Ամոթը Սահմանադրությամբ սահմանված պատիժ չէ. Ռուստամյանը՝ Սերժ Սարգսյանի ելույթի մասին

ԱԺ ՀՅԴ խմբակցության ղեկավար Արմեն Ռուստամյանը լրագրողների հետ ճեպազրույցում անդրադառնալով Սերժ Սարգսյանի` ՏԻՄ-երի մասին հայտնի ելույթին նշեց, որ տարբեր համայնքներում տարբեր համայնքապետներ իրենց դիրքը չարաշահել են, և այդ մասին է բարձրաձայնել նախագահը:

«Պետք է ոչ թե փորձեն հովանավորել այդպիսի համայնքապետներին մարզպետները, նախարարները, այլ պետք է վերահսկվի այս ամեն ինչը: Ես նախագահի հայտարարությունն այդ ուղղությամբ եմ տեսնում: Սա էլ պետք է կատարվեն, կարգավորվեն ոչ թե հայտարարություններով, այլ՝ գործողություններով»,- ընդգծեց պատգամավորն, ապա շեշտեց, որ նոր Սահմանադրությունը, նոր համակարգը հենց դրա համար է, որ նման երևույթները բացառվեն:

«Եղել են ահազանգեր, որոնց մասին մենք բոլորս գիտենք, բայց դրանց հետևից գնացող չի եղել։ Նախագահն ասում է, որ այսուհետ գործընթացն իր հունով ընթանալու է»,- ասաց ՀՅԴ-ական պատգամավորն ու ավելացրեց, որ Սերժ Սարգսյանը հայտարարել է, թե «ամոթ է», թալանելը, իսկ ամոթը Սահմանադրությամբ սահմանված պատիժ չէ:

«Այս հայտարարությունը նախազգուշացում է բոլոր նրանց համար, որ պետք է վեր հանվեն նման երևույթները: Բոլորս էլ գիտենք, որ տարել են ու չեն բռնվել, որովհետև համակարգն է թույլ տալիս: Ես փաստերն եմ արձանագրում, մենք գիտենք դրա մասին, եղել են այդպիսի բաներ ու չեն բռնվել, պատճառներն էլ գիտենք, թե որտեղ են: Ապրիլից հետո դատական իշխանությունը, որ մենք պետք է ձևավորենք, չի ղեկավարվելու մեկ կենտրոնից, դատարանները մտնելու են իրենց ֆունկցիայի մեջ»,- հայտարարեց նա:

Հարցին` այս պահին դատախազությունը պե՞տք է զբաղվի նախագահ Սարգսյանի հայտարարությամբ Ռուստամյանը նշեց, որ պետք է արձագանքի:

«Ոչ միայն պետք է նախագահի հայտարարությունից հետո արձագանքեին, այլ իրենց սրբազան պարտքը պետք է լիներ, որ ժամանակին դրանով զբաղվեին»,- ասաց նա:

Ռուստամյանը նաեւ անդրադարձավ հարցին, արդյո՞ք ՀՅԴ-ական գող համայնքապետներ կան: Պատգամավորն ընդգծեց, որ նախ նման փաստ չկա, բայց որպես դաշնակցական, եթե նման բան պարզվի, պատասխանատվության կենթարկենք այդպիսի դաշնակցական գյուղապետին: