Նախորդ 5 տարվա ընթացքում պետական դպրոցներում կրճատվել է 3 հազար 900 ուսուցիչ

Արդեն մի քանի տարի է՝ հայաստանյան պետական դպրոցներում ուսուցիչների թվաքանակն անշեղորեն նվազում է: Նախորդ 5 տարիների ընթացքում նրանց թիվը, ընդհանուր առմամբ, կրճատվել է ավելի քան 3 900-ով: Ընդ որում, առաջին տարիներին փոփոխությունը բավական կտրուկ է, ի տարբերություն վերջին երկու տարիների:  

Պաշտոնական վիճակագրական տվյալները փաստում են, որ

2011-2012 ուսումնական տարում Հայաստանի պետական դպրոցներում աշխատել է 40 715 ուսուցիչ:

2012-2013 ուստարում՝ 39 566 ուսուցիչ: Տարբերությունը կազմում է 1 149:

2013-2014 ուսումնական տարվա ավարտին պետական դպրոցներում աշխատող մանկավարժների թիվը եղել է 38 483: Նախորդ տարվա համեմատությամբ տարբերությունը 1 083 է:

2014-2015 ուսումնական տարվա ընթացքում պետական հանրակրթական հաստատություններում աշխատանք է ունեցել 37 560 ուսուցիչ: Այսինքն՝ նախորդ ուստարվա համեմատությամբ՝ 923-ով պակաս:

Հաջորդ երկու տարիներին ուսուցիչների թվաքանակը կրճատվել է համապատասխանաբար 386 եւ 367-ով:

2015-2016 ուստարում պետական դպրոցներում աշխատող ուսուցիչների թիվը եղել է 37 174:

2016-2017 ուստարում՝ 36 807:

Այլ առիթներով անդրադարձել ենք, որ կառավարության սահմանած ուսուցչական հաստիքները 25 հազարն են: Այսինքն՝ 11 807-ով պակաս, քան վերջին տվյալով ուսուցիչների թիվն է:

ԿԳ նախկին նախարարի պաշտոնավարման օրոք միտում կար մոտեցնել-հավասարեցնել հաստիքների եւ գործող ուսուցիչների թիվը, ինչի պատճառով ուսուցիչների քանակը տարեկան նվազեցվում էր միջինը հազարով: Արմեն Աշոտյանը համոզված էր, որ կրթության որակ կարելի է ապահովել այն դեպքում, երբ ուսուցիչն աշխատում է ամբողջ ծանրաբեռնվածությամբ, եւ որ դպրոցը չպետք է դիտարկել որպես աշխատատեղ ապահովելու վայր:

Գործող նախարարն առավել զգուշավոր է ուսուցիչների կրճատման հարցում՝ խնդրի սոցիալական բաղադրիչը համարելով ոչ երկրորդական: Նրա պաշտոնավարման ընթացքում, ինչպես նշեցինք, ուսուցիչների թիվը տարեկան նվազել է 386 եւ 367-ով: