Աղբի տեսուչներ դեռ չկան, բայց տուգանքների մասին հիշեցվում է. մինչեւ 200 հազար դրամ

Կառավարության մայիսի 25-ի նիստում վարչապետ Կարեն Կարապետյանը տարածքային կառավարման եւ զարգացման նախարար Դավիթ Լոքյանին հանձնարարեց երկամսյա ժամկետում ուսումնասիրել եւ գործադրի աշխատակազմ ներկայացնել առաջարկություններ Հայաստանի համայնքների աշխատակազմում չսահմանված վայրերում աղբ թափելու դեպքերով վարչական պատասխանատվության, այդ թվում` տուգանքի կիրառման ապահովման հատուկ ստորաբաժանման ձեւավորման վերաբերյալ: Սա ենթադրում էր, որ պետք է ստեղծվեր «աղբի տեսուչի» ինստիտուտ, որի գործառույթները կլիներ վերահսկել, հայտնաբերել եւ տուգանել չսահմանված վայրերում աղբ թափողներին:

Սյունիքի մարզկենտրոն Կապան քաղաքի ավագանու անդամ Նարեկ Բաբայանը ֆեյսբուք սոցիալական ցանցի իր էջում լուսանկար է հրապարակել եւ գրել, որ Կապանի Բարաբաթում թաղամասում ցուցանակ է տեղադրվել, որը հիշեցնում է աղբ թափելու տուգանքի մասին:

Կապանի քաղաքապետ Աշոտ Հայրապետյանն armtimes.com-ի հետ զրույցում ասաց, որ քաղաքապետարանը Վարչական իրավախախտման մասին ՀՀ օրենսգրքի համաձայն՝ տարիներ շարունակ զբաղվել է չսահմանված վայրերում աղբ թափելը վերացնելով: «Կոմունալ բաժնում տեսուչ կա, որն զբաղվում է այդ աշխատանքներով, դրա համար պատասխանատու է: Նրա կողմից կազմված արձանագրությունը ներկայացվում է քաղաքապետարան, որի համաձայն վարչաիրավական բաժինը սկսում է իրականացնել վարչական վարույթ, որի արդյունքում քաղաքացու կամ տնտեսավարողի կողմից ոչ սահմանված տեղում թափած շինարարական կամ կենցաղային աղբի փաստը հիմնավորվելուց հետո ենթարկվում են տույժի»,- ասաց քաղաքապետը:

Աշոտ Հայրապետյանի խոսքով՝ հիմնավորելը դժվար է, քանի որ գործող օրենքով արձանագրությունը պետք է կազմված լինի տեսուչից բացի, եւս երկու վկայի օգնությամբ: Հայտնի է՞, թե աղբի տեսուչները, որոնք լինելու են առաջիկայում, կոնկրետ ի՞նչ գործառույթներ են ունենալու, առանձին ստորաբաժանո՞ւմ է ստեղծվելու, նա պատասխանեց. «Դա չգիտեմ, բայց մեր դեպքում արդեն ասացի, որ նրանք կոմունալ բաժնի հաստիքային աշխատողներն են, բայց շրջայց կազմակերպելու դեպքում քաղաքապետարանում գործում է մշտական հանձնաժողով, որը պատասխանատու է փողոցային առեւտրի, թափառող կենդանիների, առանց իրավական հիմքերի կառուցապատման, ինչպես նաեւ կենցաղային ու շինարարական աղբի չսահմանված տեղերում թափելու հարցերի համար: Շրջայցերի միջոցով բացահայտվում են նման դեպքերը»:

Քաղաքապետը նշեց նաեւ, որ Կապանում նոր ցուցանակներ տեղադրվել են, բայց նախկինում էլ կար: «Նախկինում քիչ վայրերում ունեինք, բայց եւս 12 վայրում ավելացրինք: Իհարկե, անհրաժեշտություն կլինի կրկին ավելացնելու: Համենայնդեպս՝ չսահմանված տեղերում կուտակված աղբից փորձում ենք ազատվել, որոշ մասով դրանք հաջողվել են, բայց շարունակական բնույթ են կրելու, որովհետեւ 10-ամյակների ձեւավորված վատ ավանդույթների շնորհիվ դուք էլ գիտեք, թե ինչ է տեղի ունեցել»,- եզրափակեց Աշոտ Հայրապետյանը:

ՀՀ տարածքային կառավարման եւ զարգացման նախարարի մամուլի խոսնակ Կարինե Մանգասարյանն armtimes.com-ի հետ զրույցում հայտնեց, որ նախարար Դավիթ Լոքյանն ասել է, որ օրենսդրական փոփոխություն պետք է տեղի ունենա:

Վարչական իրավախախտումների մասին ՀՀ օրենսգրքի 43.1 հոդվածը սահմանում է, թե որքան տուգանք է նախատեսված չսահմանված վայրում աղբ թափելու համար: Նվազագույնը 20 հազարն է, իսկ առավելագույնը 200 հազար դրամը:

Նշենք, որ Շիրակի նորանշանակ մարզպետ Արթուր Խաչատրյանն էլ վերջերս անցկացված շաբաթօրյակի ժամանակ հայտարարել էր, որ հրապարակելու է գոլդ պետհամարանիշներով մեքենաների միջից աղբ նետելը փաստող լուսանկարները: Նույն օրը հրավիրած ասուլիսի վերջում ՀՅԴ-ական մարզպետը, դիմելով Շիրակի փոխոստիկանապետին, ասել էր. «Պարոն գնդապետ, եթե նկարներն ունեք, խնդրեմ, նկարներն ուղարկեք մեզ, մենք տանք լրատվամիջոցներին, թող հրապարակեն, որ 00 xx 000 համարով մեքենան աղբ է թափում: Կարծում եմ՝ հրապարակումն անձնական ինֆորմացիայի խախտում չէ, չէ՞: Եթե չէ, լրատվամիջոցներին կտրամադրենք, ուղղակի խնդրանքս ա, եթե վիդեո ունեք, թող հեռուստացույցով ցույց տան, եթե ֆոտո ա, թող կայքերում դնեն»:

Ի դեպ, արդեն «Աղբ չթափել» մակագրությամբ գովազդային վահանակներ են տեղադրվել միջպետական ավտոճանապարհներին: