Շարմազանովի, Աշոտյանի փոխարեն Սամվել Ալեքսանյանն է առաջադրվել եւ բոլորին անցկացրել ԱԺ. Լենա Նազարյան

«Քաղաքացիական պայմանագիր» կուսակցությունում ակտիվ նախապատրաստվում են նախնտրական քարոզարշավին: ՔՊԿ-ում նախընտրական ցուցակն արդեն վերջնական տեսքի են բերում, որտեղ լինելու է ՀՀԿ-ի հետ կապ ունեցած երկու անձ՝ Ֆելիքս Ցոլակայանն ու Շիրակ Թորոսյանը: Այս մասին ՀԺ-ի հետ զրույցում նշել է ՔՊ վարչության անդամ Լենա Նազարյանը:

- Տիկին Նազարյան, այս պահին ՔՊ-ն ի՞նչ աշխատանքներ է իրականացնում ընտրությունների հետ կապված:

- Երկու ուղղությամբ արդեն նախապատրաստական աշխատանքները մեկնարկել են: Արդեն նախընտրական ցուցակն ենք ամփոփում եւ շտաբների աշխատանքներն են ձեւավորվում: Զուգահեռ նաեւ քարոզչություն իրականացնելու էլեմենտներ ենք իրականացնում:

- Ովքե՞ր են լինելու առաջին տասնյակում:

- Առաջին տասնյակում, բնականաբար լինելու են քաղաքական թիմի ներկայացուցիչները: Անկախ նրանից՝ նրանք հետագայում խորհրդարանում են լինելու, թե՝ կառավարությունում, միեւնույն է, պետք է լինեն ցուցակներում: Այս պահին չեմ կարող անուններն ասել, բայց բոլորին ծանոթ մարդիկ են լինելու: Ներկայացնելու ենք մոտ 200 հոգուց բաղկացած ցուցակ:

Ցուցակում ընդգրկվածները տեխնիկապես լրացնելու համար չեն լինելու, մենք այսքան պայքարեցինք, որ մեր ցուցակում լինեն նաեւ կանայք, ովքեր հետաքրքրված են քաղաքականությամբ: Ցուցակի կին թեկնածուներն արդեն հասարակական գործունեություն ծավալել են, իրենց ոլորտում հաջողակ ու հայտնի են: Հաջորդ խորհրդարանում մենք կանանց առումով առաջընթաց ենք ունենալու:

- Տիկին Նազարյան, ի վերջո, ովքե՞ր են լինելու ՔՊ-ի ցուցակում՝ այլ կուսակցություններից. այս օրերի ընթացքում բազմաթիվ հետաքրքիր անուններ շրջանառվեցին, ովքեր անդամակցվում են ՔՊ-ին եւ առաջադրվելու են ձեր ցուցակով:

- Մենք քննարկում ենք Շիրակ Թորոսյանի եւ Ֆելիքս Ցոլակյանի թեկնածությունները: Նրանք չեն եղել ՀՀԿ անդամ՝ իմ իմանալով: Նրանց նկատմամբ հանրային դրական ընկալում կա՝ հաշվի առնելով, թե ինչպես դրսեւորեցին իրենց հեղափոխական ժամանակաշրջանում: Բացի այս անձանցից, ՀՀԿ-ի հետ կապ ունեցող որեւէ անձի թեկնածություն չի քննարկվում: Տարբեր լրատվամիջոցներ գրում են նյութեր, որոնցով կասկածներ են հարուցում հանրության շրջանում: Ես կարծում եմ, որ դա ազնիվ չէ, քանի որ այդ հրապարակումների մեջ նշված անունները չեն քննարկվում մեր ցուցակում ընդգրկելու համար:

- ՔՊ-ն միայն «Առաքելություն» կուսակցության հե՞տ է դաշինք կազմելու:

- Մենք ցանկանում ենք «Իմ քայլը» անունը պահել, կարծում եմ, որ դաշինքի ֆորմատը կպահպանվի «Առաքելության» հետ: Այլ կուսակցության հետ դաշինք կազմելու առաջարկ չենք ստացել, որ քննարկենք: Ես կարծում եմ, որ նույնիսկ իմաստ էլ չունի մեզ նման առաջարկ անել:

- Անհատ գործիչներ այլ կուսակցություններից կլինե՞ն:

- Դա ցանկալի չէ մեզ համար, ինչո՞ւ պետք է լինեն: Եթե իրենց կուսակացությունը մասնակցում է ընտրություններին, ապա թող իրենք կուսակցությունով մասնակցեն: Չեն լինելու: Լինելու են միայն «Առաքելություն» կուսակցության մի քանի անդամներ եւ անկուսակցական մարդիկ, ովքեր չեն բացառում ՔՊ-ական դառնալը: Անդամագրումն այդ անձանց հնարավորություն կտա մասնակցել կուսակցության ղեկավար կազմի ընտրությանը: Անկուսակցական թեկնածուները ոլորտային մասնագետներ են, ովքեր երկար տարիներ այդ ոլորտներում քաղաքականություն են մշակել: Չեմ ուզում անուններ տալ, բայց մեր ցուցակը ոչ ոքի չի հիասթափեցնի:

- Տիկին Նազարյան, նշեցիք, որ այդ անձնիք չեն հերքել, որ ցանկություն ունեն միանալ ՔՊ-ին: Չի՞ ստացվում, որ արդեն չափից շատ անձինք են միանում ձեր կուսակցությանը, եթե ես չեմ սխալվում, այս պահին ՔՊ-ին անդամագրվելու 6 հազար դիմում կա հերթի մեջ, եթե այդպես հազարներով միանան, ապա որակական խնդիր չի՞ լինի: Մտավախություն չկա՞, որ վերջնարդյունքում ՔՊ-ն կվերածվի ՀՀԿ-ի եւ կպարզվի, որ այդ անձինք կուսակցության գաղափարախոսության հետ կապ չունեն:

- Մենք ունենք կուսակցության այնքան անդամ, որքան ունեցել ենք հեղափոխությունից առաջ: Շատ քիչ թվով են ավելացել, այսինքն՝ նրանք, ովքեր նախարարներ են: Ցանկացել են նաեւ անդամագրվել ավագանու անդամներ: Մեր կուսակցության անդամներն ավելացել են մի քանի հարյուրով, հազարը չեն անցել: Ճիշտ եք, վեց հազար հոգի դիմում է ներկայացրել, սակայն վարչությունը դեռ չի քննարկել նրանց անդամակցությունը: Ժամանակի առումով չենք հասցնում, ծանրաբեռնված ենք՝ ընտրություններից հետո նոր միայն կանդրադառնանք դիմումներին:

Այս առումով որեւէ մտավախություն ես չեմ տեսնում, որովհետեւ ժամանակն այդ հարցին կպատասխանի: Մարդիկ, ովքեր եկել են կուսակցություն եւ անձնական շահեր են փնտրում, վախենամ, որ նրանք ինչ-որ պահի հիասթափված կգնան: Մենք չենք հասկանում, թե ինչու են մարդիկ ձգտում կուսակցությանը, քանի որ մենք հայտարարել ենք՝ կադրային քաղաքականութուն վարելիս հաշվի չենք առնելու կուսակցական լինել-չլինելը: Ես մտահոգություն չունեմ, որ աչքի ընկնող հոսք կա, ժամանակի ընթացքում ամեն ինչ տեղը կընկնի:

- Արդեն պարզ է, որ ընտրություններն անցկացվելու են ռեյտինգային ցուցակներով: ՀՀԿ-ն ճիշտ է՝ վարկաբեկված է, բայց նրա առանձին գործիչներ հեղինակություն ունեն առանձին մարզերում եւ համայնքներում: ՔՊ-ն նրանց համարժեք ռեյտինգային թեկնածուներ ունի՞:

- Ես համաձայն չեմ ձեզ հետ: Մարզերում հեղինակություն ունեցող անձինք աջակցում էին ՀՀԿ-ին, որովհետեւ չէին տեսում ռեալ մրցակից, ներգրավված էին տարբեր կոռուպցիոն գործարքների մեջ, վարչական ռեսուրսների չարաշահում էր տեղի ունենում: Նրանք հիմնականում գործարարներ էին, ովքեր ՀՀԿ-ի միջոցով պաշտպանություն էին փնտրում: Սա էր պատճառը, որ նրանք աջակցում էին ՀՀԿ-ին: Հիմա չեմ կարծում, որ մարզերում մնացել են այնպիսի մարդիկ, որ պատրաստ են աջակցել ՀՀԿ-ին՝ հասկանալով, որ համամասնական ցուցակի առաջին տեղերում իրենք չեն լինելու: Նրանք պետք է գիտակցեն, որ ՀՀԿ-ից ԱԺ կանցնեն միայն մի քանի դեմքեր:

Եթե Շարմազանովը, Աշոտյանը եւ մյուսները ռեյտինգային ցուցակով առաջադրվելու են, ապա կիմանանք, թե նրանցից յուրաքանչյուրը որքան քաղաքական կշիռ ունի: Նախկինում իրենք չեն առաջադրվել ռեյտինգային ցուցակներով, եթե չեմ սխալվում, իրենց փոխարեն առաջադրվել է Սամվել Ալեքսանյանը եւ բոլորին ինքն է անցկացրել Ազգային ժողով:

- Իսկ ՔՊ-ն ունի՞ ռեյտինգային թեկնածուների խնդիր: Տպավորություն է, որ ՔՊ-ականները Նիկոլ Փաշինյանի անվան տակ են քվեներ ստանալու: Ճիշտ է, վարչապետը չի լինելու ռեյտինգային ցուցակներում, բայց դուք բացառու՞մ եք, որ նա կգնա, օրինակ Կենտրոն վարչական շրջան եւ կհայտարարի՝ ընտրեք Պողոս Պողոսյանին, եթե ուզում եք, որ ես լինեմ վարչապետ: Այսինքն՝ այս ընտրությունները կվերածվե՞ն վարչապետի ընտրության:

- Մենք բոլորս, բացի Փաշինյանից, առաջադրվելու ենք ռեյտինգային ընտրակարգով եւ աշխատելու ենք մեր տարածքներում: Նիկոլ Փաշինյանը քարոզչության մասնակցության փուլում որեւէ ռեյտինգային թեկնածուի առաջնահերթություն չի տալու: Ամեն մի կուսակցություն ունենալու է իր թիվը, եւ հանրահավաքների ժամանակ Նիկոլ Փաշինյանը կոչ է անելու ձայնը տալ տվյալ կուսակցությանը: Ռեյտինգային թեկնածուներն առանձին են աշխատելու բնակիչների հետ:

- Տիկին Նազարյան, այս պահի դրությամբ պարզ է, թե ընտրություններից հետո ով է լինելու վարչապետի թեկնածուն: ՔՊ-ում քննարկում եղե՞լ է, թե ովքեր են լինելու ԱԺ նախագահը եւ երկու փոխնախագահները:

- Դեռ որոշում չունենք: Մեր ուշադրությունը մեր նախընտրական ցուցակի վրա է: Բնականաբար, հաշվի ենք առնում, թե ով է գնալու գործադիր, ով՝ օրենսդիր: 100 տոկոսով չենք որոշում, բայց կռահումներ անում ենք:

Տպել
11164 դիտում

Մնացականյան-Մամեդյարով հանդիպում․ Աշոտյանն ԱԳՆ-ից եւ վարչապետից պատասխաններ է պահանջում

Հայաստանից Կանադա ուղարկվող ծանրոցներում հայտնաբերվել է թմրանյութով ներծծված հագուստ

Թուրքիան խաթարում է կայունությունը Լիբիայում. երկրի խորհրդարանը միջոցներ կձեռնարկի Անկարայի դեմ

Քաղաքացին զանգել է ԱԻՆ ու սպառնացել ինքնասպան լինել, եթե չմոտենա հոգեբանը

Փակ ու դժվարանցանելի ճանապարհներ, մերկասառույց, ձյան տեղումներ, մառախուղ՝ ՀՀ տարածքում

Հունվարի 17-ը Վրաստանում սգո օր հայտարարվեց

Թբիլիսիում բնակելի շենքում պայթյունի հետևանքով 4 մարդ զոհվել է, այդ թվում՝ 1 երեխա

Ի՞նչ է քննարկվել Մնացականյանի ու Մամեդյարովի հետ. ԵԱՀԿ Մինսկի խմբի հայտարարությունը

Շախմատի կանանց առաջնության միանձնյա առաջատարը Մարիա Գևորգյանն է

Հանրային խորհրդի Պետաիրավական հարցերի հանձնաժողովը քննարկել է հակակոռուպցիոն ռազմավարության նախագիծը

Երևանում և 6 մարզում այսօր էլեկտրաէներգիայի պլանային անջատումներ կլինեն

Զովունիում մեքենան դուրս է եկել հանդիպակաց երթևեկելի գոտի և մխրճվել դեղատան մեջ. վիրավորներ կան

Այս պահին փակ են Վարդենյաց լեռնանցքը, Արագածոտնի և Գեղարքունիքի գյուղամիջյան ճանապարհներ

«Առնո Բաբաջանյան» համերգասրահի փոխտնօրենի նկատմամբ քրեական հետապնդումը դադարեցվել է

Մաշինի դուռը բացվեց ու Փաշինյանն իջավ․ բոլնիսցիները՝ վարչապետի անակնկալ այցի մասին

Մենք կշարունակենք պայքարը, որպեսզի ԻԳԻԼ-ը չբարձրացնի իր գարշելի գլուխը. ԱՄՆ փոխնախագահ

Երեխան ընդունվել է վերջույթների կաթվածով. «Սուրբ Աստվածամայր» Բ/Կ-ն պարզաբանում է փոքրիկի մահը

Գրիպի դեմ պատվաստվողները շատացել են. «Մուրացանում» պատվաստանյութն արագորեն սպառվել է

Մաղթում եմ Ձեզ հաջողություն Ձեր կարեւոր պարտականությունների կատարման գործում. Յագլանդ

ՎՏԲ-Հայաստան Բանկը հայտարարում է Swift դրամային փոխանցումների վերաբերյալ ակցիա՝ նոր հաճախորդների համար