Մի քայլ եւ Սերժ Սարգսյանի ելույթը վերածվում է Գյուլնազ տատի հերթական հեքիաթի

Ապրիլի 8-ին Արաբկիրի ոստիկանության բաժին են բերման ենթարկվել #Իմ քայլը նախաձեռնության անդամներ Մեսրոպ Պապիկյանն ու Նորայր Հայրապետյանը: Նրանց նկատմամբ կազմվել է վարչական իրավախախտման մասին արձանագրություն, նրանք ենթարկվել են վարչական տույժի: Պատճառն այն է, որ  նշված քաղաքացիները ապրիլի 13-ին նախատեսված հանրահավաքի իրազեկում են իրականացրել եւ ասֆալտի վրա #ԻմՔայլը գրությամբ գրաֆիտի են արել:

Թվում է՝ արտառոց ոչինչ չկա: Առաջին անգամ չէ: Ընդդիմության հրավիրած հանրահավաքի մասին իրազեկողներին նախկինում էլ են բերման ենթարկել, հանրահավաքի մասնակիցներին էլ...: Նույնիսկ բռնություն են կիրառել խաղաղ ցուցարարների նկատմամբ, անգամ կրակել ու սպանել են նրանց: Բայց պետք է հաշվի առնել, թե ինչ պայմաններում, ինչ իրավիճակում են բերման ենթարկել վերը նշված քաղաքացիներին:

Ինչ խոսք, աբսուրդ է այն ձեւակերպումը, թե ինչի հիման վրա են ոստիկանները բերման ենթարկել նրանց: «Համայնքին պատկանող գույքը վնասելու համար»: Այսինքն՝ ասֆալտին ներկով «փչված» գրառումը, որը մի քանի օր անց մարդկանց ոտքերի տակ մաշվելու է, համարվել է համայնքի գույք վնասել: Բայց այս պահին դա չէ էականը: Էականը նույնիսկ այն չէ, որ նույն այդ ոստիկանությունը երեւանի պատերին արված հազարավոր այլ գրառումներ նույնիսկ չեն նկատում եւ չկա մեկը, գեթ մեկը, որը բերման ենթարկված լինի այդպիսի արարքի համար եւ տույժի ենթարկված լինի:

Էականը ոստիկանության պահվածքն է: «Առհասարակ, քայլերթը, միտինգները, հանրահավաքները օրենքով սահմանված բողոքի ակցիաներ են, եւ դրանց արտառոց ձեւով չեմ վերաբերվում»,- մի քանի օր առաջ անդրադառնալով «Իմ քայլը» նախաձեռնությանը,  «Ազատություն» ռադիոկայանին տված հարցազրույցում քամահրական տոնով ասել էր ՀՀԿ խոսնակը՝ Էդուարդ Շարմազանովը: Այսինքն, դե քայլերթ են անում՝ թող անեն, վախենալու բան չկա...: Ու այդ հայտարարությունից մի քանի օր անց ՀՀԿ-ն ասպարեզ է հանում իր իշխանության պահպանման ամենածանրակշիռ լծակը՝ ոստիկանությանը: Այսինքն ՀՀԿ-ն սրանով մատնեց առաջիկա իրադարձություններից ունեցած իր վախերը:   

Բայց սա էլ չէ ամենաէականը: Ընդամենը 11 ամիս առաջ Սերժ Սարգսյանը մի, մեղմ ասած, ծավալուն ելույթ ունեցավ Ազգային ժողովում: Ելույթի կարմիր գիծն այն էր, որ նորացված Սահմանադրությամբ նոր Հայաստան է լինելու այսուհետ:  Իսկ այդ նոր Հայաստանը չպիտի լիներ այնպիսին, որ ասֆալտի վրա ընդդիմության հանրահավաքի իրազեկմանը վերաբերող գրաֆիտի անող երկու քաղաքացու բերման ենթարկեն, իսկ ամբողջ քաղաքի պատերին տասնյակ հազարավոր «անմեղ» գրառումներ կատարածներից ոչ մեկին չպատժեն: Այսինքն, Սերժ Սարգսյանի ասած նոր Հայաստանում պետք է լիներ օրենքի գերակայություն, օրենքի առաջ բոլորի հավասարության սկզբունք եւ այլն, եւ այսպես շարունակ:

Մի քանի մեջբերումներ՝ այդ ելույթից.

- «Սահմանադրական փոփոխությունների արդյունքում ստեղծել ենք սահմանադրական արդյունավետ հենք, որպեսզի մարդու իրավունքները լինեն սահմանադրորեն ճանաչված, օրենսդրորեն երաշխավորված, համարժեք կառուցակարգային լուծումներով ապահովված ու պաշտպանված։ Որպեսզի հարգվի ու երաշխավորվի օրենքի առջեւ բոլորի հավասարության սկզբունքը...»: 

- «2015 թվականի սահմանադրական բարեփոխումները նոր փուլ են իրավունքի գերակայության սկզբունքի հետեւողական կայացման եւ մարդու հիմնական իրավունքների ու ազատությունների երաշխավորման սահմանադրական կառուցակարգերի կատարելագործման ճանապարհին»:

- «Սահմանադրական փոփոխությունների արդյունքում ստեղծել ենք սահմանադրական արդյունավետ հենք, որպեսզի մարդու իրավունքները լինեն սահմանադրորեն ճանաչված, օրենսդրորեն երաշխավորված, համարժեք կառուցակարգային լուծումներով ապահովված ու պաշտպանված։ Որպեսզի հարգվի ու երաշխավորվի օրենքի առջեւ բոլորի հավասարության սկզբունքը»:

- «Սահմանադրական փոփոխությունների արդյունքում ստեղծել ենք սահմանադրական արդյունավետ հենք... Որպեսզի իրավունքներին ցանկացած միջամտություն եւ իշխանության ցանկացած գործողություն բխեն համաչափության սկզբունքից, որպեսզի իրավական վեճերը լուծվեն բացառապես իրավական ճանապարհով, արդյունավետ լուծման անհրաժեշտ կառուցակարգեր ունենան, որպեսզի արդարադատությունը լինի անկախ եւ անկողմնակալ»:

- «Արտաքին թշնամուց ոչ պակաս վտանգավոր է ներքին թշնամին: Ներքին թշնամին որոշակի մտածողությունն ու որոշակի երեւույթներ են: Այդ երեւույթներից ամենավտանգավորը, թերեւս, անարդարությունն է»:

- «Անարդարությունը ցանկացած պետության համար չարիք է, հիվանդություն, որը հյուծում ու թուլացնում է պետությունը, որը վերացնում է ապագայի նկատմամբ հավատը, թուլացնում է պետության նկատմամբ սերը, պետությունից վանում է իր հազարավոր զավակներին: Ուստի մենք այսօր, առավել քան երբեւէ, պայքարի մեկ այլ ճակատ ունենք, որտեղ հաղթանակը ոչ պակաս կարեւոր է: Մենք այսօր պատերազմի նոր փուլ ենք հայտարարում անարդարությանը»:

Եթե ՀՀ ոստիկանապետ Վովա Գասպարյանը չի լսել իր շեֆի ելույթը, դա վատ է: Եթե լսել է բայց իր ղեկավարած կառույցը անարդար է վարվել, օրենքի գերակայությունը չի պահպանել, անտեսել է օրենքի առաջ բոլորի հավասարության սկզբունքը, ապա դա էլ է վատ: Եթե Վովա Գասպարյանը լսել է, բայց Սերժ Սարգսյանի ելույթին վերաբերվել է ճիշտ այնպես, ինչպես շատ ու շատ այլք, այսինքն՝ որպես արդարության, օրենքի գերակայության մասին հերթական հեքիաթի, ապա դա լավ է. համենայնդեպս, Վովա Գասպարյանն ու իր ղեկավարած կառույցը շատ իրատեսական են ընկալում իրենց շեֆի ասածները ու ձեւեր չեն թափում: Այդպես գոնե կանխատեսելի են:

Ահա այսպես` ընդամենը երկու քաղաքացու բերման ենթարկելով, Սերժ Սարգսյանի մի հսկայական ելույթ շատ արագ վերածվեց Գյուլնազ տատի հերթական հեքիաթի: Եվ այդ տեսանկյունից ոստիկանության այդ գործողությունը ինչ- որ տեղ պետք է պատմական համարել: 

Տպագրվել է «Հայկական ժամանակ» օրաթերթի ապրիլի 11-ի համարում: