Սերժ Սարգսյանը Հովիկ Աբրահամյանի՞ն է մեղադրում Կարեն Կարապետյանի դեմ արշավի մեջ

«Միջազգային և անվտանգության հարցերի հայկական ինստիտուտի» հիմնադիր նախագահ, քաղաքական վերլուծաբան Ստյոպա Սաֆարյանն աննախադեպ է համարում վարչապետ Կարեն Կարապետյանի գործունեության վերաբերյալ Սերժ Սարգսյանի այսօր արած հայտարարությունն այն իմաստով, որ հազվադեպ է լինում, որ Սարգսյանն արձագանքում է մամուլում հրապարակված, ոչ հաստատված եւ ոչ էլ հերքված տեղեկությանը:

«Այս կտրվածքով հետաքրքիր էր նաեւ, թե ինչ բառեր է նա օգտագործում: Ոչ թե հերքում է, որ Կարեն Կարապետյանը երկու անգամ հրաժարականի դիմում է ներկայացրել՝ ինչպես ԶԼՄ-ն է ներկայացրել, այլ խոսում է նրա մասին, որ Կարեն Կարապետյանն այդպես վարվելու պատճառներ չունի»,- armtimes.com-ի հետ զրույցում ասաց Ստյոպա Սաֆարյանը:

Հարցին՝ ըստ ձեզ, ո՞ւմ նկատի ուներ Սերժ Սարգսյանը, երբ ասում էր, որ թե´ կուսակցության, թե´ իշխանության մակարդակով շատ լավ հասկանում են, թե ովքեր են այդ բեմականացման հեղինակները, Ստյոպա Սաֆարյանը պատասխանեց. «Բարդ է պատկերացնել: Այն տպավորությունն է, որ նույնիսկ Սերժ Սարգսյանը կասկածներ ունի կուսակցության ներսում դրա կազմակերպիչների մասով: Թե ում է ակնարկում, այս պահին դժվար է ասել: Համենայնդեպս, Կարեն Կարապետյանը կարող է ունենալ բազում, այսպես ասենք, հակառակորդներ: Չմոռանանք, թե որքան նեղված էր Հովիկ Աբրահամյանը հեռանալիս եւ ինչ բնութագրիչներ օգտագործեց Կարեն Կարապետյանին նկարագրելու համար՝ տեխնոլոգիական գործարանի կեղտոտ առվակներ եւ այլն: Կարծում եմ, եթե Սերժ Սարգսյանը կուսակցությունից դուրս շրջանակների մասին է խոսում, ոչ կարող ենք հաստատել, որ դրա մեջ մտնում է Հովիկ Աբրահամյանը, ոչ էլ կարող ենք բացառել, որովհետեւ առավելապես նա եւ նրան սատարող ուժերն էին չափազանց դժգոհ վարչապետի ու կառավարության փոփոխությունից»:

Քաղաքագետը կարծում է, որ Կարեն Կարապետյանի վերաբերյալ մամուլում տարածված այն տեղեկատվությունը, թե վերջինս ցանկացել է 2 անգամ հրաժարական տալ, արվել է այնպիսի մարդու կողմից, որ կասկածները բոլորովին այլ տեղ տանեն: «Ես կարծում եմ, օրինակ՝ սովորական, շատ չխորացող ընթերցողը, բնականաբար կմտածի, որ դա տվյալ թերթն է կամ ԶԼՄ-ն, որը կապում են Սերժ Սարգսյանի փեսայի անվան հետ, հետեւաբար արտահոսքի կազմակերպիչ նա, բայց ես կարծում եմ, որ այստեղ է խաղը, թե ինչու է կազմակերպիչը կազմակերպել այդ ԶԼՄ-ի միջոցով արտահոսքը: Թերեւս, սա է ինձ ասում, որ պետք է այլ տեղ փնտրել տեղեկատվական հոսքը կազմակերպողին, որի նպատակն է եղել ցույց տալ իշխանության ներսում ճգնաժամի վիճակ, որը կարող է քաղաքական դաշտում որոշակի խլրտումներ առաջացնել, կոնսուլտացիաների, վերախմբավորումների պատճառ դառնալ: Սերժ Սարգսյանի ակնարկն ուղղված այդ շրջանակներին, կարծես թե, չափազանց տեսանելի է, որ իրենք հասկանում են խաղը»,- ասաց Ստյոպա Սաֆարյանը:

Անդրադառնալով մամուլի այն հրապարակմանը, որ Կարեն Կարապետյանը, չկարողանալով Հայաստանի ներսում ինքնուրույն, իր կապերով իրեն անհաճո մեդիայի հարցերը լուծել, որոշել է Մոսկվայի օգնությամբ լուծում տալ հարցին, մասնավորապես՝ քաղաքական որոշման տեսքով հասնել այն բանին, որ ռուսները Սերժ Սարգսյանին հանձնարարեն ցանկացած ճանապարհով փակել մի շարք լրատվամիջոցներ, Ստյոպա Սաֆարյանն ասաց, որ այս եւ Կարեն Կարապետյանի հրաժարականի մասին լուրը խորքային կապ ունեն: Նշենք, որ «Ժամանակ» թերթը գրել էր, որ փակման ենթակա լրատվամիջոցներից են «1in.am» եւ «Lragir.am» կայքերը:

«Չեմ կարծում, որ դա լուրջ զարգացումներ կունենա, այլ փորձ է արվում այդ լրատվամիջոցներին ներկայացնել Ռուսաստանի քաղաքականության հիմքերը լվացողներ: Եթե հիշում եք, Ալեքսան Հարությունյանի նշանակմամբ գրվեց, որ արեւմտամետ գործիչների համար եթերը սահմանափակելու են եւ այլն, եւ այլն: Այն որ ռուսական կողմում կա ցանկություն պայքարելու ոչ վերահսկելի լրատվամիջոցների դեմ՝ սրանում կասկած չկա, բայց ակնհայտ է, որ ինչ-որ մեկն ուղղակի ուզում է զոհասեղան բարձրացնել որոշ լրատվամիջոցների եւ հուշել Կրեմլին՝ գնալ այդպիսի պահանջներ կարգադրելուն`մասնավորապես ներկայացնելով, թե այդպիսի լրատվամիջոցները ակտիվորեն ներգրավված են Ռուսաստանի քաղաքականությունը քննադատելու կամ նրա մարդը հանդիսացող վարչապետի «ոտքի տակը փորելու» գործում»,- ընդգծեց քաղաքագետը:

Տավուշի մարզ կատարած աշխատանքային այցի ընթացքում Սերժ Սարգսյանը Կողբի զորամասում կայացած խորհրդակցությունից հետո լրագրողների հետ զրույցում այսօր հերքել էր իր եւ վարչապետի միջեւ լարված հարաբերությունների վերաբերյալ հրապարակումները, եւ լուրերը, թե Կարեն Կարապետյանը պատրաստվում է հրաժարական ներկայացնել: «Իսկ պարբերաբար հրապարակվող լուրերը, իբր գոյություն ունեցող հակասությունների, հակամարտության մասին, մտացածին են: Մենք թե´ կուսակցության, թե´ իշխանության մակարդակով շատ լավ հասկանում ենք, թե´ ովքեր են այդ բեմականացման հեղինակները, ինչպիսին են նրանց ցանկությունները, բայց կարծում եմ, որ դա իրավիճակի վրա որեւէ ազդեցություն ունենալ չի կարող»,­- «Արմենպրես»­-ի հաղորդմամբ՝ ասել է Սերժ Սարգսյանը: