Սփյուռքահայ գործարարի կոչը՝ դաշնակցական իր ընկերներին. սա լուսավոր ապագայի պայքար է

Սփյուռքահայ գործարարներից մեկը կոչով դիմել է իր կուսակից ընկերներին՝ Դաշնակցությանը, նրա նամակը տպագրվել է «Ասբարեզ»-ում:

Պատմական եւ ճակատարգրական այս օրերին, մեզանից յուրաքանչյուրի միտքն ու հոգին ողողված են փոթորկալի մտածումներով:

Յուրաքանչյուր հայ, իր հայացքը սեւեռած դեպի հայրենիք՝ ուշի ուշով հետեւում է տեղի ունեցած վերիվայրումներին եւ աճող պայքարին: Պայքար, որ ամեն օր երկիրը անկայուն եւ վտանգավոր մթնոլորտի մատնելու կողքին՝ հույսի անզուգական նշույլներ է արձակում մեր հոգիներից ներս: Թեեւ Ապրիլ 24-ի նախօրյակին տեղի ունեցած զարգացումները որոշ չափով հանգստացրեցին մեզ, սակայն այդ հանգստությունը մնում է անկայուն եւ երկիրը շարունակում է ապրել իր տագնապալի օրերը:

Փառք ու պատիվ մեր գիտակից ժողովուրդին եւ հատկապես երիտասարդությանը, որ ամենայն ծանրախոհությամբ, «բաց ձեռքերով» եւ խաղաղությունը պահելու վճռակամությամբ շարունակում է իր արդար պահանջատիրական երթը: Ինչպես նաեւ փառք բոլո՛ր նրանց, որոնք շրջահայաց մոտեցումով, ականջալուր եղան ժողովուրդի պահանջներին եւ փորձում են որեւէ անթույլատրելի եւ աղետալի պատահարների զերծ պահել:

Մեզանից յուրաքանչյուրին ծանոթ են մեր երկրի իրավիճակը եւ այդ իրավիճակի պատասխանատուներն ու դերակատարները: Կասկածից վեր է, որ այդ դերակատարները՝ լինեն իշխանություն, կազմակերպություն, կուսակցություն կամ անհատներ, լավատեղյակ են իրենց ունեցած դերից՝ երկիրն ու ժողովուրդը այս ճգնաժամային կացության մատնելուն: Անվիճելի իրականություն է, որ վերջին երկու տասնամեակներում, հայրենի իշխանությունները ձախողեցին ժողովրդի համար համեստ եւ արժանապատիվ կյանք ապրելու կենսունակ պայմաններ ապահովել:

Տարիներ շարունակ, իշխանություններն ու  նրանց լծակները անտեսեցին եւ արհամարհեցին մեր ժողովրդի ազատ եւ արժանապատությամբ ապրելու իրավունքը: Այս ճշմարտությունը փաստելը անհեթեթ է այս պահին: Իրողությունն այն է, որ այսօր ազգովի գտնվում ենք այնպիսի՛ թնջուկի առաջ, որի լուծումը բավական բարդ է եւ կնճռոտ:

Պայքարը լուրջ եւ անկյունադարձային է: Պայքար, որի հիմնական շարժառիթը քաղակաքան լինելուց բացի,  ունի բարոյական, ընկերային, տնտեսական եւ կենցաղային բնույթ: Երիտասարդությունը, արհամարհելով սպառնալիքներն ու բռնակալությունները՝ շարունակում է իր երթը՝ բարձրաձայն գոչելով.

– Վե՛րջ անարդարությանը

– Վե՛րջ կողոպուտին

– Վե՛րջ կաշառակերությանը

– Վե՛րջ աղքատությանը

– Վե՛րջ արտագաղթին

– Եւ՝ վե՛րջ անհույս ապրելակերպին:

Այս պայքարը Նիկոլի պայքարը չէ՛: Այս պայքարը ճնշված ժողովուրդի անհանդուրժելի իրավիճակի հրամայակա՛նն է: Հույս ներշնչելու պայքար է։ Իշխանության հանդեպ հավատք եւ վստահություն վերականգնելու պայքար է: Եւ վերջապես, հայրենիքին ու գալիք սերունդներին լուսավոր եւ բարգավաճ ապագա ապահովելու պայքար է:

Սերժի եւ Սերժերի հրաժարականով չէ՛ որ այս պայքարը հաջողութեամբ պիտի պսակվի: Այդ կենսական քայլն  անելով հանդերձ, այն բավարար չէ՛, եւ պետք էլ չէ, որ լինի: Այս երթի ամբողջական հաղթանակը միայն ու միայն կարելի է ապահովել հիմնական ու արմատական փոփոխություններով՝ ընկերական, կենցաղավարական եւ քաղաքական մշակույթի ոլորտներից ներս: Իշխանության մեջ կատարվելիք փոփոխությունները անխուսափելի են, հրամայական եւ անահապա՛ղ: Սակայն, դրա հետ միատեղ, ժողովուրդը կենսական փոփոխություններ ունի անելու: Անհրաժեշտ է ձերբազատվել ստրկության հոգեբանությունից:

Պետք է հանձնառու լինել օրենքի պահպանմանը եւ գործադրմանը: Կաշառքներ ստանալով՝ անկախություն չի՛ կերտցի: Երկրի օրենքները խախտելով եւ երկիրը կողոպտելով՝ անկախություն չի՛ պահպանվի:

Այսօր, խոհեմությունը, հանդուրժողությունը եւ հավասարակշռված դատողությունը ավելի անհրաժեշտ են, քան երբեք: Ատելության, ոխի ու վրեժխնդրության զգացումները տեղ չեն կարող ունենալ մեր այսօրվա իրականության մեջ։ Պետք է զգույշ լինել արտաքին երկիրների միջամտություններից եւ զերծ մնալ անձնական շահեր հետապնդելուց: Այլ դեպքում՝ թատերախաղը կը մնա նույնը, եւ միայն դերասաններն են փոխվելու: Սերժին կփոխարինեն նոր Սերժեր, Նիկոլին ՝ նոր Նիկոլներ, եւ ապականած իշխանության տեղ՝ նույնանման իշխանություններ։

Ապրիլ 23-ի հաղթանակը լոկ խորհրդանշական հաղթանակի սահմանների մեջ կմնա, եթե չհաջորդի  շոշափելի դրական առաջընթացն ու արմատական փոփոխությունները: Սույն հաղթանակը իբրեւ հիմք պետք է ծառայի՝ վերջ դնելու անարդարությանը, կողոպուտին, կաշառակերությանը, աղքատությանը եւ արտագաղթին: Ապրիլ 24-ի նախօրյակին ձեռք բերված հաղթանակը թող ծառայի  իբրեւ յույսի աղբյուր եւ իբրեւ փարոս՝ գալիք պանծալի ապագային: Թող այն լինի երիտասարդության կողմից աղաղակված «անկախության եւ արդարության» կանչը՝ ողջ հայության: Կոչ, որը պետք է վերածվի իրականության՝ ի փառս հայրենիքի: 

25 Ապրիլի, 2018