Ջրօգտագործողների ընկերությունը պատկանում էր Աբրահամյանին. Բերբերյանը՝ գյուղստվերի մասին

Լուսանկարում՝ վարչապետ Հովիկ Աբրահամյանն Արմավիրի մարզի դաշտերում, 2016 թ.

Պարզվում է՝ Հայաստանում ոչ միայն կա ստվերային տնտեսություն, այլ նաեւ ստվերային գյուղատնտեսություն: Օգոստոսի 23-ին, կառավարության նիստի ժամանակ նման հայտարարություն արեց ՀՀ վարչապետ Նիկոլ Փաշինյանը:

«Պարզվում է՝ կան այգիներ, որոնք ընդհանրապես գրանցված չեն, որպեսզի դրա հետ կապված տուրքեր չառաջանան: Երբ վերցնում ենք ինչ-որ տարածքներ, նայում ենք, որ էսքան այգի կա, էսքան ջուր է անհրաժեշտ: Բայց գալիս է պահանջարկը՝ էդքան գումարած X քանակ: Ասում ենք՝ բացատրեք, թե ինչի է այդ տարածքի համար այդքան գումար պետք, չկա բացատրություն: Ասում են՝ վայ, եթե ջուրը չլինի, աղետ կլինի: Հետո խորհրդակցություններից հետո գալիս ասում են՝ գիտեք, էնտեղ կոսնպիրատիվ այգիներ կան, գրանցված չեն»,- ասաց Փաշինյանը:

Նրա խոսքով, շատ է խոսվում, որ ջրային ոլորտում կան չարաշահումներ. «Սիրելի հայրենակիցներ, աջակցեք, որ գտնենք այդ չարաշահումները, դիմեք իրավապահ մարմիններին: Ես երեք ամիս վարչապետ լինելուց հետո նոր իմացա, որ կան գաղտնի այգիներ: Էլ ինչեր ենք իմանալու՝ չգիտենք»,- ընդգծեց ՀՀ վարչապետը:

Հայաստանի Արտագյուղացիական միավորում հասարակական կազմակերպության նախագահ Հրաչ Բերբերյանը «Հայկական ժամանակ»-ի հետ զրույցում մեկնաբանելով վարչապետի բարձրաձայնած խնդիրները, ասում է, որ ստվերը գյուղատնտեսության ոլորտում կախված է օլիգարխների «փողեր լվանալու» հետ:

«Վարչապետը ճիշտ է, հատկապես որոշ օլիգարխներ կան, որ գյուղատնտեսության անվան տակ գումարներ են լվանում, քանի որ գյուղմթերքը չի հարկվում: Ստվերային գյուղատնտեսությունն առկա է հիմնականում խաղողագործության ոլորտում, պահածոյագործությունում եւ կոյնակագործությունում»,- ասաց Հրաչ Բերբերյանը:

Արտագյուղացիական միավորում հասարակական կազմակերպության նախագահը եւս հայտարարում է, որ ոռոգման համակարգում տասնամյակների ստվեր կա: «Ջրի հաշվիչներն են բացակայում, տեղադրված չեն: Ջրօգտագործողների բազմաթիվ աշխատակիցներ կան, որ իրենց ու իրենց բարեկամների հողատարածքները ոռոգում են գաղտնի»,- հայտարարում է նա:

Նախկին իշխանությունների շատ պաշտոնյաներ մենաշնորհային դիրք ունեին հենց գյուղատնտեսության ոլորտում: Մասնավորապես, նախկին վարչապետ, ԱԺ նախագահ Հովիկ Աբրահամյանը հայտնի էր լոլիկի արտահանումից ստացվող միլիոնավոր եկամուտներով: Հրաչ Բերբերյանից հետաքրքրվեցինք, մասնավորապես, Հովիկ Աբրահամյանը որքանով կարող է կապ ունենալ ստվերային տնտեսության հետ:

«Պաշտոնյան, երբ պաշտոնյա է` այդ գործերում խառնված է լինում, իսկ երբ պաշտոնյա չէ, ուրեմն խառնված չի լինում: Ինձ թվում է, որ Հովիկ Աբրահամյանի մասով որ ուսումնասիրություն լինի, խախտումներ կգտնվեն: Մի ժամանակ ջրօգտագործողների ընկերությունները պատկանում էին Հովիկ Աբրահամյանին: Նախկինում խողովակների, խորքային հորերի թալան է եղել, ամբողջի մեղավորը ջրային կոմիտեն է»,- ասաց նա:

Գյուղատնտեսության նախարար Արթուր Խաչատրյանն էլ մեր զրույցում նշեց՝ չի կարող ասել, թե վարչապետն ու՞մ նկատի ունի, որովհետեւ նրանք դեռ ստվերում են:

«Եղել է բանջարեղենի դաշտ, որտեղ հիմա հիմնվել է այգի եւ համապատասխան փոփոխությունները չի արվել: Այսինքն՝ հողի հարկի վրա չի ազդել: Փաստաթղթերով շարունակում են մնալ մշակաբույսերի դաշտ»,- պարզաբանեց գյուղատնտեսության նախարարը:

Արթուր Խարատրյանը չհերքեց, որ շարքային գյուղացիներից զատ նման «հնարամտության» կարող էին դիմած լինել նաեւ հեկտարներով հողատարածքներ ունեցող մեծահարուստները:

«Խնդիրն այն է, որ պետք է հստակ հասկանանք, թե ովքեր են նրանք: Սա ազդում է հողի հարկի վրա»,- ասաց նա եւ մեր հարցին ի պատասխան նշեց, որ չի կարող ծավալներ նշել, քանի որ դեռ բացահայտված չէ:

Գյուղնախարարը նշում է, որ այս խնդրի բացահայտմամբ պետք է համայնքները զբաղվեն, քանի որ այն համայնքային բյուջե մուտքագրվող հարկերի աճի վրա է ազդում: Արթուր Խաչատրյանը միաժամանակ նշեց, որ վարչապետի ելույթն արդեն պետք է որպես հանձնարարական դիտել ու սկսել ոլորտի խնդիրները լուծել: