Ես ունեմ ստույգ ինֆորմացիա, ձեզ է հանդիպել Սերժ Սարգսյանը. Արամ Մանուկյան

Շենգավիթ վարչական շրջանի ընդհանուր իրավասության դատարանում դատավոր Արթուր Օհանյանի նախագահությամբ այսօր շարունակվում է «Սասնա ծռեր» խմբի գործով առանձնացված 2-րդ մասով դատական նիստը:

Այս գործով հիշեցնենք, կա 11 ամբաստանյալ՝ Արամ Մանուկյան, Հովհաննես Հարությունյան, Թաթուլ Թամրազյան, Արամ Հակոբյան, Տիգրան Մանուկյան, Արայիկ Հակոբյան, Վարդան Գերավետյան, Մարտիրոս Հակոբյան, Սերգեյ Կյուրեղյան, Գեւորգ Իրիցյան, Թորոս Թորոսյան:

Գործով այսօր ներկայացել էր նոր մեղադրող դատախազ Արամ Արամյանը, դատարան էր ներկայացել նաեւ մեղադրող դատախազ Արթուր Չախոյանը: Երկուսն էլ դատարանին ներկայացրին իրենց լիազորագրի պատճենահանված տարբերակը, ապա նշեցին, որ լիազորագրի բնօրինակը գտնվում է մայր գործում: Դատավորն էլ սրա վրա ուշադրություն չդարձրեց, սակայն պաշտպանական կողմը պնդեց, որ մեղադրող դատախազները դատարան լիազորագիր չեն ներկայացրել եւ դատական նիստը չի կարող շարունակվել, եթե նրանք այս գործով որպես դատախազներ ներգրավված չեն:

«Մենք ամենաշատն ենք շահագրգռված, որպեսզի այս գործը շուտ քննվի: Մենք չենք էլ իմացել, որ դատախազները լիազորագիր չեն ներկայացրել դատարան, բայց դատական նիստերը կայացվել են, միգուցե սա բոլորիս մեղավորությունն է: Այս գործով քննվող երեք վարույթով էլ դատախազները պետք է լիազորագիր ներկայացնեն եւ ներգրավվեն որպես մեղադրողներ: Դատական նիստը պետք է հետաձգվի, հնարավորություն տրվի նրանց, որպեսզի լիազորագիր ներկայացնեն»,- ասաց ամբաստանյալներից Դեդ մականունով հայտնի Մարտիրոս Հակոբյանի պաշտպան Լուսինե Սահակյանը:

Մինչ այդ, սակայն լիազորագիր չներկայացնելու հիմքով պաշտպան Լիպարիտ Սիմոնյանը մեղադրող դատախազներին բացարկի միջնորդություն ներկայացրեց:

Դատախազ Արամ Արամյանն էլ նշեց, որ օրենքով սահմանված կարգով իրենք լիազորված են պաշտպանելու մեղադրանքը եւ ներկայացված միջնորդությունն անհիմն է: Դատավոր Արթուր Օհանյանն էլ առանց Լուսինե Սահակյանի՝ դատական նիստը հետաձգելու միջնորդությունը քննարկելու հեռացավ խորհրդակցական սենյակ: Ապա վերադառնալով մերժեց դատախազներին ինքնաբացարկ հայտնելու՝ պաշտպան Լիպարիտ Սիմոնյանի միջնորդությունը: Ինչից հետո պաշտպան Մուշեղ Շուշանյանը դատավորին ինքնաբացարկի միջնորդություն ներկայացրեց, որին միացան մյուս պաշտապները եւս: Պաշտպաններից Լուսինե Սահակյանը միանալով միջնորդությանը նշեց, որ դատարանը չանդրադառնալով իր ներկայացրած միջնորդությանը՝ միանշանակ ցույց տվեց, որ դատարանը կաշկանդված է, եւ չի կարող արդարացի դատական ակտ կայացնել. «Դուք անգամ դատախազներից լիազորագիր չեք կարող պահանջել, ես ձեզ եւս մի անգամ հորդորում եմ լիազորագիր պահանջեք դատախազներից, տեսնենք՝ գոնե դա կարո՞ղ եք անել»,- ասաց Սահակյանը:

Ինքնաբացարկի վերաբերյալ դիրքորոշում հայտնեցին նաեւ «Սասնա ծռեր» խմբի անդամները: Մասնավորապես՝ Վարդան Գերավետյանը նկատեց. «Դուք ձեր խիղճն ազատեք, ակնհայտ է, որ դուք կաշկանդված եք, ես տեսնում, որ դուք մարդկային հատկանիշներ ունեք, մի դարձեք կամակատար»,- ասաց Գերավետյանը, ապա հիշեցրեց. «Առաջին դատական նիստը չէ, որ մեղադրողները բավականին անփույթ են վարվում իրենց պարտականություններին: Տարբեր դատավորների քննության ժամանակ նմանատիպ երեւույթներ եղել են, երբ դատախազներն առանց լիազորագրի են եկել, լքել են նիստերի դահլիճը: Նայելով զարգացումներին՝ մենք տեսնում ենք, որ դատարանները դրսից ուղղորդվում են, որոշում են կայացնում, երբ նրանց հրահանգում են ինչ անել: Ինձ թվում է, որ Դուք էլ ձեր խիղճը կազատեք, թող մեկ ուրիշը գա ձեր փոխարեն, ես տեսնում եմ, որ Դուք այդպիսին չեք»,- ասաց նա:

Ամբաստանյալներից Արամ Հակոբյանն էլ դատարանին եւ մեղադրողներին կոչ արեց` «Գիշերը քնելուց առաջ գլուխներդ դրեք բարձին եւ մտածեք` ինչ եք արել ազգի եւ հայրենիքի համար:  Տղերք, երկիրը կործանվում է, բայց այսօր մեր բանտերում արցախյան պատերազմի հերոսներն են լցված»:

Սասնա ծուռ Պավլիկ Մանուկյանի որդին՝ Արամ Մանուկյանը, նշեց, որ դատարանը քաղաքական պատվեր է կատարում. «Ես ունեմ ստույգ ինֆորմացիա, ձեզ է հանդիպել Սերժ Սարգսյանը եւ այս չորս նիստերում այս կապիկությունը տեսնելով, կարող ենք ասել, որ քաղաքական պատվեր եք կատարում, եւ դուք դատարան կոչվելու իրավունք չունեք: Մի բան եմ խնդրում` մի խայտառակեք մեր դատական համակարգը, մենք այստեղ ենք, եւ մեր վրա զանազան հոդվածներ եք դրել այն դեպքում, երբ մենք ապստամբություն ենք արել, որովհետեւ դուք չեք կատարել այն, ինչ պետք է կատարեիք: Ձեր կատարած եւ չկատարածների համար մենք ենք պատասխան տալիս»:

Ներկայացված ինքնաբացարկի միջնորդության դեմ առարկեցին մեղադրող դատախազները` նշելով, որ միջնորդությունն անհիմն է եւ ենթակա է մերժման: