«Ես այդ թատրոնին չեմ մասնակցի». Արա Զոհրաբյանը ՓՊ նախագահի միակ թեկնածո՞ւ

Սեպտեմբերի 9-ին Փաստաբանների պալատում սպասվում են նախագահի ընտրություններ: Թեկնածուների առաջադրումները սկսվել են օգոստոսի 12-ից: Մինչ այսօր, սակայն, Պալատի գործող նախագահ Արա Զոհրաբյանից բացի, դեռ ոչ ոք ցանկություն չի հայտնել առաջադրվելու ընտրություններում: Մեր զրույցում ՓՊ մամուլի խոսնակ Ծովինար Խաչատրյանն ասաց, որ այս պահի դրությամբ միակ առաջադրված թեկնածուն Պալատի գործող նախագահն է:

Պալատի գործունեությունը մշտապես քննադատող մի խումբ փաստաբաններ, որոնք մշտապես բարձրաձայնում են պալատում առկա խնդիրները, որոնք վերաբերում են թե՛ Արա Զոհրաբյանի գործունեությանը, թե՛ նրան, որ Փաստաբանների պալատում աշխատակազմն ուռճացված է, անիմաստ են համարում մասնակցել ընտրություններին:

Այս պահին չառաջադրվելու մասին հայտարարել են հայտնի փաստաբաններ Լուսինե Սահակյանը, Հայկ Ալումյանը, Տիգրան Աթանեսյանը: Նշենք, որ թեկնածություն առաջադրելու համար առնվազն 10 տարվա փաստաբանական ստաժ է պետք, որը ոչ բոլոր փաստաբաններն ունեն:

Փաստաբան Տիգրան Աթանեսյանը, հիշեցնենք, 2013 թվականի ՓՊ նախագահի ընտրություններում առաջադրել էր իր թեկնածությունը: Այդ ժամանակ ձայների բացարձակ մեծամասնությամբ ՓՊ նախագահ էր ընտրվել Արա Զոհրաբյանը. նրա օգտին քվեարկել էր 713 ընտրող: Ձայների քանակով երկրորդ տեղում էր Տիգրան Աթանեսյանը՝ 94 ձայն:

Մեր զրույցում Աթանեսյանը մանրամասնել է, թե ինչու այս ընտրություններում չի առաջադրվելու:

- Պարոն Աթանեսյան, դուք մշտապես դժգոհել եք Պալատի ղեկավարություններից, հիմա ինչո՞ւ որոշեցիք չառաջադրել ձեր թեկնածությունը:

- Բավականին շատ են պատճառները, սկսած նրանից, որ իշխանություն Պալատում չպետք է լինի, որ կա այդ իշխանությունը, արդեն շատ վատ է: Պատճառներից սկսեմ. առաջինը՝ այն, որ  ես գիտեմ, որ փաստաբանական մեծամասնությունը ինձ չի ընտրելու: Երկրորդը՝ Պալատի նախագահ լինելն իմ կյանքի նպատակներից չէ, ես ցանկանում եմ ազատ փաստաբանությամբ զբաղվել: Երրորդ՝ ամեն դեպքում Պալատը վերահսկվում է իշխանությունների կողմից, չի կարող չվերահսկվել եւ հանկարծ, եթե ես դառնամ Պալատի նախագահ, ես պրոբլեմներ կստեղծեմ փաստաբանների համար. չեմ կարծում, որ երկար կմնամ այդտեղ: Քանի որ ես ասել եմ, որ պալատը հիվանդ կառույց է, ես չեմ կարող գնալ ղեկավարել հիվանդ կառույց, պետք է լրիվ կազմալուծվի եւ փոխի ձեւը, կարգը՝ փաստաբանների միավորման, հակառակ դեպքում՝ էական էլ չի ով կլինի Պալատի նախագահը:

- Եթե առաջադրվեիք եւ ընտրվեիք նախագահ, չէ՞իք կարող հիվանդ կառույցը առողջացնել:

