Վարժարանի 70 սովորող միացել են դասադուլին, իսկ ուսխորհդի ՀՀԿ-ական նախագահը դեմ է պայքարին

«Հանուն գիտության զարգացման» նախաձեռնության ուսանող-անդամների՝ հինգ օր առաջ հայտարարած դասադուլը դեռ շարունակվում է: Եվ երիտասարդներն ուղիներ են որոնում՝ իրենց շարքերը նորանոր համախոհներով համալրելու եւ իրենց ձայնը լսելի դարձնելու համար:

Հիշեցնենք, որ  դասադուլին մասնակից ուսանողները բողոքում են «Զինապարտության մասին» օրինագծի դեմ, պահանջում պահպանել տարկետման իրավունքի տրամադրման գործող սկզբունքները: Այսօր նույնպես բողոքի ակցիայի դուրս եկած երիտասարդները շրջեցին Երեւանի պետական համալսարանի տարբեր մասնաշենքերով, երթով հասան Հայաստանի պետական տնտեսագիտական համալսարանից մինչեւ Պոլիտեխնիկական համալսարան ու կոնսերվատորիա:

Նրանք վանկարկում էին՝ «Տակետում լինելու ա», «Դասադուլ» «Միացիր», «Հանուն գիտության զարգացման»: Այսօր, ի դեպ, պարքարող երիտասարդներին էին միացել նաեւ Պոլիտեխնիկական համալսարանի վարժարանում սովորող աշակերտները: Նրանցից մեկը մեզ ասաց, որ 70 հոգի են:

Դեպի կոնսերվատորիա շարժվելիս՝ երթի մասնակիցները մի քանի րոպե փակեցին Տերյան փողոցը: Ուղեկցող ոստիկաններն անմիջապես արձագանքեցին եւ հորդորեցին բարձրանալ մայթ: Երիտասարդները չընդդիմացան, եւ երթեւեկությունը շատ չանցած վերականգնվեց:

Ճարտարապետության եւ շինարարության Հայաստանի ազգային համալսարանում դասադոուլ անող ուսանողներին դիմավորում էր նաեւ ուսանողական խորհրդի նախագահ Հովսեփ Հովեյանը:  Լրագրողների հետ զրույցում նա չողջունեց դասադուլի մասնակիցների գործողությունները:

«Գտնում եմ, որ ձեւաչափը այս ձեւով ընդունելի չէ, որովհետեւ եթե գիտություն ենք ուզում զարգացնել, հաստատ այսպես գիտություն չի զարգանում»,- ասաց նա: Հովսեփ Հովեյանը Հանրապետական կուսակցության անդամ է, բանակ գոնե առայժմ չի գնացել, որովհետեւ սովորում է ասպիրանտուրայում եւ գործող օրենքով տարկետման իրավունք է ստացել:

«Եթե նոր օրենքը տարածվի նաեւ մեզ վրա, այո, պատրաստ եմ գնալ ծառայության»,- ասաց ուսխորհրդի նախագահը: Դիտարկմանը, թե եթե ողջունում է նոր օրենքի նախագիծը եւ կարծում է բոլորը պետք է ծառայեն, ինչու մինչեւ այժմ չի ծառայել, նա պատասխանեց. «Արդեն ասացի, որ ես դեռ սովորում եմ, եւ ավարտելուց հետո թե ես ինչ կանեմ, դա արդեն իմ անձնական որոշելիքն է: Շատ հնարավոր է նաեւ զինծառայության ճանապարհն ընտրեմ, ոնց որ իմ շատ ընկերներ»:

Վերադառնալով դասադուլի մասնակիցներին, նշենք, որ բացառիկ տաղանդավոր ուսանողներին տրվելիք արտոնութունը նրանց համար անհասկանալի երեւույթ է:

Ազգային ժողովում ուրբաթ ուշ երեկոյան հրավիրված արտահերթ քննարկման ժամանակ ընդգծվեց, որ այդ կատեգորիայի ուսանողները տարկետում կստանան, միայն թե պետք է կառավարությունը լրջորեն աշխատի՝ նրանց ընտրելու կարգն ու չափորոշիչները մշակելու համար:

«Հանուն գիտության զարգացման» նախաձեռնության անդամ Դավիթ Պետրոսյանն այս առնչությամբ նկատեց, որ դա զիջում չէ:

«Դա զիջում չի եղել, օրենքի նախագծում այդ կետը կա՝ հինգերորդ կետն է, ուղղակի այդ կետի հետ կապված չափանիշներ չկան, թե ոնց է տրվելու, ում է տրվելու այդ տարկետումը: Այժմ ներկայացվում է այնպես, որ տրվելու է տաղանդաշատ գիտնականներին, բացառիկ տաղանդավոր ուսանողներին: Թող բերեն, ուրեմն, չափորոշիչներ, որպեսզի այդպես լինի: Դա ընդհանուր գրված է, դրա տակ կարող են անցնել բոլորը, քանի որ չափանիշներ նշված չեն»,- ասաց Դավիթ Պետրոսյանը:

Հարցին, թե եթե կառավարության որոշմամբ հաստատվի տարկետում ստանալու ենթակա ուսանողների ընտրության կարգը եւ սահմանվեն հստակ չափորոշիչներ, դա իրենց կգոհացնի՞, դասադուլ անող ուսանողը պատասխանեց. «Ոչ, մենք պահանջում ենք, որ գործող կարգը պահպանվի, մեր առաջարկները մենք արդեն արել ենք, դրանք մերժվել են, ասել են՝ օրենքը ընդունվելուց հետո, իսկ դրա հետ մենք համաձայն չենք»:

Դավիթ Պետրոսյանը մեր խնդրանքով անդրադարձավ նաեւ Երեւանի պետական համալսարանի ուսանողական խորհրդի տարածած հայտարարությանը, ըստ որի՝ նրանք չեն կիսում դասադուլ հայտարարած ընկերների մոտեցումները: «Մենք այսօր համալսարանում էինք, ասացինք՝ եթե ինչ-որ մեկը նշում է, որ մեծամասնությունը դեմ է, թող այդ մեծամասնությունից գոնե մի հոգի գա (բանավեճի-խմբ.): Մենք բոլոր ֆակուլտետներով անցել ենք, ասել ենք՝ ովքեր որ մեզ դեմ են, թող գան, ու ոչ ոք չի եկել»,- նշեց նա: