Դասագրքային թավշյա հեղափոխություն. սա թե՛ իշխանության եւ թե ընդդիմության շնորհքն է

Երեւանի Հանրապետության հրապարակում ապրիլի 23-ին տեղի ունեցած հանրահավաքը վերածվեց տոնախմբության: Ու դրան նպաստեց նաեւ այն, որ այդ օրը իրադարձությունները չափազանց արագ զարգացան: Նախ առավոտյան ազատ արձակվեցին ԱԺ պատգամավորներ Նիկոլ Փաշինյանը, Սասուն Միքայելյանը եւ Արարատ Միրզոյանը, իսկ շատ շուտով նաեւ հրաժարական ներկայացրեց Սերժ Սարգսյանը:

Ու այս ամենը՝ չնայած նրան, որ իշխանության քայլերը մինչ այդ բոլորովին չէին ակնարկում, որ դեպքերը նման զարգացումներ կստանային: Առավոտյան դեռ ոստիկանությունը անհնազանդության գործողությունների մասնակիցների դեմ գործողություններ էր անում: Խոչընդոտում էր փողոցները փակող երիտասարդներին, հարձակվում ու ուժ կիրառում նրանց նկատմամբ: Բժշկական համալսարանի մոտ դասադուլ ու ցույց անող ուսանողների նկատմամբ առանձնապես դաժան էին վարվել: Թվով ութ ոստիկաններ նույնիսկ հարձակվել ու ծեծի էին ենթարկել ուսանողներին միացած դասախոսներից մեկին, ջարդել ծնոտը:

Դրան զուգահեռ առավոտյան լուրեր արտահոսեցին, որ ձերբակալված պատգամավորներին մանդատներից զրկելուն նվիրված ԱԺ արտահերթ նիստը պետք է տեղի ունենար ժամը 15-ին: Այդպես նախատեսված է եղել: Իհարկե, ՀՀ ԱԺ լրատվության եւ հանրության հետ կապերի վարչության պետ Արսեն Բաբայանը չէր հաստատել դա, մեր թղթակցի հետ զրույցում ասելով՝ «Ես չունեմ այդպիսի տեղեկություն, իսկ արտահերթ նիստի մասին մամուլին եւ հանրությանը նախապես հայտնում ենք»: Բայց խոսքը այդպիսի նիստ այդ ժամին անելու քաղաքական որոշման մասին է, որը թերեւս այդպես էլ պաշտոնական փաստաթուղթ չդարձավ:

Կեսօրին մոտ նախագահական նստավայրում տեղի ունեցավ խորհրդակցություն, որին մասնակցում էին Սերժ Սարգսյանը, նախագահ Արմեն Սարգսյանը, առաջին փոխվարչապետ Կարեն Կարապետյանը եւ Լեռնային Ղարաբաղի նախագահ Բակո Սահակյանը։ Խորհրդակցությունից հետո Կարեն Կարապետյանը հայտարարեց, որ  ինքը դիմելու է գլխավոր դատախազին, որպեսզի Ազգային ժողովից հետ կանչվի երեք պատգամավորների կալանքի միջնորդությունը։ Հենց այդ պահից սկսած ամեն ինչ կտրուկ փոխվեց՝ ժամանակ անց հայտնի դարձավ որ նախօրեին ձերբակալված պատգամավորները ազատ են արձակվել եւ ուղեւորվում են դեպի Հանրապետության հրապարակ: Երեւանի փողոցներում ոստիկանությունը «ետ քաշվեց», քաղաքը անցավ ցուցարարների տրամադրության տակ:

Շուտով տարածվեց բաղձալի տեղեկությունը՝ Սերժ Սարգսյանը հրաժարական է տվել: Իհարկե այդ պահին շատ քչերին հետաքրքրեց հրաժարականի տեքստը, քանի որ այն շատ անսպասելի էր: Բայց անսպասելի էր նաեւ հրաժարականի տեքստը: Առանց չարության, առանց քենի, առանց որակումների...: Հավասարակշռված, զուսպ հայտարարություն: «Սիրելի՛ հայրենակիցներ,

Դիմում եմ Հայաստանի Հանրապետության բոլոր քաղաքացիներին, մեծերին ու իմ սիրելի երիտասարդներին, կանանց ու տղամարդկանց,

դիմում եմ փողոցներում «Մերժիր Սերժին» կոչով օր ու գիշեր կանգնածներին եւ փակ փողոցներով այս օրերին դժվարությամբ աշխատավայր հասնող եւ իրենց պարտքն անտրտում իրականացողներին,

դիմում եմ ուղիղ եթերի առաջ օրերով գամվածներին եւ օր ու գիշեր հասարակական անվտանգությունը տղամարդու պես ապահովողներին,

դիմում եմ սահմանին կանգնած մեր քաջարի զինվորներին ու սպաներին, դիմում եմ իմ զինակից ընկերներին,

դիմում եմ իմ կուսակից ընկերներին, քաղաքական բոլոր ուժերին եւ գործիչներին։

Որպես երկրի ղեկավար դիմում եմ վերջին անգամ։

Նիկոլ Փաշինյանը ճիշտ էր։ Ես սխալվեցի։ Ստեղծված իրավիճակն ունի մի քանի լուծում, բայց դրանցից ոչ մեկին ես չեմ գնա։ Դա իմը չէ։ Ես թողնում եմ երկրի ղեկավարի` Հայաստանի վարչապետի պաշտոնը։

Փողոցի շարժումն իմ պաշտոնավարման դեմ է։ Ես կատարում եմ ձեր պահանջը։

Խաղաղություն, ներդաշնակություն եւ տրամաբանություն մեր երկրին:

Շնորհակալ եմ»,- ասված էր հայտարարության մեջ: Այս հայտարարությունը ամբողջությամբ տեղավորվում է թավշյա ու անցնցում հեղափոխության տրամաբանության մեջ:

Երեկոյան հանրահավաքում հարթակից հնչած ելույթները թավշյա հեղափոխության ոգուն ու տառին համապատասխան էին: Նիկոլ Փաշինյանը հատուկ ընդգծեց, որ վենդետաներ չեն լինելու: «ՀՀ-ում երկար տարիներ եղել է ատելության մթնոլորտ, ես ուզում եմ եւս մեկ անգամ մենք արձանագրենք, որ Հայաստանում ատելության մթնոլորտի էջը փակված է, ներքաղաքական ներհասարակական կյանքում ատելության մթնոլորտը պետք է բացառել: եվ ես ուզում եմ դիմել բոլոր նրանց, ովքեր մտածում են, թե այս հեղափոխությունը թշնամանք է իրենց նկատմամբ, ուզում եմ դիմել բոլոր նրանց, ովքեր ճամպրուկներն են հավաքում, բոլոր այն գործարարներին, ովքեր անհանգիստ են այս գործընթացի հետ կապված ու մտածում են, թե սկսվելու է վրեժխնդրություն ու մտածում են հեռանալ երկրից, հարգելինե՛րս, մի արեք դա, որովհետեւ վենդետա չի լինելու, ատելություն չի լինելու, ՀՀ-ում այս պահից սկսած հաստատվելու է ազատության, եղբայրության, օրինականության եւ ազգային միասնության մթնոլորտ»,- հայտարարեց Փաշինյանը:

Այն, ինչ երեկ տեղի ունեցավ Հայաստանում, անկասկած տեղ կգտնի պատմության եւ քաղաքագիտության դասագրքերում: Սա դասական, թավշյա հեղափոխություն է, որին մասնակից չեն այլ երկրներ ու կասկածելի շահեր: Հեղափոխություն առանց զոհերի ու նվազագույն ներքաղաքական ցնցումների: Եվ արդեն իսկ կարելի է արձանագրել, որ դա թե իշխանության, եւ թե ընդդիմության շնորհքն է: 

Այսօր ապրիլի 24-ն է, եւ ինչպես հայտարարեց Փաշինյանը, եթե արտառոց ոչինչ տեղի չունենա, ապա այսօրվա միջոցառումները նվիրվելու է ցեղասպանության զոհերի հիշատակին: «Այս հաղթանակով մենք մեր մեծագույն հարգանքի տուրքն ենք մատուցել Ապրիլի 24-ի զոհերի հիշատակին, ցեղասպանությունն այլեւս անցյալ է, որովհետեւ մենք հաղթած, հաղթող ժողովուրդ ենք»,- հայտարարեց Նիկոլ Փաշինյանը եւ ասաց, որ ժամը 15-ին Հանրապետության հրապարակից երթով շարժվելու են դեպի Ծիծեռնակաբերդ:

Տպագրվել է «Հայկական ժամանակ» օրաթերթի ապրիլի 24-ի համարում: