Ունաի Էմերին կնշանակվի «Արսենալի» մարզիչ. երկրպագուները դժգոհ են

Մոտ օրերս «Արսենալը» կհայտարարի Ունաի Էմերիին գլխավոր մարզչի պաշտոնում նշանակելու մասին: Այս հարցում վստահ են բրիտանական լրատվամիջոցները: Մինչեւ վերջերս բոլորը գրեթե համոզված էին, որ Արսեն Վենգերին փոխարինողը լինելու է թիմի նախկին ֆուտբոլիստ Միկել Արտետան, որը հիմա «Մանչեստեր Սիթիի» գլխավոր մարզիչ Պեպ Գվարդիոլայի օգնականն է:

Նշվում էր, որ Արտետան ակումբի հետ արդեն համաձայնության է եկել: Նրա հեռանալուն դեմ չէր Գվարդիոլան, Վենգերն էլ ողջունել էր նրա տարբերակը: «Արսենալի» ղեկավարությունը, սակայն կտրուկ որոշում կայացրեց՝ ուշադրությունը սեւեռելով ՊՍԺ-ի նախկին մարզչի վրա: Պատճառ, ըստ ԶԼՄ-ների, այն է, որ նա Արտետայից ավելի փորձառու է:

Մարզչական փորձի առումով Արտետան իսկապես չի կարող համեմատվել Էմերիի հետ: 2016 թվականից է մարզչությամբ զբաղվում. «Արսենալում» ֆուտբոլային կարիերան ավարտելուց հետո ընդգրկվել է Գվարդիոլայի մարզչական շտաբում: Իսկ ահա Էմերին մեծ փորձ ու բազմաթիվ տիտղոսներ ունի:

Նրա գլխավորությամբ իսպանական «Սեւիլիան» 3 տարի անընդմեջ դարձել է Եվրոպա լիգայի գավաթակիր: Վերջին 2 մրցաշրջանի ընթացքում մարզում էր ՊՍԺ-ն: Ավարտված մրցաշրջանում թիմի հետ դարձել է Ֆրանսիայի չեմպիոն, 2-ական անգամ նվաճել է Ֆրանսիայի գավաթը, Ֆրանսիայի լիգայի գավաթը, երկրի սուպերգավաթը:

Սակայն այսքան տիտղոսներով էլ ակումբի նախագահ Նասեր ալ-Խելաիֆիին նա չգոհացրեց: Վերջինս մեծ ներդրումներ է անում թիմում, ռեկորդային գումարներով աստղային ֆուտբոլիստներ է գնում եւ ուզում է, որ ՊՍԺ-ն հաջողության հասնի ոչ միայն երկրի ներսում, այլեւ Եվրոպայում:

Իսկ միջազգային ասպարեզում փարիզցիների գործերն Էմերիի ղեկավարությամբ առաջ չգնացին: 2 տարի նրանց պայքարից դուրս թողեցին իսպանական գրանդերը: Անցած մրցաշրջանում 1/8 եզրափակչի առաջին խաղում «Բարսելոնային» 4:0 հաղթելուց հետո պատասխան խաղում պարտվեցին 6:1 եւ դուրս մնացին հետագա պայքարից: Այս մրցաշրջանի 1/8 եզրափակչում էլ ճանապարհը զիջեցին մրցաշարի վերջին 2 տարիների չեմպիոն «Ռեալին»: Նախ պարտվեցին 1:3, ապա պատասխան խաղում՝ 1:2: Սա վերջին կաթիլն էր Նասեր ալ-Խելաիֆիի համար, եւ նա նոր մարզիչ գտավ՝ Թոմաս Տուխելը:

Հիմա Էմերին պետք է փորձի անգլիական ու եվրոպական ֆուտբոլային էլիտա վերադարձնել «Արսենալին»: Թեեւ նրա տիտղոսները շատ բանի մասին են խոսում, նա էլ հայտնի է որպես բծախնդիր մասնագետ, որը երկար ճանապարհ է անցել որպես մարզիչ, կասկածները նրա նշանակման վերաբերյալ շատ են: Էմերիի անունը լսելուց հետո «զինագործների» բազմաթիվ երկրպագուներ զայրացել են: «Այս ակումբի վերջը եկավ»,- գրել է նրանցից մեկը:

Դժգոհությունների հիմնական պատճառներից մեկն այն է, որ Էմերիի թիմերը կարգապահ չեն: Այդպես է եղել թե «Վալենսիայում» եւ թե ՊՍԺ-ում: Լրատվամիջոցները գրում են, որ նրա խաղացողներին հաճախ կարելի է տեսնել գիշերային ակումբներում, անկախ առաջիկա հանդիպման կարեւորությունից, նրանք կարող են երեկույթներ կազմակերպել, ուշանալ մարզումներից եւ այլն:  

«Արսենալի» երկրպագուների դժկամությունը պայմանավորված է նաեւ նրանով, որ Վենգերի հեռանալուց հետո նրանք աստղային մարզիչ էին ուզում: Ավելի վաղ շրջանառվում էին Մասիմիլիանո Ալեգրիի, Կարլո Անչելոտիի, Լուիս Էնրիկեի անունները: Ի վերջո, կարծես հաստատ դարձավ Արտետայի նշանակումը, իսկ հիմա էլ՝ վերջին պահին Էմերի:

Ըստ բրիտանական ԶԼՄ-ների՝ Էմերիի հետ պայմանագրի մասին «Արսենալը» կհայտնի այսօր՝ մայիսի 22-ին, կամ վաղը: Ամեն դեպքում հայտնի է, որ ակումբն ուզում է նոր մարզիչ ունենալ մինչեւ աշխարհի 2018 թ. առաջնության մեկնարկը: