Ամիրյանի խոստումն ու Մնջախաղի թատրոնի շենք ունենալը մնաց օդում կախված

Երեւանի Մնջախաղի պետական թատրոնը 43 տարվա անհասցե դեգերումներից հետո հիմնական հասցե ու շենք պետք է ունենար, սակայն, կարծես թե, այդքան մոտ թվացող հաջողությունը կրկին հարցականի տակ է: Թատրոնը պետք է լիներ Գեւորգ Քոչար 21 հասցեում՝ Հայաստանի Ազգային գրապալատի տարածքում:

Մշակույթի նախկին նախարար Արմեն Ամիրյանի խոսքերով՝ այս տարվա մայիս ամսից պետք է սկսվեին թատրոնի շինարարական աշխատանքները եւ ավարտվեին հաջորդ՝ 2019 թվականի մայիս ամսին: ՀԺ-ն շենքի շինարարական աշխատանքների եւ այլ մանրամասների մասին հետաքրքրվեց թատրոնի գեղարվեստական ղեկավար Ժիրայր Դադասյանից:

- Պարոն Դադասյան, 20 տարուց ավելի է՝ բարձրաձայնում եք Մնջախաղի թատրոնի շենքի հարցը, երբ վերջապես մշակույթի նախկին նախարարի կողմից հարցին լուծում պետք է տրվեր, նախարար փոխվեց, կադրային փոփոխություններ եղան: Ի՞նչ է լինելու հիմա:

- Խնդիրներ են առաջացել, որոնք հիմա ընթացքի մեջ են: Այդ խնդիրները լուծելուց հետո նոր հնարավոր կլինի շինարարական մրցույթ հայտարարել: Խնդիրն այն է, որ այգու կողմից պետք է նոր մուտք բացվի եւ, ըստ էության, այնտեղ էլ հողահատկացում արվի, իսկ այդ տարածքում կան հարևաններ, որոնք այդ հողի վրա սեփականություն ունեն: Նույնիսկ այն խոտածածկույթը, որ կա շենքի դիմաց, չգիտես ինչի, դարձել է իրենց սեփականությունը, որը շատ զարմանալի է, շենքից 4 մետր հեռավորության վրայի հողն էլ է իրենց պատկանում: Մեր նախագիծը մի մասով հայտնվել է այդ հողի վրա: Այդտեղից էլ խնդիր է առաջացել, որ պիտի նոր պրոյեկտ արվի, իսկ այդ դեպքում մեր նախագծով ավելի շատ տարածք ենք զբաղեցնում, որն էլ խնդիր է առաջացրել: Այս պահին չեմ կարող ասել, թե ինչ կլինի, կամ շինարարություն չի ընթանա, կամ էլ այլ լուծումներ պետք է գտնել: Նախագիծը ավարտված է, բայց խնդիրը հողի հարցն է, որը պետք է համաձայնեցվի նաև քաղաքապետարանում:

- Իսկ ովքե՞ր են մյուս սեփականատերերը, որ բողոքում են, համաձայնեցնելու տարբերակներ չկա՞ն:

- Ես լավ տեղյակ չեմ, բայց գիտեմ, որ նախկին տպարանի շենքն է: Պատուհանները կոտրված, լքված վիճակ է՝ հիմնականում չօգտագործվող տարածք: Տարբերակներ կան, ենթադրենք քաղաքապետարանը կարող է առաջարկել տվյալ սեփականատիրոջը մեկ այլ ձևով փոխհատուցել, օրինակ հատկացնել 22 քառակուսի մետր տարածք, ճիշտ այնքան, որքան մեր նախագիծն է նստել իրենց հողի հաշվին: Արդյունքում մեր պրոյեկտը կպահպանենք: Սակայն իրենք դրան էլ են դեմ, դեմ եմ, որ փոքրիկ շինություն է կառուցվում եւ որոշակիորեն փակում է իրենց պատուհանների դիմաց: Ամենակարևոր խնդիրը, հենաշարժական խնդիրներ ունեցող հանդիսատեսն է, որի համար մենք նախատեսել ենք հատուկ վերելակներ, իսկ այս դեպքում հնարավոր չի լինում իրականացնել:

- Քաղաքապետարան դիմե՞լ եք:

- Քաղաքաշինության նախարարությունն է ձեռնարկել, իրենք դիմել են՝ պարզվել է, որ հողի խնդիր կա: Հիմա պետք է բանակցենք սեփականատերերի հետ, փորձենք ելքեր գտնել. բարդ իրավիճակ է ստեղծվել: Շինարարական աշխատանքները սկսել էինք անցած տարվա օգոստոսի մեկից: Շինկազմակերպությունների հայտարարությունը, որ տրված էր, նախագծերի աշխատանքների վրա մենք աշխատեցինք կես տարուց ավելի, բայց ապարդյուն:

- Նախագիծը ներկայացնելու ժամանակ, երբ նախկին նախարար Արմեն Ամիրյանի հետ ներկայացրեցիք գծագիրը, այդ ժամանակ, կարծես թե, նման խնդրի մասին խոսք չգնաց: Շինարարության մի փուլն էլ մայիս ամսին պետք է ավարտվեր:

- Դա նախարարն էր ասում, հավանաբար իրենք ինչ-որ ելքեր գիտեին, բայց, այո, իր հայտարարությունն էր, որ 2019 թվականի մայիսին էլ պետք է ավարտվեր: Այդ առումով արդեն «իմունիտետ» ենք ձեռք բերել, մենք էլի կդիմանանք, մինչև տեսնենք՝ ինչ է լինում, մանավանդ, որ մենք մեր աշխատանքները չեն կանգնեցնում: Հիմա էլ պատրաստվում ենք Ռուսաստանում փառատոնի մասնակցել, մենք մեր ստեղծագործական պրոցեսը ապահովում ենք:

- Նոր նախարարի հետ դեռ չե՞ք հանդիպել:

- Ցավոք, դեռ չենք հանդիպել: Անկեղծ ասած, դեռ չեմ էլ նախաձեռնելու նման հանդիպում, որովհետև տեսնում եմ, թե ինչ զբաղվածություն ունի նախարարը՝ տարբեր հանդիպումների մեջ է, տարբեր քննարկումների, կարծում եմ, որ երբ հերթը մեզ հասնի, արդեն մանրակրկիտ անդրադարձ կլինի:

- Նախարարությունն ինչքա՞ն գումար էր խոստացել տրամադրել շենքի կառուցապատման համար:

- Ես կարող եմ ասել այն, ինչ-որ ասել էր նախկին նախարար Արմեն Ամիրյանը, իսկ նա ասել էր, որ այս տարի պետք է տրամադրվի 60 միլիոն դրամ, որպեսզի անցկացվի մրցույթ եւ կատարվեն շինարարական աշխատանքներ: Իսկ հաջորդ՝ 2019 թվականի բյուջեով նախատեսված էր եւս 200 միլիոն դրամ, որպեսզի ավարտին հասցվի շինարարությունը: Բայց մի քիչ անորոշ վիճակ է, ես նույնիսկ փորձ էի արել հանդիպել քաղաքապետի հետ, որպեսզի քննարկեինք խնդիրը, ինձ տեղեկացրին, որ քաղաքապետը խնդրից տեղյակ է: Քանի որ վերջին շրջանում փոփոխություններ տեղի ունեցան, հանդիպումը քաղաքապետ Տարոն Մարգարյանի հետ տեղի չունեցավ: Հիմա մտածում եմ, որ ավելի լավ է թողնել պետական մակարդակով խնդիրները լուծվեն: Հույս ունեմ, որ մեր հասանելիքը, այսինքն, Մնջախաղի թատրոնի շենքը, որը պետք է ունենայինք օրենքով, մեզ կտրամադրեն՝ առանց մասնավոր միջամտությունների: