Պաշտոնյաների, օլիգարխների կանանց կոչ եմ անում՝ իրենց թանկարժեք զարդերը նվիրել Արմենակ Ուրֆանյան հիմնադրամին. Ա. Հակոբյան

Ապրիլյան պատերազմում զոհված զինծառայողների ծնողները միանում են վարչապետի տիկնոջ՝ Աննա Հակոբյանի նախաձեռնած «Կանայք՝ հանուն խաղաղության» արշավին: Այս մասին այսօր վարչապետի նստավայրում Աննա Հակոբյանի հետ ժամանակ հայտարարեցին Ապրիլյան պատերազմում զոհվածների մայրերը: Ողջունելով Աննա Հակոբյանի նախաձեռնությունը՝ նրանք կոչով դիմեցին աշխարհի բոլոր մայրերին: «Ես պայքարելու եմ, որ այլեւս զավակ չկորցնենք»,- հայտարարեց կապիտան Հովսեփ Կիրակոսյանի մայրը՝ Մարգարիտա Հարությունյանը:Կապիտան Արմենակ Ուրֆանյանի մայրն իր խոսքում նշեց, որ ադրբեջանցի զինվորների մայրերը եւս համացանցում կոչ են անում, որ դադարեցվեն պատերազմները: «Նրանք էլ չեն ուզում որդի կորցնել, պետք է ապրենք խաղաղ: Այսօր մենք՝ մայրերս, կոչ ենք անում լռեցնել աշխարհի բոլոր հրանոթները։ Երեսուն տարի է՝ արցախա-ադրբեջանական հակամարտությունը մահաբեր վիշտ է Հայաստանի եւ Ադրբեջանի հոգեծին մայրերի համար»:

Աննա Հակոբյանը շնորհակալություն հայտնեց զոհված զինծառայողների մայերին՝ իր նախաձեռնած խաղաղության արշավին միանալու համար: «Փարիզում, հայ համայնքի հետ հանդիպման ժամանակ, ինձ մեղադրական հարց ուղղվեց՝ ի՞նչ եմ մտածում ես, ինչպե՞ս կվերաբերվեն իմ նախաձեռնությանը Ապրիլյան պատերազմում զոհված զինծառայողների մայրերը: Ես այս հարցի պատասխանը իմ հոգու խորքում ունեի, բայց շատ կարեւոր էր, որ այդ հարցի պատասխանը հնչեր ձեր կողմից: Դուք չեք պատկերացնի, թե որքան կարեւոր է, որ դուք եք տալիս այդ պատասխանը եւ որքան վստահ եմ տանելու այդ նախաձեռնությունը՝ իմ թիկունքին ունենալով ձեր աջակցությունը:Մենք՝ Հայաստանի եւ Արցախի քաղաքացիները, մինչեւ մեր կյանքի վերջ պարտք ենք ձեզ: Աշխարհում չկա մի բան, որով մենք կարող ենք ձեզ վարձահատույց լինել, որովհետեւ դուք հայրենիքին տվել եք անգինն ու անփոխարինելին: Ձեր այս քայլով դուք շարունակում եք ծառայել հայրենիքին»,- ասաց Աննա Հակոբյանը:

Վարչապետի տիկինը նշեց, որ շատ կարեւոր է հատկապես հայ մայրերի կատարած կոչն Ադրբեջանի մայրերին, եւ նրանք էլ կխոսեն հանուն խաղաղության ու ընդդեմ պատերազմի: «Եթե դա տեղի ունենա, մեր թիմը համալրվի, ապա մեր խոսքը կհասնի նաեւ կրակի, պատերազմի հրաման տվող տղամարդկանց: Ես երախտապարտ եմ այս քայլի համար եւ խոստանում եմ, որ ամուր ու վճռական կլինեմ այս արշավը վարելիս: Ինձանից կախված ամեն ինչ կանեմ, որ դա ունենա կոնկրետ արդյունքներ՝ հանուն ձեր որդիների հերոսական հիշատակի, հանուն հայ եւ ադրբեջանցի մայրերի 18-ամյա որդիների կյանքերի: Կեցցե՛ մայրական տիեզերական սերը, որի առաջ կհալվեն աշխարհի բոլոր փամփուշտները»,- ասաց նա եւ մայրերին խնդրեց՝ իրեն շնորհակալություն չհայտնել:

Աննա Հակոբյանը, տեղեկանալով, որ Ապրիլյան պատերազմում զոհված կապիտան Արմենակ Ուրֆանյանի մայրը՝ տիկին Համեստը, որդու անունով հիմնադրամ է բացել, նախկին եւ ներկա պաշտոնյաների, օլիգարխների կանանց առաջարկեց՝ իրենց թանկարժեք զարդեր եւ այլ իրեր նվիրաբերել հիմնադրամին: «Եթե նրանք մի փոքր կասկած ունեն այդ հարստության արդար ճանապարհի վրա, զարդերը թող նվիրաբերեն տիկին Համեստի հիմնադրամին եւ մեծ թափ հաղորդեն այդ ֆոնդի աշխատանքներին: Կարծում եմ՝ կգտնվեն կանայք, ովքեր կհանգեն այն եզրակացությանը, որ այն ունեցվածքը, որ ձեռք են բերել իրենց ամուսինների պաշտոնավարման ընթացքում՝ այնքան էլ արդար քրտինքով վաստակած ունեցվածք չէ: Դրանց մի մասը նվիրաբերելով այս ֆոնդին, կարծում եմ, որ ավելի հանգիստ իրենց գլուխը կդնեն բարձին»,- նշեց Աննա Հակոբյանը:

ՀՀ Զինված ուժերի կապիտան Արմենակ Ուրֆանյանը, հանուն երկրի խաղաղության, իր զինակից ընկերների հետ զոհվել է 2016 ապրիլի 1-ի լույս 2-ի գիշերը։  Նրա անունով բացված հիմնադրամի նպատակն է լինելու աջակցել Ապրիլյան պատերազմի զոհերի ընտանիքներին, ինչպես նաեւ տարբեր միջոցառումներ իրականացնել՝ սկսած Եռաբլուրում ծառատունկից, մինչեւ պատերազմի զոհերի ծննդյան միջոցառումների անցկացում։