Սերժ Սարգսյանը գահին նստած սատանա է. Զարուհի Փոստանջյանը ԱԱԾ-ի մոտ ակցիա է անում

Երեւանում Նալբանդյան փողոցի վրա գտնվող Ազգային անվտանգության ծառայության շենքի դիմաց մեկնարկել է Երկիր ծիրանի կուսակցության ակցիան՝ ընդդեմ բռնաճնշումների: Ոստիկանները փողոցի մի հատվածը պահում են, որպեսզի ցուցարարները չփակեն Նալբանդյան փողոցը:

Այս պահին Զարուհի Փոստանջյանը հայտարարությամբ է հանդես գալիս: Վերջինս իր խոսքի սկզբում հիշեցրեց, որ այսօր Մարտի 1-ն է, եւ տասը տարի առաջ այս օրը ոստիկանությունը եւ հենց ԱԱԾ-ն Երեւանի փողոցներում գնդակահարեցին ՀՀ քաղաքացիներին: Զարուհի Փոստանջյանն իր խոսքում նշեց նաեւ, որ այսօր էլ Հայաստանի Հանրապետությունում 4 տասնյակից ավելի քաղբանտարկյալներ կան: Ակցիայի մասնակիցներն իրենց ձեռքերում պարզել են Անդրիաս Ղուկասյանի, Սասնա ծռերի անդամների նկարներով պաստառներ: 

Ակցիայի մասնակիցը՝ Անդրիաս Ղուկասյանի լուսանկարով

Փոստանջյանը իր ելույթում Սերժ Սարգսյանին անվանեց գահին նստած սատանա։ Նրա խոսքով՝ քաղաքական վիճակը կարելի է շտկել միայն փողոցային պայքարով: Նա հայտարարեց, որ մարտ-ապրիլ ամիսներին բոլորը պետք է լինեն փողոցում:

«Այս պահին այս ամբողջ հնարավորությունները կուտակվել են մեկ անձի ձեռքում, այդ անձի անունը Սերժ Սարգսյանն է: Նա նախաձեռնեց սահմանադրական բարեփոխումները, որպեսզի վարչապետի պաշտոնն իր համար դարձնի մատչելի եւ շարունակի ղեկավարել երկիրը: Մենք ունենք երկու թիրախ՝ Սերժ Սարգսյանն իր խմբակով եւ ավտորիտար համակարգը: Եթե մենք միասնաբար ցույց տանք մեր բռունցքը եւ քաղաքական հայտ ներկայացնենք, կտապալենք ավտորիտարիզմը եւ ժողովրդավար հայկական պետականություն կստեղծենք: Այդ հանրապետությունում այս շենքն իր այսօրվա գործառույթներով չպետք է գոյություն ունենա: Այն պետք է դառնա ժամանակակից արվեստի թանգարան: Սա է այն ճանապարհը, որով մենք պետք է գնանք: Դուք մեր ժամանակակից Բաստիլն եք, Ժամանակակից Բաստիլը պետք է վերանա»,- ասաց Փոստանջյանը եւ հայտարարեց, ԱԱԾ շենքի մոտից գնալու են Մյասնիկյանի արձանի մոտ:

Փոստանջյանը քաղաքացիներին առաջարկում է դուրս գալ փողոցներ, չգնալ որեւէ առաջնորդի հետեւից, այլ համախմբվել գաղափարի շուրջ, ինչպես 30 տարի առաջ Արցախյան շարժման ժամանակ էր:

«Դուք պետք է յուրաքանչյուրդ ձեր բակում առաջնորդեք ընդվզման շարժումը, որից հետո մենք պետք է հրավիրենք Ազգային ժողով եւ հայտարարենք, որ մենք՝ բոլորս, աշխարհի տարբեր ծայրերից, իրավունք ունենք մասնակցելու պետության կառավարմանը, ընտրելու եւ ընտրվելու»,- հայտարարեց Փոստանջյանը: Նա նաեւ հայտարարեց, որ վերջին շրջանում իրենք շրջել են Հայաստանի բոլոր մարզերում եւ առաջիկա երկու ամիսները իրենց համար շատ կարեւոր են, որովհետեւ պատրաստվում են Հայաստանի տարբեր կետերում միեւնույն օրն ու ժամին փողոցում հրդեհի օջախներ բռնկել, խոսքը փողոցային ակտիվ պայքարի օջախների մասին է: 

ԱԱԾ շենքի մոտ հայտարարությունից հետո ակցիայի մասնակիցները երթով շարժվեցին դեպի Գլխավոր դատախազություն եւ արդարադատության նախարարություն: Նախարարության շենքի մոտ ոստիկանները պատ կազմեցին, եւ թույլ չտվեցին, որպեսզի ցուցարարները մտնեն ներս:

Զարուհի Փոստանջյանը Արդարադատության շենքի մոտ կոչ արեց աշխատակիցներին գործադուլներ անել: Վերջինս հիշատակեց նաեւ Ժիրայր Սեֆիլյանի եւ Գեւորգ Սաֆարյանի անունները՝ որպես քաղբանտարկյալներ, եւ մեղադրեց դատախազությանն ու նախարարությանը՝ Սերժ Սարգսյանի կամակատարները լինելու մեջ:

Զարուհի Փոստանջյանը՝ Գլխավոր դատախազության մոտ

Ակցիայի մասնակիցները երթով ընթացան դեպի Մյասնիկյանի արձան, որտեղ Փոստանջյանը կրկին հայտարարությամբ հանդես եկավ: Նա ասաց, որ Մարտի 1-ի իրադարձությունների մեջ ոչ միայն Ռոբերտ Քոչարյանն է մեղավոր, այլ նաեւ Սերժ Սարգսյանն ու Լեւոն Տեր-Պետրոսյանը, եւ նրանց բոլորին է պետք հարցաքննել: Ցուցարարները ծաղիկներ դրեցին Մյասնիկյանի արձանի մոտ՝ ի հիշատակ Մարտի 1-ի տասը զոհերի: Մի խումբ քաղաքացիներ առանձին սպասում էին, որպեսզի «Երկիր Ծիրանի» կուսակցության կազմակերպած ակցիայի մասնակիցները գնան, որպեսզի իրենք էլ հարգանքի տուրք մատուցեն սպանվածներին, ծաղիկներ դնեն:

Ցուցարարները քայլերթով շարժվեցին դեպի Լեոյի փողոց, որտեղ, ինչպես նշեց Փոստանջյանը, եւս սպանություններ են եղել: Երթի մասնակիցները Լեոի փողոցի սկզբնամասի պատի վրա ծաղիկներ դրեցին, որտեղ էլ ավարտվեց ակցիան:

Նշենք, որ որեւէ այլ քաղաքական ուժ չմիացավ «Երկիր Ծիրանի» կուսակցության կազմակերպած ակցիային, իսկ ցուցարարների թիվը մոտ քսանհինգ էր:

 ՀայԱրփի Բաղդասարյան