ՀՀԿ-ն որեւէ պայման չի դնում, այն՝ ինչ կառաջարկվի, կբանակցենք. Բաղդասարյանն ու Աշոտյանը հակասում են միմյանց

Հայաստանի 6-րդ գումարման Ազգային ժողովը լուծարվելու է: Այս թեմայի շուրջ քաղաքական հայտարարություններից զատ նաեւ գործնական քայլեր են իրականացվում: Մասնավորապես, վարչապետ Նիկոլ Փաշինյանը Նյու Յորքում հայտարարել է, որ Երեւան վերադառնալուց հետո պատրաստվում է հանդիպել խորհրդարանական եւ արտախորհրդարանական քաղաքական ուժերի հետ եւ բանակցել Ազգային ժողովի արտահերթ ընտրություններ անցկացնելու շուրջ: Մեծ հաշվով բանակցելու շատ բան էլ չկա: Հավանաբար, քննարկվելու է՝ վարչապետի հրաժարականի արդյունքո՞ւմ է խորհրդարանը լուծարվում, թե՞ Սահմանադրական փոփոխություններով, որի համար անհրաժեշտ է պատգամավորների 2/3-ի կողմ քվեն:

«Հանրապետական» կուսակցությունում դեմ չեն վարչապետի հետ քննարկել Ազգային ժողովի լուծարման հարցը: «Հայկական ժամանակ»-ի հետ զրույցում ասաց ՀՀԿ խմբակցության քարտուղար Վահրամ Բաղդասարյանը: Միաժամանակ նա նշեց, որ Ընտրական օրենսգրքի շուրջ քննարկումները չեն ավարտվել: «Մենք ցանկացած հարցի շուրջ, ցանկացած քաղաքական գործչի հետ պատրաստ ենք բանակցել: Ընտրական օրենսգրքի շուրջ մեր բանակցությունները դեռ չեն ավարտվել»,- մեր զրույցում նշեց նա:

Վարչապետի՝ բանակցություններ սկսելու հայտարարությունից հետո «Հանրապետական» կուսակցության առանցքային դեմքերը սկսեցին իրարամերժ հայտարարություններով հանդես գալ: Մասնավորապես, ՀՀԿ փոխնախագահ, ԱԺ պատգամավոր Արմեն Աշոտյանը «168 ժամ» թերթին տված հարցազրույցում նշել է, որ Նիկոլ Փաշինյանը պարտավոր է լսել նաեւ ՀՀԿ-ի հակադարձումները: «Պնդում եմ՝ քաղաքական կոնսուլտացիաների, երկխոսության անհրաժեշտություն իսկապես կա, սակայն օրակարգը պետք է լինի բաց։ Մենք պատրաստ կլինենք լսել վարչապետի հիմնավորումները, և նա պետք է պատրաստ լինի լսել նաև ոչ միայն մեր հակադարձումները, այլև մեր կողմից առաջադրվող քաղաքական հարցադրումները»,- մասնավորապես, ասել էր Արմեն Աշոտյանը։

Ազգային ժողովի ՀՀԿ խմբակցության ղեկավար Վահրամ Բաղդասարյանը, անդրադառնալով Աշոտյանի հայտարարություններին եւ պատասխանելով «Հայկական ժամանակ»-ի հարցին, թե՝ ՀՀԿ-ն ի՞նչ հակադարձումներ ու հարցադրումներ ունի վարչապետին ներկայացնելու, պատասխանեց. «Դա ո՞վ է ասել՝ Աշոտյա՞նը, հարցրեք պարոն Աշոտյանին»:

ՀԺ-ի դիտարկմանը, որ Արմեն Աշոտյանը ՀՀԿ փոխնախագահներից է, Վահրամ Բաղդասարյանն արձագանքեց, որ բանակցությունների հարցերի շրջանակը վարչապետը պետք է ներկայացնի: «Իրենք պետք է ներկայացնեն, թե ինչ հարցերի շուրջ ենք բանակցելու: Երբ իրենք առաջարկություն կանեն, մենք էլ կքննարկենք՝ բանակցելու մասին: Հիմնական քննարկումը լինելու է Ընտրական օրենսգրքի շուրջ»,- ասաց խմբակցության ղեկավարը:

Վահրամ Բաղդասարյանը սրտնեղում է այն հարցադրումից, թե ՀՀԿ-ն ինչ մանդատով իրավունք ունի խոսել հակադարձումների կամ նախապայմանների մասին, երբ Երեւանի քաղաքապետի ընտրությունների ժամանակ «Իմ քայլը» դաշինքը բացարձակ հաղթանակ տարավ: «Թվաբանությունը լավ կսովորեք՝ տոկոսների հետ կապված, կքննարկենք: Բնականաբար, այն՝ ինչ կառաջարկվի մեզ բանակցելու համար, պատրաստ ենք բանակցել»,- ասաց նա:

Վահրամ Բաղդասարյանի շեշտադրումներից պարզ է դառնում, որ ՀՀԿ-ն որեւէ պայման չի պատրաստվում առաջ բերել: «Հանրապետականը որեւէ պայման չի դնում, Հանրապետականը շարունակում է իր բնականոն աշխատանքը խորհրդարանում»,- հայտարարեց նա:

Այնուհետ, Վահրամ Բաղդասարյանը մտահոգություն հայտնեց, որ Ազգային ժողովի արտահերթ ընտրություններից հետո «Քաղաքացիական պայմանագիր» կուսակցությունը կարող է մեծամասնություն լինել, ինչպես Երեւանի ավագանու կազմում եւ չունենալ ընդդիմություն:

«Քաղաքական դաշտում տատանումները շատ են լինում՝ տարբեր ձեւով, եթե նայեք քաղաքապետի բոլոր ընտրությունները, ապա կտեսնենք, որ արդյունքները նույնն են եղել: Ցանկալի է, որ մենք 5-6 քաղաքական ուժ տեսնեինք ավագանիում, այլ ոչ թե երկու հոգի շեմը հաղթահարած եւ մեկ հոգի էլ՝ օրենքի ուժով: Պատմությունը կրկնվելու է, դրա համար պետք է քաղաքական ուժերին հնարավորություն տրվի, որպեսզի քաղաքական դաշտը կայունանա: Դուք կարո՞ղ եք ասել՝ նոր ընտրություններից հետո ո՞վ է լինելու ընդդիմությունը»,- եզրափակեց նա:

Ի դեպ, «Դաշնակցություն» եւ «Բարգավաճ Հայաստան» կուսակցությունների ներկայացուցիչներն արդեն հայտարարել են, որ պատրաստ են վարչապետ Նիկոլ Փաշինյանի հետ բանակցել արտահերթ խորհրդարանական ընտրությունների շուրջ: Նշենք, որ մեկ տարվա ընթացքում արտահերթ ընտրություններ անցկացնելու գաղափարն ամրագրված է նաեւ կառավարության ծրագրում, որին Ազգային ժողովում պատգամավորները կողմ են քվեարկել: