Բուժկենտրոններից չեն հաստատում, որ հացադուլի մասնակից Յուրին թոքաբորբ ունի, ինքը՝ նույնպես

Դեկտեմբերի 19-ի երեկոյան հայտնի դարձավ, որ Երեւանի պետական համալսարանի լսարաններից մեկում հացադուլ անող Յուրի Ավագյանը շտապ օգնության ավտոմեքենայով տեղափոխվում է հիվանդանոց, քանի որ նրա մոտ թոքաբորբ է կասկածվում: Ավելի ուշ հայտարարվեց, որ հետազոտության արդյունքում թոքաբորբ չի հաստատվել, եւ երիտասարդը վերադարձել էր հացադուլի վայր:

Բայց արդեն հաջորդ երեկոյան տեղեկություն տարածվեց, որ Յուրին թոքաբորբ ունի: «Հացադուլի մասնակից Յուրի Ավագյանին տեղափոխել են հիվանդանոց՝ թոքաբորբի պատճառով։ Նրա հացադուլը դադարեցվում է»,- նշվել էր «Հանուն գիտության զարգացման» նախաձեռնության ֆեյսբուքյան էջում:

Հարց է առաջանում՝ ինչպես ստացվեց, որ սկզբում թոքաբորբը չբացահայտվեց: Դուրս է գալիս՝ առաջին բուժհաստատությունում, որտեղ դիմել էր Յուրին, գործում են համապատասխան որակ չունեցող սարքավորումներ, որոնց արդյունքներին պե՞տք չէ վստահել, ու վատ ախտորոշման պատճառով երիտասարդն այդ վիճակում վերսկսել էր հացադուլը:

Երեւանի «Շտապ բուժօգնություն» ընկերության տնօրեն Թագուհի Ստեփանյանից տեղեկացանք, որ առաջին օրը Յուրի Ավագյանը տեղափոխվել է Երեւանի պետական բժշկական համալսարանի N1 հիվանդանոց, իսկ հաջորդ օրը՝ «Էրեբունի» բժշկական կենտրոն:

Բժշկական համալսարանի լրատվական ծառայությունից անդրադառնալով մեր հարցին, պատասխանեցին.

«Համապատասխան Ձեր հարցմանը նշենք, որ բժշկական օգնություն եւ սպասարկում իրականացնողների պարտականություններից եւ պատասխանատվությունից ելնելով՝ պարտավոր ենք ապահովել մարդու բժշկի օգնությանը դիմելու փաստի, նրա առողջական վիճակի մասին հետազոտման, ախտորոշման եւ բուժման ընթացքում պարզված տեղեկությունների գաղտնիությունը: Այս պահին չունենք Ձեր կողմից մատնանշված անձի համաձայնությունը՝ տվյալ տեղեկատվությունը 3-րդ անձանց տրամադրելու վերաբերյալ»,- նշվում է պարզաբանման տեքստում՝ հղում արվելով «Բնակչության բժշկական օգնության եւ սպասարկման մասին» ՀՀ օրենքի համապատասխան հոդվածին:

«Ինչ վերաբերում է բուժհաստատության համապատասխան սարքերի ֆունկցիոնալ վիճակին, ապա նշենք, որ բուժհաստատության բոլոր բժշկական սարքավորումները սարքին են եւ գործարկվում են դրանց տեխիկական փաստաթղթերին համապատասխան: Նշենք նաեւ, որ անձի համաձայնության դեպքում բուժհաստատությունը պատրաստակամորեն կտրամադրի Ձեր կողմից նշված անձի բժշկական օգնության եւ բուժսպասարկման մասին ամփոփ տեղեկատվություն»,- նաեւ հայտում են ԵՊԲՀ լրատվական ծառայությունից:

«Էրեբունի» բժշկական կենտրոնից տեղեկացանք, որ Յուրին հոսպիտալացված չէ: Նա հետազոտվել եւ գնացել է: Ասացին նաեւ, որ թոքաբորբ չեն հայտնաբերել, ըստ էության հաստատելով առաջին բուժհաստատության ի սկզբանե հրապարակված բացասական եզրակացությունը:

«Նա դիմել է մեզ մոտ, ընդհանուր թուլությունից է գանգատվել, ըստ հիվանդի խոսքերի՝ նաեւ ջերմության բարձրացում մինչեւ 37 աստիճան: Մեզ մոտ հետազոտվել է, կատարվել է կրծքավանդակի ռենտգեն քննություն, մենք թոքաբորբ, որպես այդպիսին, չենք հայտնաբերել: Հոսպիտալիզացիայի չի ենթարկվել: Նորմալ է եղել իր վիճակը, կայուն է եղել եւ դուրս է գրվել հիվանդանոցից»,- ասաց «Էրեբունու» ընդունարանի վարիչ Արմինե Սանամյանը:

Այս անսպասելի շրջադարձից հետո կապ հաստատեցինք նաեւ Յուրի Ավագյանի հետ:

«Ուղղակի 37.5 է եղել ջերմությունս, թոքաբորբային ջերմություն է եղել, թոքերս էլ թույլ են եղել, կասկածել են: Բայց օրգանիզմում ավելի շատ քայքայման պրոցես է եղել, ոչ թե թոքաբորբի: Ասում են՝ ածխաջրերն է օրգանիզմը քայքայել, որովհետեւ ջուր քիչ եմ խմել այնտեղ (հացադուլի վայրում-խմբ.): Հիմա կաթիլային են միացնում, որ վերականգնվի, որովհետեւ նորմալ հաց չեմ կարողանում ուտել»,- ասաց երիտասարդը:

Շարունակելով՝ նա նշեց. «Ինձ առաջարկել են հիվանդանոց, ուղղակի բժիշկը ասաց՝ եթե դու իրոք կթողնես, որ քեզ օգնեն, կարող ես տանն էլ մնալ քո հարմարության համար: Բայց «Էրեբունի» հիվանդանոցն ինձ առաջարկել է ու լրիվ անվճար, ասել է, կարող ես մնալ, մի քանի օր այստեղ բուժվել: Ես նախընտել եմ տանը մնալ, որ հարազատներս չգան հասնեն այնտեղ»:

«Հանուն գիտության զարգացման» նախաձեռնությունը պայքարում է «Զինապարտության մասին» նոր օրենքով ակադեմիական տարկետման գործող կարգի վերացման դեմ: Նախաձեռնության անդամներից երկուսը նաեւ վերսկսել էին մոտ մեկ ամիս դադարեցրած հացադուլը: Այսօր հացադուլի չորրորդ օրն է: Սնունդից հիմա հրաժարվում է միայն Դավիթ Պետրոսյանը: