Պետական ապարատը շարունակում է թիրախավորել ՀՀԿ հնարավոր թեկնածուներին. Աշոտյանն ահազանգում է, բայց առանց փաստերի

Պարզ է, թե ով է լինելու իշխանությունը, պետք է հասկանալ, թե ինչ կառուցվածք է ունենալու ընդդիմությունը: Այս մասին ԱԺ-ում լրագրողների հետ զրույցում ասաց ՀՀԿ փոխնախագահ, ԱԺ ՀՀԿ խմբակցության պատգամավոր Արմեն Աշոտյանը:

«Այն իշխանությունը, որը բացարձակ է լինելու Հայաստանում, ամենամեծ վտանգն է իր մեջ պարունակում: Նիկոլ Փաշինյանի իշխանությունը չպետք է լինի բացարձակ: Սա ասում եմ՝ ելնելով այն հանգամանքից, որ դրա մեջ շահագրգռված պետք է լինեն «Իմ քայլը» դաշինքում մարդիկ, ովքեր հավատում են, որ այս իշխանափոխությունը ժողովրդավարության համար էր: Իսկ եթե այդպես էր, այդ մարդիկ պարտավոր են ՀՀԿ-ի համար ստեղծել լավագույն, հավասար պայմանները քարոզչության համար, լրատվական դաշտում, քարոզարշավի ֆիզիկական իրականացման տեսակետից: Չհարուցեն անձնավորված գործընթացներ, պիտակավորումներ, չստեղծեն խոչընդոտներ»,- ասաց Արմեն Աշոտյանը:

Նա ընդգծեց, որ ՀՀԿ-ն շահագրգիռ է, որ ընտրությունները լինեն շատ լավ որակի: «Եթե ընտրությունների վրա ստվեր նետող լինի, այդ ստվերը նետելու է բացառապես կառավարությունը ու որոշիչ ձայն ունեցող վարչապետը: Եթե վարչապետն ուզում է լավ ընտրություններ, նա պարտավոր է օր առաջ ուղերձներ տալ բոլոր այն մարդկանց, որոնք կարծում են, որ այս ընտրությունները պետք է վերածվեն բռնցքամարտի: Մենք բռնցքամարտից չենք վախենում, բայց բռնցքամարտում մեկը մեկի հետ է պայքարում, ոչ թե հազարը մեկի: Եթե հազարը մեկի վրա է, դա արդեն խուժան կռիվ է: Եթե խոսքը խուժան կռվի մասին է, մենք կունենանք խուժան խորհրդարան, այստեղից բխող բոլոր բացասական հետեւանքներով նախեւառաջ Հայաստանի համար»,- շեշտեց նա:

Արմեն Աշոտյանը նշեց, որ հաջողություն է մաղթում բոլոր այն ուժերին, ովքեր ունակ են քաղաքական բովանդակություն ստեղծել։ «Այսօր մեր երկրում իշխանափոխությունից հետո քաղաքական բովանդակությունը հասցվել է զրոյի, քաղաքական պայքարը դարձել է անձնավորված վիրավորանքների, հետապնդումների, պիտակավորումների պայքար։ Դրա արդյունքը մենք տեսնում ենք, երբ կառավարությունը չի արձանագրում վեց ամսվա ընթացքում որեւէ շոշափելի լուրջ արդյունք։ Երբ որ ասում էր՝ ՀՀԿ-ն «քըխ» է, մենք գալիս ենք իշխանության, մենք ձեզ կապահովենք շատ ավելի լավ կյանքով, շատ կարճ ժամանակահատվածում բյուջեն կավելացնենք 800 միլիոն դոլարից մինչեւ մեկ միլիարդ, 2019-ի բյուջետային քննարկումների ժամանակ մենք շատ ավելի մանրամասն կարձանագրենք, թե ինչպես են կառավարությունն ու վարչապետը մոլորության մեջ գցել մեր բնակիչներին՝ տալով շռնդալից խոստումներ ընտրություններից առաջ»,- ասաց Աշոտյանը։

ՀՀԿ փոխնախագահ Արմեն Աշոտյանը հավաստիացնում է, որ ՀՀԿ-ն տեղյակ է, որ դժվարություններ կունենան քարոզարշավին: «Դժվարություններին առերեսվել ենք իշխանափոխությունից հետո վերջին 6 ամիսների ընթացքում: Ցավոք սրտի, այսօր էլ շարունակվում են պետական ապարատի գործադրմամբ ՀՀԿ պոտենցիալ թեկնածուների դեմ գործողություններ` համոզումներ, բա քեզ պե՞տք է, ախր ինչի՞դ համար, երեխուդ մասին մտածիր եւ այլն: Բազմաթիվ այսպիսի դեպքեր կան»,- ասաց նա:

Աշոտյանի խոսքով` երբ բացահայտվի իրենց ռեյտինգային ցանկը, այնտեղ կտեսնենք տարբեր երիտասարդ դեմքեր, նաեւ մարդկանց, ովքեր երկարաժամկետ կուսակցական աշխատանքի փորձ ունեն, կտեսնենք մարդկանց, որոնց չէինք մտածի, որ կլինեին: Նա եւս մեկ անգամ շեշտեց, որ պետական ապարատը տեղերում շարունակում է թիրախավորել ՀՀԿ հնարավոր թեկնածուներին: «Չեք տեսնի անուններ, որոնք վերջին շրջանում քննարկվում էր ԶԼՄ-ների կողմից: Դա նույնպես արդյունք է, որ պետական ապարատը շարունակում է թիրախավորել ՀՀԿ թեկնածուներին` տարբեր ձեւերով համոզելով, շատ մեղմ սպառնալով՝ չդնելու թեկնածություն, չմտնելու այդտեղ, անդարդ գլուխը ցավի մեջ չդնելու: Նման դեպքերը շատ են, կան նաեւ դրանց որոշակի ապացույցներ: Դրանք միայն դատարկ խոսքեր չեն»,- հավաստիացրեց Աշոտյանը: