Վախեցած եմ ու ահաբեկված. Լեւոն Բարսեղյանը` Սամվել Բալասանյանի հայտարարության մասին

Երեկ՝ հունիսի 5-ին, տեղի ունեցավ Գյումրու ավագանու առաջին նստաշրջանի վերջին նիստը: Մինչ օրակարգային հարցերին անդրադառնալը, Գյումրու քաղաքապետ Սամվել Բալասանյանը հայտարարությամբ հանդես եկավ: Նա հորդորեց ԳԱԼԱ-ի եւ ԲՀԿ-ի ավագանու անդամներին եւս ներկայանալ ավագանու նիստերին, իսկ բացակայությունները հարգելի համարելու համար բերել անհրաժեշտ փաստաթղթեր, հակառակ դեպքում կզրկվեն մանդատներից:

«Հիմա ուզում եմ խոսել 16 ավագանու անդամի մասին, ովքեր անհարգելի բացակայել են նիստերից: Ուզում եմ ներկայացնել նախագիծ՝ նրանց իրավունքները վաղաժամ դադարեցնելու մասին, որը լրիվ համապատասխանում է ՏԻՄ օրենքին: Ես որոշեցի այս հարցն այս նիստին չմտցնել ավագանու օրակարգ: Եթե նրանք Գյումրի համայնքի ղեկավարին ներկայացնեն համապատասխան փաստաթղթեր՝ իրենց բացակայության վերաբերյալ, այն կհամարվի հարգելի: Այսինքն` այս հարցը տեղափոխում ենք մյուս նիստի օրակարգ»,- երեկ ավագանու նիստի ժամանակ հայտարարեց Բալասանյանը:

Armtimes.com-ը ԳԱԼԱ խմբակցության ավագանու անդամ, անկուսակցական Լեւոն Բարսեղյանից հետաքրքվեց, թե ի՞նչ կարծիք ունի Սամվել Բալասանյանի այդ հայտարարության մասին:

«Գրեք, Լեւոնին խնդրեցինք հարցազրույց տալ, ասաց՝ շատ վախեցած է ու ահաբեկված Բալասանյանի խոսքերից, հիմա ընկած պոլիկլինիկաներով ու հիվանդանոցներով ետին թվով բյուլետեններ է ճարում, որ մանդատը ձեռից չառնեն»,- ասաց Լեւոն Բարսեղյանը:

ԳԱԼԱ խմբակցության ավագանու մյուս անդամ Քրիստինա Մկրտչյանն էլ նշեց, որ այդ մանդատները իրենց Սամվել Բալասանյանը չի տվել, որ ետ վերցնի:

«Բալասանյանը ԳԱԼԱ-ին մանդատից զրկել չի կարող: Քանի որ մանդատ ԳԱԼԱ-ին քաղաքացին է տվել: Մանդատից կարող են զրկել առաջին չորսին, այնուհետ այդ մանդատները կփոխանցվեն հաջորդ չորսին, հետո՝ մյուս չորսին»,- armtimes.com-ին փոխանցեց Քրիստինա Մկրտչյանը:

Մեր այն հարցին, թե ԳԱԼԱ-ն պատրաստվո՞ւմ է մասնակցել Գյումրու ավագանու նիստերին, Մկրտչյանը տեղեկացրեց, որ այդ հարցը քննարկվել է ներկուսակցական ժողովներում, որի մասին առաջիկայում հայտարարություն կլինի:

Նիստերին մասնակցելու հստակ պատասխան չունեն նաեւ ԲՀԿ-ականները: Այս կուսակցությունում դեռ չեն քննարկել, թե երբվանից են մասնակցելու կամ ընդհանրապես մասնակցելո՞ւ են, թե՞ ոչ: Այս մասին armtimes.com-ին տեղեկացրեց ավագանու ԲՀԿ-ական անդամ Արմեն Բադեյանը:

Հիշեցնենք, որ ԳԱԼԱ-ն ԲՀԿ-ն եւ ՀՎԿ-ն մի քանի ամիս շարունակ բոյկոտում էին Գյումրու ավագանու նիստերը: Հունիսի 5-ից ՀՎԿ-ն դադարեցրել է բոյկոտը եւ սկսել է մասնակցել նիստերին: