Իրական ընդդիմությունը ԱԺ-ից դուրս է ձեւավարվելու. ինչպես են պայքարելու արտախորհրդարանական ուժերը

Ազգային ժողովի արտահերթ ընտրությունների նախնական արդյունքներն արդեն հայտնի են: Այդ արդյունքերի համաձայն՝ 7-րդ գումարման Ազգային ժողովում են լինելու մեկ դաշինք եւ երկու կուսակցություն: Ընդհանուր հաշվարկով՝ նոր խորհրդարանում լինելու են չորս կուսակցություններ: Մասնավորապես, «Իմ քայլը» դաշինքը ներկայացնող «Քաղաքացիական պայմանագիր», «Առաքելություն», ինչպես նաեւ «Բարգավաճ Հայաստան» եւ «Լուսավոր Հայաստան» կուսակցությունները:

6-րդ գումարման խորհրդարանում եղած կուսակցություններից ԱԺ-ից դուրս են մնում «Հանրապետություն», «Դաշնակցություն» եւ «Հանրապետական» կուսակցությունները:

Խորհրդարանից դուրս մնացած «Հանրապետություն» կուսակցության նախագահ Արամ Սարգսյանը մեր զրույցում հայտարարեց, որ շարունակելու է քննադատել Նիկոլ Փաշինյանին եւ նոր իշխանություններին: Սարգսյանը նշեց, որ իր գլխավորած «Հանրապետություն» կուսակցությունն էլի է եղել արտախորհրդարանական ուժ:

«Պատրաստվում եմ հնչեցնել իմ մոտեցումները՝ անկախ ամեն ինչից։ Ես էդ ամեն ինչն արել եմ իմ երկրի համար ու շարունակելու եմ անել: Արտախորհրդարանական ուժ էլի եմ եղել, բայց իմ մոտեցումները եւ պատկերացումները չեն տուժել: Ես իմ ասելիքն ասել եմ Լեւոն Տեր-Պետրոսյանի, Ռոբերտ Քոչարյանի եւ Սերժ Սարգսյանի իշխանությունների ժամանակ: Կասեմ նաեւ Նիկոլ Փաշինյանին»,- ասաց նա եւ ավելացրեց, որ իրենց կուսակցությունը համալրվել է նախընտրական շրջանում եւ այդ թիմերը պետք է պահպանել:

Արամ Սարգյանը նաեւ նշեց, որ «Մենք» դաշինքի կողմից քննադատությունները անակնկալ լինել չեն կարող, քանի որ քարոզարշավի ողջ ընթացքում իրենք իշխանություններին քննադատել են: «Ես քննադատել եմ Նիկոլ Փաշինյանի արտաքին եւ տնտեսական քաղաքականությունը՝ համարելով, որ ԵՏՄ-ից ներդրումներ չեն կարող գալ, էդտեղ պատժամիջոցներ են, էդտեղ չկան գումարներ։ Ես 100 տոկոս համոզված եմ, որ էն, ինչ ասել եմ, հիմնավոր է եւ ճիշտ»։

Նախկին իշխանություն, ընդդիմադիր դաշտում հայտնված եւ մոտ 60 հազար քվե ստացած ՀՀԿ-ն եւս հայտարարում է արտախորհրդարանական ակտիվ ընդդիմադիր գործունեություն ծավալելու մասին: «Նիկոլ Փաշինյանը թող հիշի, որ այդ 60 հազար քաղաքացին 1 տարի հետո դառնալու են 600 հազար քաղաքացի»,- նախօրեին ֆեյսբուքյան ուղիղ եթերում հայտարարեց ՀՀԿ խոսնակ Էդուարդ Շարմազանովը եւ նշեց, որ ընտրությունների նման արդյունքները հիմք են դնում իրենց պայքարի 2-րդ փուլի սկզբին։

Անդրադառնալով հարցին, թե ինչ ճանապարհներով են արտահայատելու իրենց քաղաքական պայքարը, Շարմազանովը պատասխանեց. «Այդ պայքարն արտահայտվելու է բոլոր հնարավոր օրինական միջոցներով։ Մեր պայքարը հանուն Հայաստանի Հանրապետության է, հանուն քրիստոնեական արժեքների, հանուն Արցախի»։

Շարմազանովը նաեւ հայտարարում է, թե նոր ձեւավորվող խորհրդարանում չկա իրական ընդդիմություն. «Պառլամենտում չկա ուժ, որը Փաշինյանի գործունեության մասին ճշմարտությունը չի ասել, լռել է, երբ Հայաստանում ատելության քարոզ ու վախի մթնոլորտ է եղել, երբ ասֆալտին փռելու մասին կոչեր են եղել։ Սա մեզ ավելի է մոտիվացնում, որպեսզի մենք սկսենք պայքարի երկրորդ փուլը խորհրդարանից դուրս։ Քաղաքական գործիչների պորտը Ազգային ժողովի ամբիոնում չեն կտրել»։

Դաշնակցության ԳՄ ներկայացուցիչ Արսեն Համբարձումյանն էլ ՀԺ-ի հետ զրույցում հայտարարեց, որ ՀՅԴ-ն բազմաբովանդակ գործունեություն է ծավալելու: Նա ասաց, որ քննադատելուց զատ նաեւ գործնական քայլեր են կատարելու:

«Դաշնակցության պարագայում խորհրդարանում լինել չլինելով պետք չէ պայմանավորել մեր հետագա քաղաքական գործունեությունը: Մենք եղանակները կգտնենք՝ մեր ասելիքն ասելու, տեղ հասցնելու համար, ինչպես նաեւ մեր քայլերի առաջնահերթությունն առաջ մղելու համար: Մենք ունենք մեր օրակարգը եւ մեր օրակարգին հետամուտ ենք լինելու եւ հետեւելու ենք իշխանության գործունեությանը, հայտնելու ենք մեր դիրքորոշումը եւ վերաբերմունքը նրանց կատարած աշխատանքի մասին: Միայն արձագանքողի դերում չենք լինելու, նաեւ հստակ քայլեր ենք անելու»,- ասաց Արսեն Համբարձումյանը:

ՀՅԴ Գերագույն մարմնի ներկայացուցիչը կարծում է, որ նոր ձեւավորվող խորհրդարանում իրական ընդդիմություն չկա: Ըստ նրա՝ իրական ընդդիմությունը ձեւավորվելու է խորհրդարանից դուրս: «Խորհրդարանական ուժերի կադրային եւ գաղափարական ներուժը նկատի ունենալով՝ ես չեմ կարծում, որ խորհրդարանական լուրջ ընդդիմություն կարող է ձեւավարվել»,- ասաց ՀՅԴ ներկայացուցիչը: