ՀՀԿ-ից հրաժարվեմ եւ աշխատեմ, կհարգե՞ք. Արամյանը՝ Փաշինյանի կառավարությունում լինելու մասին

«Իմ խորին հարգանքը մեր հասարակության յուրաքանչյուր անդամի վերաբերյալ, բայց ՀՀ վարչապետի պաշտոնակատարը հայտարարություն արել է, ասել է, որ պայմանավորվածությունները վերածվել են ուլտիմատումների, այդ պատճառով էլ չեն կայացել: Ավելին ես չեմ կարող հայտարարություն անել»,- այսօր լրագրողների հետ զրույցում ասաց ֆինանսների նախարարի պաշտոնակատար Վարդան Արամյանը՝ պատասխանելով հարցին, թե ինչու բանակցությունները չկայացան Նիկոլ Փաշինյանի ու Կարեն Կարապետյանի միջեւ:

Ինչ վերաբերում է լուրերին, թե բանակցությունները չկայացան, քանի որ ռուսաստանաբնակ հայ գործարար Սամվել Կարապետյանն է ցանկանում, որ Կարապետյանը լինի վարչապետ, նախարարի պաշտոնակատարը հավելեց, որ համաշխարհային փորձը ցույց է տալիս, որ նման դեպքերում ծնվում են տարբեր տեսակի վարկածներ:

«Մենք պետք է ցանկացած տեղեկատվության շատ զգույշ վերաբերվենք, դրանք շատ վտանգավոր են, քանի որ ազգաբնակչության մեջ կարող են շփոթ առաջացնել, ինչը շատ վատ է, դա նշանակում է, որ չկա կարգապահական վարկանիշ»,- նկատեց նա:

Վարդան Արամյանն ընդգծեց, որ լավագույն լուծումը կառուցողական երկխոսության մեջ է:

«Եթե ուզում ենք իրավական պետություն ստեղծել, պետք է ձեռքներս դնենք օրենքի վրա ու այդպես առաջ տանենք, եթե մեկ անգամ օրենքի խախտում լինի»,- նշեց նա:

Վարդան Արամյանը նաեւ հավելեց, որ տեղեկություն չունի, թե երկրում մտադրություն կար արտակարգ դրություն հայտարարել: Նա հավելեց, որ Սերժ Սարգսյանի հրաժարականի քայլը ներդրողների կողմից դրական է ընկալվել, այսինքն՝ ընկալվել է, որ ՀՀ-ն գնում է այնպիսի ճանապարհով, որը կառուցողական է, որը չեղավ օրինակ՝ Ուկրաինայի դեպքում:

Հարցին՝ արդյո՞ք կաշխատի Նիկոլ Փաշինյանի կառավարությունում, Արամյանը պատասխանեց.

«Եթե ես ձեզ հիմա ասեմ, որ գիտեք ինչ, ես հիմա հրաժարվելու եմ ՀՀԿ-ից եւ աշխատելու եմ, դուք կհարգե՞ք»: Ինչ վերաբերում է դիտարկմանը, թե արդյո՞ք չի կարող մնալ եւ աշխատել երկրի համար նաեւ ԵԼՔ-ի թիմում, նա ասաց, որ այդ դեպքում պետք է ԵԼՔ անդամ լիներ: