Միջազգային հեղինակավոր պարբերականները՝ Արցախի դրոշով «Արսենալի» դաշտ մտած երկրպագուի մասին

Եվրոպա լիգայի 2018-19 մրցաշրջանի խմբային փուլի վերջին տուրի «Արսենալ»-«Քարաբագ» հանդիպման վերջնամասում հայ երկրպագուի արած ակցիան աննկատ չի մնացել լրատվամիջոցների կողմից: Երեկ՝ դեկտեմբերի 13-ին, Լոնդոնի «Էմիրեյթս» մարզադաշտում ընթացող խաղի ժամանակ Սպարտակ անունով հայ երիտասարդն Արցախի դրոշով ու Մոնթեի նկարով շապիկով մտել է խաղադաշտ, վազել է դեպի պահեստայինների նստարան, որտեղ ՀՀ հավաքականի եւ «Արսենալի» կիսապաշտպան Հենրիխ Մխիթարյանն է եղել, սակայն անվտանգության աշխատակիցները նրան հեռացրել են: Տեղի ունեցածն արձանագրել են հեղինակավոր մի քանի լրատվամիջոցներ: Հետո էլ մյուս կայքերը դա արտատպել են:

Մասնավորապես, The Telegraph-ն ընդգծել է, որ տեղի ունեցածը զայրացրել է «Քարաբագի» ֆուտբոլիստներին ու գլխավոր մարզիչ Գուրբան Գուրբանովին: Պարբերականն ասել է, թե ինչ դրոշ է եղել երիտասարդի ձեռքին: Պատմել է 2 երկրների կոնֆլիկտի մասին:

The Mirror-ը շեշտել է, որ հենց այդ կոնֆլիկտի պատճառով է, որ ընթացիկ մրցաշրջանի խմբայի փուլի այս թիմերի առաջին խաղին Մխիթարյանը չի մասնակցել: Նշվում է, որ նա Բաքու չի մեկնել անվտանգության նկատառումներով: «Եվրոպա լիգայի վիճակահանությունից հետո «Արսենալն» ասաց. «Մեր ֆուտբոլիստների ու անձնակազմի անդամների անվտանգությունն ու ապահովությունը մեր հիմնական առաջնահերթությունն է»,- գրում է The Mirror-ը:

Ըստ The Daily Mail-ի՝ այդ իրադարձությունը եղել է, պարբերականի բնորոշմամբ, սովորական 2-րդ խաղակեսի ամենաառանձնացող պահը: Նշվում է, որ «Քարաբագի» պաշտպան Ռաշադ Սադիգովը զայրացած ուղղվել է դեպի երիտասարդը:

Համացանցում են նաեւ Getty Images համաշխարհային խոշոր մեդիաընկերության լուսանկարները: Դրանք տարածվել են լրատվամիջոցներում ու սոցիալական ցանցերում:

Ակցիայի մասին հետագայում խոսել է ՀՀ ֆուտբոլի ազգային հավաքականի՝ «Առաջին հայկական ճակատ» (ՖԱՖ) ֆան ակումբի հիմնադիր-անդամ Սերգեյ Ջանջոյանը: Նա նշել է, որ այն հասել է իր նպատակին. միջազգային մամուլն անդրադարձել է դրան ու լուսաբանել Արցախի շուրջ ստեղծված խնդիրը:

Ինչ վերաբերում է Չեմպիոնների լիգայի 2018-19 մրցաշրջանի խմբային փուլի վերջին՝ 6-րդ, տուրի այս հանդիպմանը, ապա «զինագործները» 1:0 հաշվով հաղթանակ տարան «Քարաբագի» նկատմամբ: Ոչինչ չորոշող խաղում «Արսենալի» գլխավոր մարզիչ Ունաի Էմերին նախընտրել էր Մխիթարյանին խաղադաշտ դուրս չբերել:

Հայ ֆուտբոլիստը չէր մասնակցել նաեւ խմբային փուլի՝ այս թիմերի առաջին հանդիպմանը, բայց այն ժամանակ զուտ այն պատճառով, որ անվտանգության նկատառումներով Բաքու չէր մեկնել: Այս խաղից հետո «Արսենալը» 16 միավորով E խմբում զբաղեցրեց առաջին տեղը եւ 1/16 եզրափակիչ անցավ: