Քաղաքացիները գոհ են ֆրանկոֆոն տաղավարներից, միայն ափսոսում են, որ ֆրանսերենի չեն տիրապետում

Հայաստանում անցկացվող Ֆրանկոֆոնիայի 17-րդ գագաթնաժողովի շրջանակներում իրականացվող միջոցառումների մեկնարկը տրված է հոկտեմբերի 7-ից: 

Գագաթանժողովի թեման է «Ապրել միասին`հարգելով համերաշխությունը, մարդասիրական արժեքներն ու բազմազանությունը՝ իբրեւ խաղաղության եւ բարօրության հիմք ֆրանկոֆոն տարածաշրջանում»: Համընդհանուր արժեքների վրա խարսխված այս թեման հնարավորություն կտա արտացոլել Ֆրանկոֆոնիայում խաղաղությունը, համերաշխությունը եւ զարգացումը։ Որպես Ֆրանկոֆոնիայի 17-րդ գագաթնաժողովի լոգո ընտրվել է նուռը՝ ի նշան ֆրանկոֆոն ողջ տարածքի խաղաղության եւ բարգավաճման։

Հոկտեմբերի 9-ից Ազատության հրապարակում պաշտոնապես բացված Ֆրանկոֆոնիայի ավանում գագաթնաժողովի մասնակից երկրները, Ֆրանկոֆոնիայի միջազգային կազմակերպության գործընկերներն ու գործակալությունները հնարավորություն ունեն ցուցադրել իրենց երկրների մշակութային եւ լեզվական ողջ բազմազանությունը: Ներկայացնել արհեստագործական իրեր, մասնակից պետությունների զբոսաշրջային հնարավորությունները, արվեստի, մշակույթի գործեր, ինչպես նաեւ ազգային խոհանոցը:

Ազատության հրապարակում՝ մասնավորապես Ֆրանկոֆոնիայի ավանում, ողջ օրվա ընթացքում ելույթներ են ունենում Հայաստան ժամանած ֆրանկոֆոն երկրների պարային խմբերն ու երգչախմբերը։ Ֆրանկոֆոնիայի ավանը մեկ հարկի տակ է միավորում աշխարհի 5 մայրցամաքներից տասնյակ երկրների՝ իրենց մշակութային բազմազանությամբ: 

Ֆրանկոֆոնիայի ավանում շուրջ քսան տաղավարների կողքին Ֆրանսիան տեղադրել է իր տաղավարը, որը ստեղծվել է «ֆրանսերեն հնարավորությունների» ոգով: Այսպես է բնորոշում ֆրանսերենը Ֆրանսիայի նախագահ Էմանուել Մակրոնը:

Ֆրանկոֆոնիայի ավանում քաղաքացիները կարող են մասնակցել վարսահարդարման, հրուշակագործության դասընթացների, համտեսել ֆրանսիական եւ այլ ազգային ուտեստներ, դիտել 3 եւ 9D պատկերներ, պրոֆեսիոնալ լուսանկարներ ունենալ եւ այլն:Վիրտուալ իրականություն, տեսախաղեր, վարպետության դասեր, հանրության առաջ հուզող հարցերի շուրջ խոսելու համար տրամադրված հարթակ՝ բեմ նստարաններ եւ շատ ավելին: Այս ամենը ներկայացված են կողք-կողքի ու ամենն անվճար է, պարզապես մուտք գործելու համար քաղաքացիները պետք է հատուկ անցակետերով անցնեն՝ անվտանգության նկատառումներից ելնելով: Տաղավարների կողքին գործում են նաեւ վաճառակետեր, որտեղ քաղաքացիները կարող են գնել ֆրանկոֆոն երկրների խորհրդանիշներով շապիկներ, բիժուտերիա, պայուսակներ, ամսագրեր, գրքեր եւ այլն։ՀԺ-ն շրջեց տաղավարներով եւ զրուցեց ՀՀ տարբեր մարզեր ներակայացնող անհատների ու միջոցառումը վայելող քաղաքացիների հետ:

Կոտայքի մարզը ներկայացնող Նարե անունով աղջնակը մեզ ցույց տվեց իր տաղավարում հայկական ուտելիքներն ու պատմեց ցորենի խորհրդանշական նշանակության մասին: Այս տաղավարում կա Գառնիի լավաշ, թթու լավաշ եւ ցորեն, ինչը ներկայացված էր ոչ միայն որպես հաց եւ ուտեստներ պատրաստաելու հումք, այլեւ տան համար գեղեցիկ դեկորների միջոց: Նարեի խոսքով՝ զբոսաշրջիկներին ոչ միայն ցորենի դեկորատիվ տեսքն է հետաքրքրում, այլեւ նրա շուրջ հյուսված առասպելներն ու խորհրդանշական պատմությունները: «Արդեն բազմաթիվ այցելուներ ենք ունեցել, ովքեր սիրով լսում են ցորենի հետ կապված պատմությունները, սակայն ավելի շատ այցելուներ երեկոյան ժամերի ենք ունենում»,-ասաց նա:

Ռուբեն եւ Կարեն Ղազարյանները, որոնք ներկայացնում են Վայոց ձորի մարզը, եկել են Եղեգնաձոր քաղաքից: ՀԺ-ի հետ զրույցում Ղազարյան եղբայրները փոխանցեցին, որ ներկայացնում են հայկական արվեստը՝ խաչքարերը: Ղազարյան եղբայրները

Տղաների աշխատանքի մի մասը պատրաստի ներկայացված են, նաեւ ընթացքում էին պատրաստում՝ այցելուների աչքի առաջ: Ամենափոքրիկ խաչքարի արժեքը 5 հազար դրամ է, ամենամեծինը 12 հազար:«Մեզ մարզպետարանից են տեղեկացրել ու հրավիրել, որպեսզի ֆրանկոֆոնիայի շրջանականերում ներկայացնենեք մեր արվեստը: Արդեն վաճառքներ ունեցել ենք, ներկայացնում ենք նաեւ Նորավանքի մակետներ, ընթացքում ցույց ենք տալիս նաեւ, թե ինչպես են խաչքարերը ստեղծվում, ամեն դեպքում՝ մարդկանց հետաքրքիր է»,-ասաց Ռուբեն Ղազարյանը:

ԵՊՀ Իջեւանի մասնաճյուղի Կիրառական արվեստի ֆակուլտետի դասախոսներ Անուշ եւ Դոնարա Չիբուխչյանները ՀԺ-ի հետ զրույցում նշեցին՝ Տավուշի մարզն են ներկայացնում: Չիբուխչյանները Իջեւան քաղաքում սովորեցնում են նաեւ ձեռագործ աշխատանք: Լուսանկարում՝ Չիբուխչյան քույրերը

«Այսօր ներկայացնում ենք ժանյակներ անկյունագործ եւ ասեղնագործ գլխարկներ, աշխատանքի ներքեւի հատվածում մեր լոգոն է դրված՝ մեր անվան առաջին տառերով: Անցկացնում ենք վարպետաց դասեր»,-ասացին նրանք:Քաղաքացիները ՀԺ-ի հետ զրույցում նշեցին, որ շատ ուրախ են, որ նմանատիպ միջոցառում է իրականացվում Երեւանում: Նշեցին, որ ամեն ինչ բարձր մակարդակով է ընթանում, թե՛ կազմակերպչական, եւ թե՛ միջոցառման անցկացման ձեւաչափը ոչնչով չի զիջում: «Առհասարակ այս տարի քաղաքի միջավայրը շատ է փոխվել, ամեն քայլափոխի դրական բանի ես հանդիպում, մարդկանց դեմքերին ժպիտներ են»,-ասաց Երեւան քաղաքի բնակչուհի տիկին Անահիտը:

Ոմանք, սակայն, մեզ հետ զրույցում ափսոսանք հայտնեցին, որ ֆրանսերենի չեն տիրապետում եւ միջոցառման ընթացքում շատ բաներ չեն հասկանում: