Սերն առ աթոռ. ՀՀԿ-ի քաղաքապետերի միտինգներն ու բեմադրությունները (տեսանյութ)

Թավշյա հեղափոխության շնորհիվ բարձրագույն իշխանության ներկայացուցիչները «զենքերը» վայր դրեցին եւ գիտակցեցին, որ երկրում չունեն իշխանություն: Հայաստանում բռնապետի սիմվոլ դարձած Սերժ Սարգսյանի հրաժարականը, տարբեր տրամաչափի ՀՀԿ-ականների համար, սակայն, կարծես թե իրողություն չէ: Մասնավորապես, Երեւանի ՀՀԿ-ական քաղաքապետ Տարոն Մարգարյանը, որը վերընտրվել է ռեժիմի կիրառած մեխանիզմների արդյունքում, հրաժարական տալ չի ցանկանում: Կառավարության մայիսի 17-ի նիստից հետո երկրի ղեկավար Նիկոլ Փաշինյանը, պատասխանելով լրագրողի հարցին, թե ի՞նչ կարծիք ունի Մարգարյանի հրաժարականի պահանջի մասին, հստակ հայտարարեց, որ Երեւանի ղեկավարը կեղծիքների արդյունքում է ընտրվել:

«Երեւանի քաղաքապետի ընտրությունների վերաբերյալ ես իմ գնահատականները տվել եմ, Տարոն Մարգարյանն ընտրվել է ընտրակեղծիքների միջոցով»,- ասել էր Փաշինյանը:

Տարոն Մարգարյանը կարծես թե չի ցանկանում այս հանգամանքը հաշվի առնել եւ հայտարարում է, որ իր օրակարգում հրաժարականի հարց չկա: Դիտարկմանը, թե երկրի ղեկավարն է խոսում իր՝ ընտրակեղծիքներով ընտրվելու մասին, Մարգարյանն արձագանքեց.

«Ես դեռ մեկ տարի առաջ եմ արձագանքել այդ խոսակցություններին»,- նշեց նա:

«Հայկական ժամանակ»-ի հարցին՝ քաղաքական իրավիճակի փոփոխությունը բավարար չէ՞ որ նա հրաժարական տա, քաղաքապետը պատասխանեց. «Ես այդ կարծիքին չեմ, տեղական ինքնակառավարման մարմինն անկախ կառույց է, ընտրովի մարմին է եւ տեսնում եք, որ մենք մեր աշխատանքներն ենք իրականացնում»: Մարգարյանը վստահ է, որ նոր կառավարության հետ աշխատանքը ստացվելու է արդյունավետ:

Համաժողովրդական շարժման օրերին Ավան վարչական շրջանում խաղաղ ցուցարարների վրա անհայտ անձինք հարձակվեցին եւ ծեծի ենթարկեցին երիտասարդներին: Հետաքննող լրագրողները պարզեցին, որ այդ անձանց հիմնական մասն աշխատում են Ավանի թաղապետարանում եւ ծեծուջարդը կազմակերպել են Տարոն Մարգարյանի ցուցումով: ՀԺ-ի հարցին՝ ինչո՞ւ է կանգնած նման «բանդայի» հետեւում, Մարգարյանը պատասխանեց.

«Ես դատապարտում եմ բոլոր բռնությունները եւ իրավապահները զբաղվում են դրանով, կբացահայտեն»: Իսկ հարցապնդմանը, որ այդ նույն անձինք իրեն աջակցում էին այս օրերին, Տարոն Մարգարյանը նշեց. «Ես այդ կարծիքին չեմ: Նրանք երեւանցիներ էին եւ իրենց քվեն էին տվել մեկ տարի առաջ, այժմ եկել էին իրենց քվեն պաշտպանելու»:

Տարոն Մարգարյանի անունը կապվում է մի շարք սկանդալային միջադեպերի հետ: Նախ՝ վարչապետը հայտարարում է, որ նա ընտրակեղծիքներով է ընտրված, հետո պարզվում է, որ «բանդա» է հովանավորում: Մեծ աղմուկ բարձրացրեց նաեւ բացահայտումը, որ Երեւանի քաղաքապետարանը համայնքային բյուջեի միջոցներից 100 հազար դրամով կոնյակի բաժակներ է գնել: Մեր դիտարկմանը՝ եթե այս սկանդալներում ներգրավված չէ, ինչո՞ւ քայլեր չի ձեռնարկում, որ իր անունը «մաքրի», Մարգարյանը նկատեց, որ աշխատելով է իր արդարությունը ցույց տալիս:

«Մի քանի տարի շարունակ որոշ պիտակավորումներ փորձել են իրականացնել, բայց բոլորս տեսնում ենք, որ Երեւանը ծաղկում է: Մենք ունենք ժառանգած պրոբլեմներ, որոնք լուծում ենք»,- ասաց նա:

Երեւանի քաղաքապետ Տարոն Մարգարյանն արդեն իսկ հակաքայլերի է անցել՝ ընդդեմ իր հրաժարականը պահանջողների: Տեղեկություններ կան, որ դպրոցների, մանկապարտեզների, բուժհիմնարկների, համատիրությունների եւ վարչական շրջանների թաղապետարանների աշխատակիցներին ցուցակագրել են՝ ցանկացած պահի փողոց դուրս հանելու եւ «Տարոնը մեր քաղաքապետն է» A4 ֆորմատի պաստառներ գլխավերեւներում պահելու համար: Անգամ հերթապահություն է սահմանված, թե որ կառույցների աշխատակիցները, ըստ անհրաժեշտության, երբ են դուրս գալու եւ երբ են միմյանց հերթափոխելու: Նրանք նաեւ տեղեկատվական քարոզարշավ են պլանավորել ֆեյսբուքյան կեղծ էջերի միջոցով:

Տարոն Մարգարյանը ՀԺ-ի հարցին ի պատասխան բացառեց, որ Գյումրու քաղաքապետարանում տեղի ունեցած շոուի սցենարով մեկ բեմադրություն էլ Երեւանի քաղաքապետարանում կցուցադրվի: Սակայն տեսանելի է, որ նա իր ենթակայության տակ գտնվող կառույցների աշխատակիցներին օգտագործում է իր անձնական շահերի համար:

Տարոն Մարգարյանից զատ, իր սեփական աթոռը երեկ ապահովագրեց նաեւ Գյումրու քաղաքապետ Սամվել Բալասանյանը: Քաղաքական ճամբարների գրեթե բոլոր մայրուղիներով երթեւեկած, ՕԵԿ-ԲՀԿ-ՀՀԿ տարբերանշաններով դակված Սամվել Բալասանյանի սցենարով, ավագանու կազմի իր ենթակաները իրեն անվստահություն հայտնեցին: Հետո նրանք դեմ եղան, որ նա լքի քաղաքապետի պաշտոնը եւ այսպիսով՝ մեկ տարի շարունակ Բալասանյանին ոչ ոք չի կարող անվստահություն հայտնել: