Ներկա ենք Կարեն Կարապետյանի կառավարության հրաժեշտի մեկնարկի գործընթացին. Նիկոլ Փաշինյան

«Ելք» խմբակցության ղեկավար Նիկոլ Փաշինյանի կարծիքով կառավարության 2018-22 թվականների ծրագրի թվագրումը ենթատեքստ է ստանում, որովհետեւ այժմ տեղի է ունենում իշխանության տրանսֆորմացիա:

«2018 թվականի ապրիլից ուժի մեջ է մտնելու փոփոխված Սահմանադրությունը, ըստ որի՝ երկրի փաստացի ղեկավարը վարչապետն է լինելու, որը մեզ հասկանալի տերմինաբանությամբ՝ նախագահական լիազորություններ է ստանալու: Հիմա քաղաքական գլխավոր հարցը հետեւյալն է՝ արդյո՞ք վարչապետ Կարեն Կարապետյանը հավակնելու է 2018 թվականին ՀՀ-ի թիվ մեկ պաշտոնյա հանդիսացող վարչապետի կարգավիճակին»,- ԱԺ-ի նիստում իր ելույթն այսպես սկսեց Նիկոլ Փաշինյանը՝ նշելով, որ խաչաձեւ «հարցաքննության» ժամանակ վարչապետ Կարեն Կարապետյանն ասաց, որ պատրաստ է լինել ՀՀ վարչապետ 2018 թվականի ապրիլից հետո, որը 10 տոկոսանոց պատասխան է:

Նիկոլ Փաշինյանը նկատեց, թե ինչ է լինելու, եթե պարզվի, որ այդ պաշտոնը ստանձնելուն պատրաստ լինի նաեւ Սերժ Սարգսյանը կամ Սերժ Սարգսյանը պատրաստ է, որ այդ պաշտոնը ստանձնի պաշտպանության նախարար Վիգեն Սարգսյանը:

«Ելք» խմբակցության ղեկավարի կարծիքով՝ Սերժ Սարգսյանը 6-րդ գումարման Ազգային Ժողովի անդրանիկ նիստում խոսում էր ոչ թե որպես հեռացող նախագահ, այլ մոտեցող վարչապետ, իսկ խորհրդարանական մեծամասնության ներկայացուցիչների ելույթներում կարմիր թելով անցնում է այն միտքը, որ 2018 թվականին Սերժ Սարգսյանին տեսնում են վարչապետի պաշտոնում: «ՀՀԿ խոսնակի խոսքին ուշադրություն դարձրի՞ք: Ինքն ասաց, որ այս կառավարության ծրագիրը հիմնված է այստեղ, այնտեղ, այս ելույթի վրա, այն ելույթի վրա… կառավարությունից մի հոգու անուն չտվեց, նույնիսկ վարչապետի անունը: Այսինքն՝ այս ծրագրի հետ կառավարությունը ոչ մի կապ չունի»,- ասաց Նիկոլ Փաշինյանը՝ հավելելով, որ կառավարության ծրագրի քննարկումն իմաստ կստանար մի պարագայում. քաղաքական քննարկում կլիներ իրականացնել, երբ Կարեն Կարապետյանը հստակ կհայտարարեր, թե ինչ քաղաքական դերակատարում է ինքն ունենալու առաջիկա քաղաքական շրջափուլում, երբ տեղի է ունենալու իշխանության տրանսֆորմացիա, ինչո՞ւ է ինքը 2016 թվականին ստանձնել վարչապետի պաշտոնը՝ Սերժ Սարգսյանի վերարտադրությունն ապահովելու համա՞ր:

Պատգամավորի խոսքով, մինչ օրս Կարեն Կարապետյանի արած հայտարարությունները խոսում են իր կողմից նշված վարկածի օգտին:

Անդրադառնալով խորհրդարանական ընտրությունների քարոզարշավին, Նիկոլ Փաշինյանն ասաց, որ Կարեն Կարապետյանն իր կերպարով պոզիտիվ ֆոն ստեղծեց ընտրակաշառքի բաժանման, ՀՀԿ-ի եւ Սերժ Սարգսյանի վերարտադրության համար: «Քարոզարշավին շատ ակտիվ դերակատարում ունենալով քաղաքական ֆիասկոյի առաջ կանգնեց: Եթե հիմա փորձենք հասկանալ, թե խորհրդարանում ովքեր են վարչապետ Կարեն Կարապետյանի թիմակիցները, այդ մարդկանց հաշվելու համար մեզ պետք կլինի մեկ ձեռքի մատների կեսը եւ ոչ ավելին: Ամեն ինչ շատ նման է նրան, որ այսօր մենք ոչ թե Կարեն Կարապետյանի կառավարության գործունեության ծրագրի քննարկման ենք ներկա, այլ Կարեն Կարապետյանի կառավարության հրաժեշտի մեկնարկի գործընթացին: ՀՀԿ-ական ներկայացուցիչների հայտարարություններում կա հետեւյալը՝ «Մավրը արել է իր գործը, Մավրը պետք է հեռանա»: Այս իմաստով շատ կարեւոր է, որ Կարեն Կարապետյանը երկու հարցի շատ հստակ պատասխանի»,- հայտարարեց Նիկոլ Փաշինյանը:

Պատգամավորը հարց է բարձրացնում՝ Կարեն Կարապետյանը պատրա՞ստ է Սերժ Սարգսյանի կամ Վիգեն Սարգսյանի կառավարությունում լինել փոխվարչապետ կամ տարածքային կառավարման նախարար, կամ ֆինանսների նախարար: Նշենք, որ Կարեն Կարապետյանը Նիկոլ Փաշինանի ելույթի պահին նստած էր ֆինանսների նախարարի տեղում:

«Ինչո՞ւ են ՀՀԿ-ականները գաղտնիք սարքում այդ հարցը: Հստակ ասեք՝ ով է ձեր վարչապետի թեկնածուն: Քաղաքական պրոցեսները տանել մաֆիա խաղի կանոններով , ուղղակի հակասում է ՀՀ-ի ընթացիկ շահերին: Կամ էլ ասեք՝ գաղտնիք է, կամ էլ գործող վարչապետ կա, եկել է եւ ասում է՝ ես պատրաստ եմ ստանձնել: Դե դուք ասեք՝ պատրա՞ստ եք, իր թեկնածությունն առաջադրելո՞ւ եք, թե՞ չեք առաջադրելու: Մարդը պատրաստ է, մի հոգի առաջադրվող կա, է՞լ ով է պատրաստ ձեզնից ստանձնել ՀՀ վարչապետի պաշտոնը»,- ասաց Նիկոլ Փաշինյանն՝ առաջարկելով, որ ՀՀԿ-ն քննարկի եւ առաջադրի վարչապետի իր թեկնածուին, որի վերաբերյալ «Ելք» խմբակցությունն էլ կքննարկի եւ իր կարծիքը կասի ներկայացված թեկնածուի վերաբերյալ: