7-րդ գումարման Ազգային ժողովի անդրանիկ նիստի օրն անհայտ է. քննարկվում է դեկտեմբերի 24-ը եւ հունվարի 7-ը

ԿԸՀ-ն դեկտեմբերի 10-ին հրավիրված արտահերթ նիստում ամփոփեց արտահերթ խորհրդարանական ընտրությունների նախնական արդյունքները: Կենտրոնական ընտրական հանձնաժողովի նախագահ Տիգրան Մուկուչյանի փոխանցմամբ՝ մինչ վերջնական արդյունքների ամփոփումը՝ կուսումնասիրվեն ընտրատեղամասերի գրանցամատյաններում առկա բոլոր գրառումները, դրանք կքննարկվեն տարածքային հանձնաժողովներում եւ ըստ այդմ՝ կկայացվեն որոշումներ:

«Միաժամանակ դեկտեմբերի 9-ին եւ 10-ի առավոտյան սահմանված է ժամկետ՝ տարածքային ընտրական հանձնաժողովներ դիմումներ ներկայացնելու համար, որոնք կարող են վերաբերել վերահաշվարկի իրականացմանը, տեղամասերում քվեարկության արդյունքների անվավեր ճանաչմանը եւ միաժամանակ այլ անձի փոխարեն քվեարկելուն»,- պարզաբանեց Մուկուչյանը:

Դեկտեմբերի 10-ին՝ ժամը 14:00-ին, ավարտվում է դիմումների ներկայացման ժամկետը: Դրանից անմիջապես հետո ԿԸՀ-ն կամփոփի ամբողջ տեղեկատվությունը եւ մինչ ընտրության արդյունքների վերջնական ամփոփումը կներկայացնի ամփոփ տեղեկատվություն: Ըստ նրա՝ ընտրությունների արդյունքների ամփոփումը տեղի կունենա քվեարկությունից հետո՝ 7-րդ օրը: Դրանից հետո կհայտարարվի ԱԺ առաջին նիստի օրվա մասին:

Տիգրան Մուկուչյանը չցանկացավ նախնական արդյունքների հիման վրա ասել, թե Ազգային ժողովում քանի պատգամավոր կլինի: Նշեց, որ հայտարարությունը կլինի միայն վերջնական արդյունքներից հետո: «Պետք է նկատի ունենանք, որ կան գործառույթներ, որոնց իրականացումը կարող է անդրադարձ ունենալ նաեւ այդ հարցերի վրա»,- ասաց նա:

Այնուհանդերձ, Տիգրան Մուկուչյանը պարզաբանեց, թե ինչպես է լինելու մանդատների բաշխման սկզբունքը: «Նախ, բաշխվելու են մանդատները այն ուժերի միջեւ, որոնք հաղթահարել են 5 կամ 7 տոկոսանոց շեմը: Դրանից հետո ԸՕ-ով ամրագրված 105 մանդատը համամասնորեն բաժանվում են այն ստացված ձայներին համապատասխան կուսակցությունների ու դաշինքների միջեւ, որոնք հաղթահարել են 5 տոկոսանոց շեմը, որից հետո արդեն ստացված մանդատների կեսը կտրվի համամասնական ցուցակին, մյուս կեսը՝ տարածքային ընտրական ցուցակներին:

Տարածքային ընտրական ցուցակներում մանդատները բաշխելու համար եւս կիրառվում է բանաձեւ: Որոշվել է տարածքային ընտրատարածքին հասանելիք մանդատների թիվը, եւ երբ արդեն պարզ կլինի, թե յուրաքանչյուր կուսակցություն յուրաքանչյուր տարածքից որքան մանդատ է ստանալու, այնուհետեւ արդեն կորոշվեն կոնկրետ անձինք՝ ովքեր են ստանալու մանդատները՝ պայմանավորված այդ տարածքներում ստացած իրենց ձայների քանակով: Իսկ մանդատների որոշումը յուրաքանչյուր տարածքի համար ընդունելու դեպքում հիմք են ընդունվելու տվյալ կուսակցության ստացած կողմ ձայները»,- ասաց նա:

Ըստ Տիգրան Մուկուչյանի՝ այս ընտրություններին ավելի պատասխանատու են վերաբերել: Նա մատնանշեց՝ հերթական ընտրություններից արտահերթ ընտրությունները տարբերվում են նրանով, որ նախապատրաստական շրջանի համար ավելի քիչ ժամանակ է տրամադրվում: «Միանշանակ մոտեցումը եղել է բարձր պատասխանատվությամբ, որպեսզի ընտրական գործընթացը կազմակերպվի ԸՕ-ի պահանջներին լիակատար համապատասխան, առանց որեւէ ժամկետի խափանման»,- ասաց նա:

ԱԺ կանոնակարգ սահմանադրական օրենքի 32-րդ հոդվածի համաձայն՝ Ազգային ժողովի արտահերթ ընտրության դեպքում առաջին նստաշրջանը հրավիրվում է նորընտիր Ազգային ժողովի կազմավորումից հետո` երկրորդ երկուշաբթի օրը՝ ժամը 10:00-ին։ Ընտրությունները կայացել են դեկտեմբերի 9-ին։ Ընտրական օրենսգրքի 75-րդ հոդվածի համաձայն՝ Կենտրոնական ընտրական հանձնաժողովը քվեարկության օրվանից հետո` 7-րդ օրը, այսինքն՝ դեկտեմբերի 16-ին, հիմք ընդունելով ընտրական տեղամասերում քվեարկության արդյունքների վերաբերյալ արձանագրությունները, վերահաշվարկի արդյունքները, քվեարկության արդյունքների վերաբերյալ ընդունած որոշումները, կազմում է արձանագրություն քվեարկության վերջնական արդյունքների վերաբերյալ:

Դեկտեմբերի 16-ին հրապարակվելու են ընտրությունների վերջնական արդյունքները, որից հետո հինգ օր տրվում է Սահմանադրական դատարան դիմում-բողոք ներկայացնելու համար: Այս մասին ՀԺ-ի հետ զրույցում փոխանցեց «Քաղաքացիական պայմանագիր» կուսակցության վարչության անդամ, պատգամավորի թեկնածու Վահագն Հովակիմյանը:

«Սա արդեն լինում է դեկտեմբերի 21-ը, եթե ՍԴ բողոք ներկայացվեց, ուրեմն սա էլ առաջին նիստը հետաձգում է 15 օրով: Եթե ՍԴ բողոք չի ներկայացվում, ապա ԿԸՀ-ն կարող է դեկտեմբերի 22-ին ամփոփել քվեարկության արդյունքները: 22-ը շաբաթ օր է, 22-ին ԿԸՀ-ն նիստ չի անի, քանի որ ոչ աշխատանքային է, ուստի՝ ամփոփումը կատարվում է 24-ին: Սահմանադրության մեջ ասվում է, որ ամփոփումից հետո երկրորդ երկուշաբթի օրը գումարվում է նիստ, 24-ը երկուշաբթի է, որին հաջորդող 2-րդ երկուշաբթին ընկնում է հունվարի 7-ը: Եթե բողոքարկում եղավ, ապա բողոքի մուտքագրումից 15 օր հետո ՍԴ-ն պետք է որոշում կայացնի, որից հետո նոր տեղի է ունենում նիստը»,- ասաց նա, իսկ մեր դիտարկմանը, որ հունվարի 7-ը ոչ աշխատանքային է, Հովակիմյանը նշեց, որ Սահմանադրությունը գերակա է եւ նիստը գումարվում է ըստ կարգի:

Ազգային ժողովի աշխատակազմի ղեկավարի տեղակալ Արսեն Բաբայանն էլ 7-րդ գումարման Ազգային ժողովի անդրանիկ նիստի մեկ այլ տարբերակ է առաջարկում:

Եթե ընտրություններն ավարտվում են մեկ փուլով (ձեւավորվում է մեծամասնություն), բացակայում են Ընտրական օրենսգրքով նախատեսված բոլոր այն առիթները, որոնք հիմք են հանդիսանալու ընտրությունների արդյունքների վերաբերյալ որոշում ընդունելը հետաձգելուն, ապա նորընտիր Ազգային ժողովի առաջին նիստը կկայանա դեկտեմբերի 24-ին, քանի որ ԱԺ կանոնակարգ սահմանադրական օրենքի համաձայն՝ Ազգային ժողովի արտահերթ ընտրության դեպքում առաջին նստաշրջանը հրավիրվում է նորընտիր Ազգային ժողովի կազմավորումից հետո՝ երկրորդ երկուշաբթի օրը՝ ժամը 10:00-ին։

Ընտրության օր՝ դեկտեմբերի 9 + ԿԸՀ որոշման օր՝ 7-րդ օր = դեկտեմբերի 16 (կիրակի) – առաջին երկուշաբթին՝ դեկտեմբերի 17, երկրորդ երկուշաբթին՝ դեկտեմբերի 24)։ Հիշեցնում եմ, որ սա այն դեպքն է, երբ չի լինի Ընտրական օրենսգրքով նախատեսված ընտրությունների արդյունքների վերաբերյալ ԿԸՀ-ի կողմից որոշման ընդունումը հետաձգելու առիթ, իսկ օրենսգրքով նախատեսված են բազմաթիվ առիթներ»,- մեկնաբանեց նա։

Ի դեպ, նշենք, որ 7-րդ գումարման Ազգային ժողովի ձեւավորումից հետո վարչապետի ընտրություն չի լինում: Մեծամասնության առաջարկած թեկնածուին ՀՀ նախագահը նշանակում է վարչապետի պաշտոնում: Որից հետո սահմանված կարգով ձեւավորվում է կառավարությունը, որն էլ խորհրդարանին է ներկայացնում նոր ծրագիր: