Եթե վարչախմբին թվում է, թե նոր քրգործով Ավետիսյանին կարող է լռեցնել, ապա սխալվում է

«Սասնա ծռեր» խմբի անդամ Վարուժան Ավետիսյանը եւ նրա պաշտպան Մուշեղ Շուշանյանն այսօր մամուլից են տեղեկացել, որ Ավետիսյանի նկատմամբ դատախազությունը նոր քրեական գործ է հարուցել:

Հիշեցնենք, որ ըստ դատախազության տարածած հաղորդագրության՝ դատարանում Վարուժան Ավետիսյանի հնչեցրած կոչերի փաստով նոր քրեական գործ է հարուցվել՝ ՀՀ քրեական օրենսգրքի 301 հոդվածի հատկանիշներով՝ «Իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը»:

Մեր զրույցում Մուշեղ Շուշանյանն ասաց, որ եթե վարչախմբին թվում է, թե Վարուժան Ավետիսյանի դեմ քրեական հետապնդում հարուցելով նրան կարող է լռեցնել, ապա դա պարզապես չի կարող ստացվել: Ըստ պաշտպանի՝ սա Ավետիսյանին լռեցնելու անհաջող փորձ է: «Բնականաբար, ես չեմ համարում, որ Վարուժան Ավետիսյանի զինված ապստամբության կոչը դա անօրինական կոչ է, կամ առավել եւս քրեական օրենսգրքով արգելված կոչ, որովհետեւ մենք գիտենք, որ ապստամբության իրավունքը դա բնական իրավունք է... Ես վստահ եմ, որ իրենք հասկանում են, որ եթե սա արվում է զուտ նրան ճնշելու նպատակով, ապա դա ճնշման անհաջող փորձ է»,- նշեց Մուշեղ Շուշանյանը:

Ավելի հակված եմ կարծելու, որ այս քրեական հետապնդումը ինչ-որ կերպով կօգտագործվի դատավարության հրապարակայնությունն էլ ավելի սահմանափակելու համար: «Առանց այդ էլ մենք տեսնում ենք, որ բոլոր հնարավոր միջոցների դիմել են հրապարակայնությունը բոլոր հնարավոր միջոցներով սահմանափակելու համար: Մասնավորապես այն, որ տղաների ձայնը լսելի չէ դահլիճում, քանի որ բարձրախոսները անջատված են, այն, որ դահլիճն ապակեպատված է, այն, որ տղաների համար այնպիսի դիրք է ընտրված, որ նրանք թիկունքով նստեն դահլիճին եւ որեւէ կոնտակտ դահլիճում ներկաների հետ չառաջանա: Ամենակարեւորը՝ մենք հաջորդ դատական նիստին պետք է պահանջենք, որպեսզի լրագրողներին ապակուց այն կողմ մուտք գործելու, աշխատելու հնարավորություն ընձեռվի»,- մեր զրույցում ասաց Ավետիսյանի պաշտպանը: Ըստ նրա՝ ամենամեծ բանը, որից վախենում է ռեժիմը դա դատավարության հրապարակայնությունն է:

Մեր հարցին, թե այս քրեական գործը կարո՞ղ է ազդել դատավարության ընթացքի վրա, պաշտպանը պատասխանեց. «Դատավարության ընթացքի վրա որեւէ ազդեցություն չի կարող ունենալ, բայց միգուցե գործը քննող դատավորին հրահանգ իջեցվի եւ նա հայտարարի, որ Վարուժան Ավետիսյանը եւ մյուսները պարբերաբար իշխանությունը բռնությամբ տապալելու կոչեր են հնչեցնում, ուստի նման պայմաններում դատական նիստերը պետք է անցկացնել դռնփակ: Իրենց տրամաբանության տեսակետից շատ հավանական տարբերակ է, միգուցե դրանով փորձում են հող նախապատրաստել այս տարբերակը գործարկելու համար: Իշխանությունը յուրացնելու փաստի կոչով վարչախումբը լիովին օրենքից դուրս վիճակում է հայտնված, բացարձակապես լեգիտիմ չեն եւ նրանց գործողությունները եւս»,- եզրափակեց փաստաբան Մուշեղ Շուշանյանը:

Նշենք, որ նախորդ դատական նիստի ընթացքում «Սասնա ծռեր» խմբի անդամ Վարուժան Ավետիսյանը դիմելով ժողովրդին՝ ապստամբության կոչ արեց: Նա մասնավորապես, ասաց. «Զենք վերցրե՛ք, Սերժին ու իր բանդային ֆիզիկապես ոչնչացրե՛ք»:

Ըստ դատախազության այսօր տարածած հաղորդագրության՝ հունիսի 21-ին տեղի ունեցած հերթական դատական նիստի ընթացքում, գործով ամբաստանյալ Վարուժան Ավետիսյանը, ընդհատելով նիստը նախագահող դատավորին, դատավարության մասնակիցների, դատական նիստերի դահլիճում ներկա քաղաքացիների եւ զանգվածային լրատվության միջոցների ներկայացուցիչների ներկայությամբ, հնչեցրել է իշխանությունը զավթելուն եւ սահմանադրական կարգը բռնի տապալելուն ուղղված կոչեր, ինչի փաստով հարուցվել է քրեական գործ եւ նախաքննությունը հանձնարարվել է ՀՀ քննչական կոմիտեին: