Արայիկ Խանդոյանը եւ Գագիկ Եղիազարյանն այսօր դատարան չբերվեցին. լուսանկարներ

Դիմակավորված ոստիկանները՝ դատարանու,

Պավել Մանուկյանը

Սասնա ծռեր խմբի անդամ Սմբատ Բարսեղյանը

Ամբաստանյալ Արմեն Բիլյանը

Ավան եւ Նոր Նորք վարչական շրջանների ընդհանուր իրավասության դատարանում այսօր լարված իրավիճակ էր. շարունակվում էր «Սասան ծռեր» խմբի 14 անդամի գործով դատական նիստը:

Դատարանում ուժեղացված հսկողություն էր՝ շրջապատված ոստիկանական ուժերով եւ ավտոմատներով զինված դիմակավորներով:

Ինչպես նախորդ դատական նիստին, այսօր եւս կարգադրիչները փաստաբաններից շատերին չթույլատրեցին նիստերի դահլիճ մուտք գործել, քանի որ վերջիններս հրաժարեցին բացել իրենց պայուսակներն ու ցույց տալ, թե դրանցում ինչ կա: Սակայն կարգադրիչներն այս հարցում երկակի ստանդարտներ էին կիրառում: Մասնավորապես, զննության ենթարկվեց փաստաբան Երվանդ Վարոսյանը. նրա պայուսակը մետաղորսիչով անցկացնելիս դրա ազդանշանը միացավ եւ կարգադրիչները նրանից հետաքրքրվեցին, թե ինչ մետաղական իր կա պայուսակի մեջ, Վարոսյանն ասաց, թե ոչ մի անթույլատրելի իր չկա, որից հետո նրան թույլատրեցին նիստերի դահլիճ: Իսկ ահա փաստաբան Լուսինե Սահակյանի պայուսակը մետաղորսիչով անցկացնելիս նույնպես ազդանշան էր միացել, սակայն Սահակյանի դեպքում կարգադրիչները պահանջում էին բացել պայուսակը: Լուսինե Սահակյանը պնդում էր՝ ազդանշանը միանում է, քանի որ պայուսակը բազմաթիվ մետաղական առարկաներ ունի եւ հասկանալի է, որ ազդանշանը պետք է միանար: Նա պնդեց, որ եթե բացի պայուսակը, ապա դա ոչ թե զննություն կլինի, այլ խուզարկություն:

Փաստաբան Արա Զաքարյանից էլ կարգադրիչները պահանջում էին ներկայացնել անձը հաստատող փաստաթուղթ, վերջինս հրաժարվեց ներկայացնել՝ նշելով, որ դռնբաց դատական նիստին ինչպես ցանկացած քաղաքացի, այնպես էլ ինքը կարող է մասնակցել, իսկ անձը հավաստող փաստաթուղթ ինքը կներկայացնի միայն դատավորին: Խուզարկությունից հրաժարվեցին նաեւ փաստաբաններ Մուշեղ Շուշանյանը, Տիգրան Հայրապետյանը, Արայիկ Պապիկյանը:

Այս ընթացքում ապակիներից այն կողմ՝ բախում տեղի ունեցավ ոստիկանների եւ Սասնա ծռեր խմբի անդամ Սմբատ Բարսեղյանի, Արեգ Կյուրեղյանի եւ Մխիթար Ավետիսյանի միջեւ: Ապակիներից այս կողմ գտնվող նրանց համակիրներն ու լրագրողները միայն տեսան, թե ինչպես են ամբաստանյալ Արեգ Կյուրեղյանին, Մխիթար Ավետիսյանին, Սմբատ Բարսեղյանին ոստիկանները բռնի ուժի կիրառմամբ դուրս տանում նիստերի դահլիճից: Լսելի չէր նաեւ թե ինչից առաջացավ միջադեպը. լսվում էր միայն նրանց բղավոցները: Սա ավելի սրեց իրավիճակը եւ ապակիներից այս կողմ գտնվող քաղաքացիները տեսնելով, թե ինչպես են ամբաստանյալներին բռնությամբ դուրս հանում, սկսեցին հարվածել ապակիներին:

Րոպեներ անց, դահլիճից դուրս գալով` Արեգ Կյուրեղյանի պաշտպան Արա Ղարագյոզյանը լրագրողների հետ զրույցում ասաց,  որ Արեգը փորձել է իրեն թղթի վրա գրված գրություն փոխանցել, սակայն ուղեկցող ոստիկաններից մեկը խլել է թուղթը եւ պատռել` չնայած հանգամանքին, որ իր պաշտպանյալն իր հետ գրավոր եւ բանավոր հաղորդակցվելու իրավունք ունի: Նա նաեւ ահազանգեց, որ Արեգ Կյուրեղյանին տանելուց հետո ծեծի, գոռոցի ձայներ են լսվել. «Իմ պաշտպանյալին խոշտանգում են, գցել են գետնին»,- ասաց Ղարագյոզյանը:

Այս ընթացքում միջադեպ տեղի ունեցավ նաեւ դատարանի բակում՝ դատարանի դիմաց գտնվող փաստաբանների եւ ոստիկանների միջեւ: Մի խումբ փաստաբաններ տեսել էին, թե ինչպես են կարմիրբերետավորները ծեծի ենթարկելով բերման ենթարկում ինչ-որ քաղաքացու:

Լուսինե Սահակյանը եւ Արա Զաքարյանը փորձել են քաղաքացուն օգնության շտապել, ոստիկաններին հայտնել, որ իրենք գնում են`այդ քաղաքացու շահերը ներկայացնելու, սակայն վերջիններս խոչընդոտելով փաստաբանների աշխատանքը բռնություն կիրառելով եւ քաշքշելով արգելում էին մոտենալ բերման ենթարկվածին: Երբ Լուսինե Սահակյանից հետաքրքրվեցինք, թե ինչ է տեղի ունեցել, Սահակյանն ասաց. «Ոստիկանությունը բռնի ուժ է գործադրում նաեւ իմ նկատմամբ»: Կարմիրբերետավորները շրջափակման մեջ էին վերցրել փաստաբաններին` պնդելով, որ եթե ցանկանում են բերման ենթարկված քաղաքացուն իրավական օգնություն ցույց տալ, ապա գնան Ավան եւ Նոր Նորք վարչական շրջանների ոստիկանության բաժանմունք: Ավելի ուշ պարզվեց, որ բերման ենթարկված քաղաքացին Սասնա ծռեր խմբի անդամ Գագիկ Եղիազարյանի եղբայրն է՝ Դավիթը: Նա բերման է ենթարկվել ոստիկանի նկատմամբ բռնության փորձ կատարելու կասկածանքով:

Այս միջադեպին զուգահեռ մեկ ու կես ժամ հետո սկսվեց «Սասնա ծռեր» խմբի գործով նիստը, որին ներկա էին մոտ երկու պաշտպան եւ մի քանի ամբաստանյալներ, նրանցից Արայիկ Խանդոյանն ու Գագիկ Եղիազարյանն այսօր դատարան չէին բերվել: Նախորդ նիստին նրանք 6 ժամով հեռացվել էին նիստերի դահլիճից: Ի վերջո, դատավոր Արտուշ Գաբրիելյանը դատավարության մասնակիցներին ասաց, թե դատավարության մասնակիցներից շատերը բացակայում են նիստից, ուստի այն ենթակա է հետաձգման: Այնինչ փաստաբանների մի մասը դահլիճում չէր ոչ թե չներկայանալու, այլ դատարանում ու դրա դիմաց ստեղծված լարված իրավիճակի պատճառով: Գործով դատական նիստը հետաձգվեց եւ նշանակվեց հուլիսի 12-ին: