Պաշտպանության նախարարության քաղաքացիական աշխատողների մի մասի աշխատավարձը կնվազի

Պաշտպանության նախարարությունում քաղաքացիական աշխատանք կատարող անձանց աշխատավարձերում փոփոխութություններ են տեղի ունենալու: Պաշտպանության նախարար Վիգեն Սարգսյանը կառավարության փետրվարի 8-ի նիստում կներկայացնի որոշման նախագիծ, որի համաձայն փոփոխվելու են ՊՆ-ում աշխատողների աշխատավարձերի դրույքաչափերը: «Հայկական ժամանակ»-ը համեմատել է գործող դրույքաչափերը փոփոխվողների հետ: Ստորեւ ներկայացնում ենք, թե փոփոխությունները գումարային ինչ տեսք կունենան:

Փոփոխման է ենթարկվում կառավարության 2014 թվականի հուլիսի 3-ին ընդունած 737-Ն որոշումը: Որոշման հավելավծներում փոփոխվել են ոչ միայն դրույքաչափերը, այլ նաեւ պաշտոնների անունները, որը դժվարացնում է բոլոր պաշտոնները նույնականացնել: Այդուհանդերձ մեզ հաջողվեց համադրել նախկին եւ ներկա պաշտոնների դրույքաչափերը եւ պարզել, որ որոշ աշատողների աշխատավարձերը կնվազելու են: Նշենք, որ որեւէ պաշտոնի համար սահմանված աշխատավարձը ստացվում է նախատեսված դրույքաչափի եւ բազային աշխատավարձի բազմապատիկով: 2018 թվականի պետական բյուջեում սահմանված է, որ պետական պաշտոն զբաղեցնող անձանց բազային աշխատավարձի չափը կազմում է 66 հազար 140 դրամ: Այսինքն ցանկացած պաշտոնի դրույքաչափը պետք է բազմապատկել 66 հազար 140-ով, որպեսզի ստանանք աշխատավարձի չափը: Ստացված աշխատավարձը հարկերը ներառյալ է (կեղտոտ աշխատավարձն է):

Պաշտպանության նախարարության գիտությանը վերաբերող պաշտոնների դրույքաչափերում հետեւյալ փոփոխությունները տեղի կունենան՝ հետազոտությունների ինստիտուտի «ավագ գիտնական վերլուծաբան«, հետազոտությունների ինստիտուտի «խմբի պետ» պաշտոնյաների անվանումը խմբագրվել է եւ դարձել է «ավագ գիտաշխատող», «ավագ գիտնական վերլուծաբան»: Գործող դրույքաչափերով այդ պաշտոնների համար սահմանված է 4.55 գործակիցը, իսկ առաջակվող տարբերակով սահմանվելու է 3.43 գործակից: Գործող դրույքաչափով աշխատավարձը կազմում է 300 հազար դրամ, իսկ առաջարկվող տարբերակով այն կդառնա 226 հազար դրամ:   

Հետազոտությունների ինստիտուտի խմբի մասնագետ-տեխնոլոգ, խմբի մեթոդիստ, խմբի և կենտրոնի գիտնական-վերլուծաբան պաշտոններից առանձնացվել են գիտական կազմակերպությունում գիտնականը եւ վերլուծաբանը: Առաջին դեպքում դրույքաչափը սահմնաված է 3.43 գործակցով, իսկ առաջարկվող տարբերակով գիտնականի եւ վերլուծաբանի գործակիցը սահմանվել է 2.47 գործակցով: Գործող դրույքաչափով աշխատավարձը կազմում է 226 հազար դրամ, իսկ առաջարկվողով այն կդառնա 163 հազար դրամ:

Պաշտպանության նախարարության համակարգում տեխնիկական սպասարկում իրականացնողների ե՛ւ պաշտոնների անվանումներն են փոփոխվել, ե՛ւ դրույքաչափերի գործակիցները:

Էլեկտրագազաեռակցող, եռակցող, փականագործ-գործիքագործ, խառատ, հղկող, ավտոփականագործ, փականագործ-մեքենագետ` ավտոմեքենայի, փականագործ` մեխանիկական հավաքման աշխատանքների, փականագործ, ֆրեզող, օպտիկ, նորոգող, ավտոէլեկտրիկ եւ այլ նմանօրինակ պաշտոնների համար սահմանվելու է 1.86 գործակիցը: Դա նշանակում է, որ նշված աշխատանքները կատարողները կստանան 123 հազար դրամ: Գործող դրույքաչափերով հնոցապան, զոդող, եռակցող, դողագործ, ավտոլվացող, պաստառապատող, գործիքագործ պաշտոնների դրույքաչափը սահմանված է 1.20 գործակիցը: Ավտոմեքենայի Էլեկտրագետի, փականակագործի, վոլնացնող վարպետի գործող դրույքաչափը 1.40 է: Առաջինի դեպքում այսօր աշխատավարձը կազմում է 79 հազար դրամ, երկրորդի դեպքում՝ 93 հազար դրամ: Տվյալ դեպքում, փաստորեն, աշխատավարձը բարձրանում է 30-40 հազար դրամով:

Հարկային նոր օրենսգրքով 2018 թվականի հունվարի 1-ից հետո քաղաքացիների աշխատավարձից գանձվող եկամտային հարկի դրույքաչափերը փոփոխվել են: 150-ից 200 հազար դրամ աշխատավարձ ստացողներից պահվող եկամտային հարկը նվազել է 1500-ից 2000 դրամի չափով, իսկ 200 հազար դրամից ավել ստացողներից մի քանի հազար դրամ ավելի շատ եկամտահարկ կգանձվի:

Կառավարության որոշման նախագծի հիմնավորման մեջ ասված է, որ գործող որոշմամբ ՀՀ ՊՆ համակարգի քաղաքացիական աշխատանք կատարողների և տեխնիկական սպասարկում իրականացնողների սահմանված պաշտոնների անվանումները ներկայացված են տարաբնույթ ձևակերպումներով, վարձատրության սահմանված և գործող վճարումների տեսակների մեջ առկա են որոշակի տարբերություններ: Որոշման ընդունմամբ նակնկալվում է նշված անձանց պաշտոնների անվանումների համապատասխանեցում միջազգային ստանդարտներին համապատասխան մշակված զբաղմունքների, մասնագիտացումների և պաշտոնների դասակարգչին:

Նյութը հրապարակվել է «Հայկական ժամանակ» օրաթերթի փետրվարի 8-ի համարում: