսի 14-ին են: Դրանք կավարտվեն, Կենտրոնական ընտրական հանձնաժողովի նախագահ Տիգրան Մուկուչյանը կներկայացնի արդյունքները, իշխող Հանրապետական կուսակցությունը հույս ունի, որ երկրորդ անգամ եւս ընտրություններում հաղթանակ կտոնի, հետո նոր կանցնի վարչապետի նշանակմանն ու նոր կառավարության ձեւավորմանը:

Թերեւս վստահաբար կարելի է ասել, որ կառավարության ձեւավորման թեմային անգամ կուլիսային քննարկումների, նախարարների թեկնածուների որոշման մակարդակով անդրադարձ չի լինի, մինչեւ ՍԴ-ն իր որոշումը չկայացնի, եւ մինչեւ Երեւանի ընտրությունները չավարտվեն: Դատելով Սերժ Սարգսյանի գործելաոճից՝ նա չի սիրում դեպքից, իրադարձությունից մեկ ամիս, երկու շաբաթ կամ մեկ շաբաթ առաջ տվյալ մարդուն տեղեկացնել, որ դու ազատվում ես այս պաշտոնից, դու չես վերանշանակվի այդ պաշտոնին, կամ դու կնշանակվես այս պաշտոնին: Նա դա անում է անհրաժեշտ ժամկետի գրեթե նախօրյակին, լավագույն դեպքում՝մի քանի օր առաջ: Դրա համար էլ ՀՀԿ-ում այդ առումով անորոշություն է տիրում: «Այդ ամենը պետք է լինի ԱԺ առաջին նստաշրջանի ժամանակ, իսկ դա պետք է գումարվի Երեւանի ավագանու ընտրություններից հետո»,- մեզ հետ զրույցում վերը նշված դիտարկումը անուղղակիորեն հաստատեց ՀՀԿ գործադիր մարմնի անդամ, ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը:

Քաղաքական կուլիսներում անգամ կարծիք կա, որ ապագա պատգամավորների ցանկը չի հստակեցվում այն պատճառով, որ այդպիսով հավանական թեկնածուների մեջ անորոշությունը պահպանվի եւ նրանք մանդատ ստանալու համար եւս մեկ փորձություն անցնեն՝ Երեւանի ավագանու ընտրությունների ժամանակ նորից ձայներ ապահովեն ՀՀԿ-ի համար: Խոսքը վերաբերում է հատկապես խորհրդարանական ընտրություններում Երեւանի ընտրատարածքների ՀՀԿ-ի ռեյտինգային թեկնածուներին, մասնավորապես շատ ձայներ ստացածներին: «Չկա նման բան, ձեր տպավորությունները իրականությանը չեն համապատասխանում,- չհամաձայնեց Գագիկ Մինասյանը, բայց հետո միանգամից ավելացրեց: -Ես կարծում եմ, բոլորս պետք է աշխատենք: Երեւանի ավագանու ընտրություններն իրենց կարեւորությամբ երկրորդն են: Մեր կուսակցությունը շատ լուրջ է մոտենում, բոլորս էլ մեր հնարավորությունների սահմաններում պետք է օժանդակենք եւ հնարավորության սահմաններում պետք է ավելի շատ ձայն ապահովենք մեր ավագանու համար»:

Ի դեպ, առաջիկա քաղաքական կարեւոր իրադարձություններից մեկն էլ այն է, որ ՀՀԿ-ն պետք է Դաշնակցություն կուսակցության հետ կոալիցիա կազմելու վերաբերյալ հայտարարություն անի: Բայց այդ հարցը ՀՀԿ-ն չի կարող հետաձգել մինչեւ Երեւանի ավագանու ընտրությունների ավարտը: Հակառակը, այդ մասին ազդարարելու են մինչեւ ընտրությունները, որ քվեարկության օրվան հաջորդող հինգշաբթի՝ մայիսի 18-ին էլ գումարվի նոր Ազգային ժողովի անդրանիկ նիստը: Իսկ ՀՅԴ-ին տրվող պորտֆելների եւ նրանց նախարարների թեկնածուների հարցն էլ կորոշվի հաջորդ 10-20 օրերի ընթացքում:

Տպել
15181 դիտում

Հեմոդիալիզի պարագաները մատակարարվել են 2 անգամ թանկ գնով. ՊՎԾ-ն ներկայացնում է ուսումնասիրության արդյունքը

ՖԱՖ-ը համաձայնության է եկել ՀՖՖ-ի հետ ֆան-ակումբներին վերաբերող նախապայմանների հարցում

ՀՀ գլխավոր դատախազն ընդունել է ԱՄՆ նորանշանակ դեսպանին

Մետաքսի ճանապարհը զբոսաշրջիկներին ներկայացնելու լավ բազա ունենք. գիտնականի առաջարկը դուր եկավ վարչապետին

Մյուլլերի զեկույցի «էխոն»․ Թրամփն առաջատար ԶԼՄ-ներն անվանել է «ժողովրդի թշնամիներ»

Հայկական առաջապահ ստորաբաժանումները կասեցրել են հակառակորդի ինժեներական աշխատանքները

Երեւանում բանկոմատներից հափշտակությունների գործով մեղադրանք է առաջադրվել Ռուսաստանի 20-ամյա քաղաքացուն. ՔԿ

21.6 մլն դրամի հափշտակություն․ ոստիկանները ապօրինություններ են բացահայտել «Հայավտոկայարան» ՓԲԸ-ում (տեսանյութ)

Նախարարներն ու ԱԺ պատգամավորները Թումանյան են արտասանում, մարտահրավեր ուղարկում միմյանց. (ուղիղ)

ԱՄՆ դեսպանը հետաքրքրվել է գլխավոր դատախազից՝ ինչպես կարող են աջակցել ՀՀ-ին կոռուպցիայի դեմ պայքարում

Սուրեն Պապիկյանը ՊՆ-ում է․ շարունակվում է զինված ուժերի ղեկավար կազմի օպերատիվ հավաքը

Facebook-ը 2632 էջ, խումբ, օգտահաշիվ է ջնջել

Լուրջ խնդիրներ կունենանք գյուղատնտեսությունում․ վարկատու կազմակերպության զգուշացնող նամակը վարչապետին

2018-ին զինվորների ապահովագրության հիմնադրամի եկամուտներն աճել են 35%-ով

Ես հասկանում եմ, որ կամերաների առաջ հաճելի է դեմագոգիկ ելույթներ ունենալ․ Արարատ Միրզոյան

Կառավարությունում առաջարկել եմ հրաժարվել փողի մասին խոսելուց, փող միշտ կգտնվի. Նիկոլ Փաշինյանը՝ ԳԱԱ-ում

Ինչ ուզում են, թող անեն․ Իրինա Ռոդնինան մեկնաբանել է Երեւանում իր անունը կրող դպրոցի վերանվանման հարցը

Ներողություն եմ խնդրում նրանցից, ովքեր այս քայլս թուլություն կորակեն. Ավշարի դպրոցի տնօրենն ազատման դիմում է գրել

Ձերբակալվել են Գյումրու թիվ 27 դպրոցի տնօրենն ու գործավարուհին

Քաղաքական հասունություն է պետք ցուցաբերել սոցիալական հարցերը արտադրական բնույթի հարցերին չհակադրելու համար․ Մելքումյան