- Ես մի քիչ չեմ պատկերացնում, թե ինչպես պետք է աշխատեմ այդ խորհրդի հետ (խորհրդի անդամները Պալատի նախագահ Արա Զոհրաբյանի համախոհներն են,- Տ.Խ.), ինչպես պետք է աշխատեմ այդ աշխատակազմի հետ կամ մնացածի: Բացի դա, 1850 փաստաբան կա, ամեն մեկը մտածում է՝ ինքը փաստաբան է, արտոնագիր ունի, մարդ է պաշտպանում: Մեզ մեղադրում են, որ մենք շատ քիչ ենք եւ իրենց քննադատում ենք: 1700 լուռ փաստաբաններն ո՞ւր են: Առաջարկս է բոլոր փաստաբաններին՝ առաջադրվեք եւ պայքարեք դուք: Չստացվի, որ սա իմ անձնական պայքարն է: Գոյություն չունի փաստաբանություն, փաստաբանության ինչ-որ զանգված կա, որոնք թքած ունեն իրենց մասնագիտության վրա մի կտոր հացի պատճառով: Թող գնան տեսնեմ ո՞վ է առաջադրվելու Զոհրաբյանի հետ՝ ոչ ոք: Խելոք, գլխիկոր, շարքով-կարգով գալու են քվեարկեն այն թեկնածուին, որին ասելու են: Ես ոչ թե իմ ձեռքերը լվացել, կողմ եմ քաշվել, այդպես չէ, ես մեկ է շարունակելու եմ իմ պայքարը: Էդ քանակը, որ հավաքվել է, անիմաստ է՝ որակ չի տվել բացարձակ:

- Ինչպե՞ս պետք է պալատը փոխվի, եթե ոչ ընտրությունների միջոցով:

- Օրենսդրական փոփոխություններ են պետք, փաստաբանությունը քանակով չի, որակով է, եթե այսօր փաստաբանության մասին խոսում են, խոսում են շնորհիվ 20-30 փաստաբանի: Էդ 20-30 հոգին, ով ուզում են լինեն, չեն կարող փոխել ամբողջ կորպուսը: Հետեւաբար՝ այստեղ պետք է լինեն օրենսդրական փոփոխություններ: Պայքարը պետք է լինի ե՛ւ Մարդու իրավունքների եվրոպական դատարանում, եւ մեր՝ Սահմանադրական դատարանում: Նրանք, ովքեր հարգում են իրենց մասնագիտությունը, պետք է հնարավորություն ունենան ինքնուրույն միավորում ստեղծելու եւ կախված չլինելու այդ անդեմ մեծամասնությունից:

- Պարոն Աթանեսյան, դուք ավելի վաղ հայտարարել էիք ինքնուրույն միավորում՝  Փաստաբանների պալատին այլընտրանքային կառույց ստեղծելու մասին: Ի՞նչ փուլում է:

- Բավականին աշխատանք է տարվում, որը դեռ չի երեւում: Մոտակա ժամանակում հայցադիմումներ կլինեն, դիմումներ նաեւ Սահմանադրական դատարան: Այդ ամենը հեշտ չէ, բավականին դժվար աշխատանք է: Ես որեւէ հույս չեմ կապում մեր փաստաբանության մեծամասնության հետ: Դրա համար ես այս ճանապարհով եմ գնալու: Իմ գործունեությունը որեւէ կապ չպետք է ունենա այդ պալատի հետ:

- Պարոն Աթանեսյան, այնուամենայնիվ, քվեարկության մասնակցելո՞ւ եք:

- Ոչ, ես այդ թատրոնին չեմ մասնակցելու:

- Այս պահի դրությամբ միակ առաջադրված թեկնածուն Արա Զոհրաբյանն է: Ի՞նչ եք կարծում, նա կվերընտրվի՞ նախագահի պաշտոնում:

- Այո, իմ կարծիքով կվերընտրվի՝ մեր փաստաբանության մեծամասնության այսօրվա որակից ելնելով: Ճիշտն ասած, մեկ է, ով կընտրվի, բացարձակ միեւնույն է:

Հիշեցնենք, որ առաջադրումները կշարունակվեն մինչեւ օգոստոսի 17-ը: Քարոզչությունը սկսվում է օգոստոսի 18-ից (ներառյալ) եւ ավարտվում է սեպտեմբերի 7-ին՝ ժամը 18:00-ին։

ՓՊ նախագահին ընտրում է փաստաբանների ընդհանուր ժողովը՝ փակ քվեարկությամբ։ Ընտրվում է առավելագույն ձայներ ստացած թեկնածուն՝ 4 տարի ժամկետով։ ՀՀ «Փաստաբանության մասին» օրենքի 13-րդ հոդվածի համաձայն՝ Փաստաբանների պալատի նախագահն ընտրվում է առնվազն տասը տարվա փաստաբանական ստաժ ունեցող անդամների կազմից փակ գաղտնի քվեարկությամբ` չորս տարի ժամկետով, բայց ոչ ավելի, քան երկու անգամ անընդմեջ։