Ինչպես են բաժանվելու ԱԺ մշտական հանձնաժողովները խմբակցությունների միջեւ. ԼՀԿ-ն առաջարկ ունի

Ազգային ժողով անցած քաղաքական ուժերի միջեւ պատգամավորական մանդատները բաժանվելու են հետեւյալ կերպ. «Իմ քայլը» դաշինք՝ 88 մանդատ, «Բարգավաճ Հայաստան»՝ 26 եւ «Լուսավոր Հայաստան»՝ 18: Ըստ մանդատների թվաքանակի էլ խմբակցությունների միջեւ բաժանվելու են Ազգային ժողովի մշտական հանձնաժողովների նախագահության քվոտաները:

Հանձնաժողովները խմբակցությունների միջեւ բաշխվելու են Դոնթի բանաձեւով: Դոնթի բանաձեւի համաձայն՝ Ազգային ժողովի ինը մշտական հանձնաժողովներից վեցը նախագահելու է «Իմ քայլը» խմբակցությունը, երկուսը՝ «Բարգավաճ Հայաստան» խմբակցությունը եւ մեկն էլ բաժին է հասնելու «Լուսավոր Հայաստան» խմբակցությանը: Սա այն դեպքում, եթե Ազգային ժողովի արտահերթ ընտրությունների վերջնական արդյունքներով՝ մանդատների նախնական թվերի փոփոխություններ չլինեն: Այս մասին «Հայկական ժամանակ»-ի հետ զրույցում ասաց «Քաղաքացիական պայմանագիր» կուսակցության վարչության անդամ Վահագն Հովակիմյանը:

«Դոնթի բանաձեւի համաձայն՝ առաջինը հանձնաժողովի նախագահի պաշտոնը գնում է այն խմբակցությանը, որն ունի ամենաբարձր գործակիցը: Օրինակ, եթե այս պահին «Իմ քայլը» խմբակցության պատգամավորների նախնական թիվը 88-ն է, ապա 88-ը բաժանվում է մեկի եւ գործակիցը ստացվում է 88: «Բարգավաճ Հայաստան» կուսակցության գործակիցը 26 է, իսկ «Լուսավոր Հայաստան» կուսակցությանը՝ 18: Այսպիսով՝ հանձնաժողովի նախագահի առաջին պաշտոնը գնում է «Իմ քայլը» դաշինքին»,- ասաց նա:

Այնուհետեւ ամենամեծ խմբակցության գործակիցը բաժանվում է 2-ի. այս դեպքում ստացվում է 44: Ու քանի որ 44-ը մեծ է ԲՀԿ-ի՝ մեծությամբ 2-րդ ուժի գործակցից, հաջորդ հանձնաժողովի նախագահի պաշտոնը նույնպես տրվում է «Իմ քայլը» դաշինքին: Այնուհետեւ ամենամեծ գործակիցը բաժանվում է 3-ի, հետո՝ 4-ի ու այդպես հաջորդաբար:

Ի դեպ, Ազգային ժողովի առաջին նիստի օրը խմբակցությունները կարող են առաջարկել փոփոխել մշտական հանձնաժողովների թիվը: Մասնավորապես, 2017 թվականին տեղի ունեցած Ազգային ժողովի ընտրություններից հետո որոշվեց, որ 12 մշտական հանձնաժողովները դառնալու են ինը: Այս պահի դրությամբ խորհրդարան անցած ուժերը չեն կողմնորոշվում՝ նման նախաձեռնությամբ հանդես գալու են, թե՝ ոչ: «Հանձնաժողովների թվաքանակը որոշում է խորհրդարանը: Երբ Ազգային ժողովն առաջին նիստը կգումարի, այդ ժամանակ էլ կորոշի: Նման հարցերը նաեւ քաղաքական կոնսոլիդացիաների արդյունքում են որոշվում»,- նշեց Վահագն Հովակիմյանը:

«Հայկական ժամանակ»-ը խորհրդարան անցած քաղաքական ուժերից փորձել պարզել, թե ինչ հանձնաժողովներ կցանկանային ղեկավարել: «Լուսավոր Հայաստան» կուսակցության ներկայացուցիչ Գեւորգ Գորգիսյանը մեզ հետ զրույցում ասաց, որ կուսակցությունում քննարկումներ դեռ չեն ունեցել: «Որեւէ բան չեմ կարող ասել, քանի որ ոչ մի բան չենք քննարկել: Իրականում դեռ հայտնի էլ չէ, թե ո՛ր հանձնաժողովներն են լինելու, քանի հատ է լինելու: Դրանից է կախված, թե մեզ քանի հատ կհասնի»,- ասաց Գորգիսյանը:

Գորգիսյանից հետաքրքրվեցինք, թե արդյո՞ք ցանկանում են Ազգային ժողովի առաջին նիստում հանձնաժողովների կազմի փոփոխության նախագիծ ներկայացնել: Գորգիսյանը նշեց, որ ԼՀԿ-ում նման բան քննարկվում է, բայց քանի որ վերջնական որոշումներ չկան, ուստի, չի կարող մանրամասներ փոխանցել: «Մենք մեկ տարբերակ ունենք, առաջիկայում կերեւա, թե որքանով է դա տարբերվելու առաջադրված տարբերակից: Հիմա բան չեմ կարող ասել, քանի որ ԿԸՀ-ն դեռ վերջնական չի հրապարակել, թե ովքեր են մանդատներ ստանում, սպասենք դրան»:

Հիշեցնենք, որ 2017 թվականին, 6-րդ գումարման Ազգային ժողովի առաջին նիստում ԵԼՔ խմբակցության պատգամավոր Էդմոն Մարուքյանը հակադարձում էր ՀՀԿ-ականներին, որ Ազգային ժողովը պետք է ունենա նաեւ Մարդու իրավունքների եւ հանրային հարցերի մշտական հանձնաժողով: Չի բացառվում, որ «Լուսավոր Հայաստան» կուսակցութունը հենց նույն նախաձեռնությամբ էլ հանդես կգա:

«Բարգավաճ Հայաստան» եւ «Քաղաքացիական պայմանագիր» կուսակցություններից փոխանցեցին, որ այս հարցերի շուրջ դեռեւս քննարկումներ չեն ունեցել: