Ինչո՞ւ Սարգսյանը գիտի, թե ովքեր են հրաժարականի լուրերի ետեւում, իսկ Կարապետյանը`չգիտի

Տարոն Մարգարյանի ինաուգուրացիայի օրը վարչապետ Կարեն Կարապետյանը լրագրողների հարցերին ի պատասխան հայտարարեց, որ հրաժարականի ցանկություն չի ունեցել:

Վերջին շրջանում վարչապետի հրաժարականի մասին համառ լուրեր էին պտտվում մամուլում, ընդհուպ մինչեւ հավաստի տեղեկություններ, որ վերջին մի քանի ամիսներին արդեն երկու անգամ Կարապետյանը հրաժարականի ցանկություն է հայտնել, եւ Սերժ Սարգսյանն է նրան հետ պահել այդ մտքից:

Բնականաբար, քաղաքապետարանում վարչապետին հարց ուղղելու հնարավորության դեպքում լրագրողները առաջին հերթին պետք է հետաքրքրվեին, թե արդյո՞ք ճիշտ են այդ լուրերը: Վարչապետին հարց է ուղղվել`ինքը հրաժարական ներկայացնելու ցանկություն ունեցե՞լ է: «Ոչ, չեմ ունեցել»,- կարճ, կոնկրետ պատասխանել է Կարեն Կարապետյանը:

Այս հանդիպումից մի քանի օր առաջ, Սերժ Սարգսյանը նույնպես խոսեց վարչապետի հրաժարականի լուրերի մասին եւ ասաց, որ վարչապետը հրաժարական տալու որեւէ պատճառ չունի:

Այն, թե ինչու Սերժ Սարգսյանը հանկարծ որոշեց կանգնել լրագրողների առաջ եւ նման հայտարարություն անել, այդ ժամանակ լավ չհասկացվեց: Ակնհայտ էր, որ դրա համար Սարգսյանը պատճառներ ուներ, որոնք այնքան էլ հստակ չէին ուրվագծվում:

Մինչդեռ այսօր արդեն ակնհայտ է, որ Սերժ Սարգսյանն այդ քայլով ընդամենը առաջ անցավ Կարեն Կարապետյանից: Սարգսյանը չէր կարող չկանխատեսել, որ քաղաքապետարանում լրագրողների հետ առաջին իսկ շփման ժամանակ, Կարապետյանին այդ հարցն ուղղվելու է, եւ իհարկե գիտեր, թե ինչ պատասխան է հետեւելու:

Ու որպեսզի չստացվի, թե Սերժ Սարգսյանը իրեն հասանելի ճանապարհներով հրապարակ նետելով հավանական հրաժարականի թեման, ճնշումներ է գործադրում Կարեն Կարապետյանի նկատմամբ, մինչդեռ Կարապետյանը չի տրվում այդ ճնշումներին, շտապեց իրենից հեռացնել վարչապետի հրաժարականի մասին խոսակցությունները:

Բոլորովին այլ իրավիճակ է, երբ մամուլը գրում է, թե վարչապետը հրաժարական տալու փորձեր է արել, եւ Սերժ Սարգսյանի շնորհիվ է դա կանխվել, սակայն Կարեն Կարապետյանը հերքում է դա: Եւ բոլորովին այլ իրավիճակ, երբ Սերժ Սարգսյանն է հերքում դա:

Առաջին իրավիճակում Սերժ Սարգսյանի դիրքերը թուլանում են, իսկ վարչապետը, որ իրականում բավական թույլ դիրքերում է, կարողանում է որոշակիորեն ամրապնդել դրանք:

Եւ ահա նման բան թույլ չտալու համար Սերժ Սարգսյանն առաջ անցավ, եւ թեմայի շրջանակներում առաջին հայտարարությունն ինքն արեց:

Այս ամբողջ պատմության մեջ եւս մեկ ուշագրավ պահ կա: Բանն այն է, որ Սերժ Սարգսյանը շատ լավ գիտի, թե ովքեր են կանգնած վարչապետի հրաժարականի մտացածին լուրերի եւ ամբողջ բեմադրության հետեւում, իսկ Կարեն Կարապետյանը՝ չգիտի: Քաղաքապետարանում լրագրողի հարցին, թե այդ դեպքում որտեղից են ծագել իր հրաժարականի մասին լուրերը, Կարեն Կարապետյանը պատասխանեց. «Չգիտեմ, չեմ կարող ասել»:

Վարչապետը չէր կարող լսած չլինել Սերժ Սարգսյանի հայտարարությունը, թե իրենք իշխանության եւ կուսակցության մակարդակով շատ լավ հասկանում են, ովքեր են կանգնած այդ լուրերի հետեւում, եւ որոնք են նրանց ցանկությունները:

Եւ երբ նա հայտարարում է, որ ինքը դա չգիտի, հայտարարում է, որ ինքը Սերժ Սարգսյանի նշած խմբի մեջ չի մտնում: Դա իհարկե, առանց այդ էլ պարզ էր, բայց փաստորեն Կարեն Կարապետյանը ցանկանում է, որպեսզի հրապարակային կերպով այդ փաստն արձանագրվի:

Սերժ Սարգսյանի հետ իրենց հարաբերությունների մասին էլ Կարեն Կարապետյանը բավական կոշտ խոսեց: Նա ասաց, որ Սերժ Սարգսյանի հետ ունեն «շատ լավ՝ աշխատանքային, հարգալից, գործնական» հարաբերություններ։ Ոչ մի ակնարկ Սերժ Սարգսյանի` ՀՀԿ-ի եւ երկրի մեծն առաջնորդը լինելու մասին, ոչ մի նշույլ այն բոլոր որակումներից եւ տոնից, որ ՀՀԿ-ականները, Սերժ Սարգսյանի առաջին եւ մնացած բոլոր տեղակալները սովորաբար ունենում են նրա մասին խոսելիս: Մի խոսքով՝ Սերժ Սարգսյանի անվերապահ լիդերությունն ընդունելու ոչ մի նշան:

Կարեն Կարապետյանն այսպիսով հրապարակային ձեռնոց նետեց Սերժ Սարգսյանին: Սա ավելի սուր տեսանելի կլիներ, եթե մինչեւ վարչապետի «բեմելը» Սերժ Սարգսյանը վարչապետի հրաժարականի թեման ցրող հայտարարություն արած չլիներ:

Տարօրինակ է միայն այն, որ Կարեն Կարապետյանը Սերժ Սարգսյանին ձեռնոց նետելու ռիսկի է դիմում: Ակնհայտ է, որ նա նման բան չէր կարող անել ինքնուրույն եւ սա այն դեպքն է, երբ վարչապետը մեծապես օգտվում է Մոսկվայի իր ընկերների խորհուրդներից:

Սերժ Սարգսյանը, իհարկե գիտի, որ ի դեմս Կարապետյանի գործ ունի Մոսկվայի նրա ընկերների հետ, բայց թերեւս, Կարեն Կարապետյանի ապաքաղաքական կերպարը երբեմն նրա զգոնությունը թուլացնում է, սրանից բխող հետեւանքներով: