Քառօրյա պատերազմի վերաբերյալ կարդացել եմ տասնյակ էջերով գաղտնի նյութեր, հետախուզության նյութերի բացակայություն չի եղել

Արշակ Կարապետյանին ես եմ նշանակել եւ համոզված եմ, որ նա իր պարտականությունները կկատարի: Դիլիջանի միջազգային դպրոցում լրագրողների հետ զրույցում ասաց Նիկոլ Փաշինյանը՝ անդրադառնալով Արշակ Կարապետյանին իր խորհրդականի պաշտոնում նշանակելու փաստին:

Հիշեցնենք, որ Արշակ Կարապետյանը ՀՀ ԶՈւ հետախուզության վարչության նախկին պետն է: Արշակ Կարապետյանը պաշտոնից ազատվել էր 2016-ի ապրիլյան պատերազմից հետո՝ նախագահ Սերժ Սարգսյանի հրամանագրով։ Այդ օրերին գերակշռող էր այն տեսակետը, որ Կարապետյանն ազատվել է պարտականությունները թերի կատարելու եւ պատերազմի օրերին հայկական կողմում խնդիրներ առաջացնելու պատճառով։ Փաշինյանը տեղեկացրեց, որ ոչ ոք իրեն խորհուրդ չի տվել Կարապետյանին նշանակել խորհրդական ու նկատեց, որ ՀՀ Զինված ուժերի ղեկավարության շրջանում կա տեսակետ, որը տարբերվում է նախորդ ղեկավարության կարծիքից։

«Նրանք, ովքեր ասում են, որ Արշակ Կարապետյանն է Ապրիլյան պատերազմի պատասխանատուն, նրանք, ըստ էության, ասում են, որ նրանից վերեւ ոչ մեկ պատասխանատու չէ։ Նրանք, ովքեր հիշատակում են, որ Արշակ Կարապետյանին Սերժ Սարգսյանը հանել է գործից այդ իրադարձությունների արդյունքում, նրանք ասում են, որ Սերժ Սարգսյանը արդար դատավոր է եւ այդ իրավիճակում արդար որոշում է կայացրել։ Ես քառօրյա պատերազմի վերաբերյալ կարդացել եմ տասնյակ, եթե ոչ հարյուրավոր էջերով գաղտնի նյութեր, եւ այդ նյութերում ոչինչ չեմ գտել հետախուզական նյութերի բացակայության մասին»,- հայտարարեց Փաշինյանը։

Այդուհանդերձ, նա նկատեց, որ բոլորի մոտ այդ իրադարձությունների վերաբերյալ դեռ մնացել են մութ հարցեր, ինչը նշանակում է, որ դրանց պատասխանները պետք է տրվեն։ «Եթե որեւէ փուլում հարցեր կծագեն, այս կարգավիճակում Արշակ Կարապետյանն ավելի մեծ պարտավորություն կունենա պատասխանել այդ հարցերին կոնկրետ ու սպառիչ», - հավելեց Փաշինյանը։

Լրագրողների մեկ այլ հարցին, թե արդյո՞ք ապրիլյան պատերազմը պայմանավորված պատերազմ էր, ինչպես պնդում էին տարբեր շրջանակներ, Փաշինյանը պատասխանեց, թե այս ընթացքում բանավոր և գրավոր տեղեկություններ են ստացվում, որոնք դեռ ստուգման կարիք ունեն:

«Ես գիտեմ, որ այդպիսի վարկած կա, եղել է, այն լայնորեն քննարկվել է, բայց մի բանում չկասկածեք՝ մեր բոլոր գործողություններն ուղղված են լինելու մեզ համար կարևոր ճշմարտությունները բացահայտելուն, եթե նույնիսկ դրանք առաջին հայացքից կարող են հակառակ տպավորություն թողնել»,- ասաց Փաշինյանը:

Հարցին՝ Կարապետյանը աշխատել է ըստ պատշաճի, Փաշինյանը նկատեց, որ այս պահին ինքը որեւէ գնահատական չի կարող տալ ու հավելեց. «Ես էլի եմ ասում՝ գաղտնի նյութերին ծանոթանալով ես չեմ գտել, որ հետախուզական տվյալների պակաս ենք ունեցել»։

Լրագրողները նկատեցին, որ Արշակ Կարապետյանը նաեւ 2008-ի մարտիմեկյան իրադարձությունների ժամանակ եղել է 0038 հույժ գաղտնի հրամանով ստեղծված Մարտի 1-ի գործով անցնող Յուրի Խաչատուրովին կից ստեղծված վարչակազմի անդամներից մեկը։ Ի պատասխան՝ Փաշինյանն ասաց, որ դա ոչինչ չի նշանակում եւ հավելեց, որ Հայաստանի Զինված ուժերի ներկայացուցիչների մեծ մասը ներգրավված է եղել այդ պրոցեսների մեջ։

«Հիմա ի՞նչ եք առաջարկում՝ Հայաստանի Զինված ուժերի այդ մի հատվածը կտրե՞նք, անջատե՞նք Զինված ուժերից։ Այդպիսի բան լինել չի կարող»,- հավելեց վարչապետը՝ նկատելով, որ այդ մասով ընթանում է քննություն։

Անդրադառնալով Գյումրիից մեկնարկած քայլարշավի ընթացքում Արշակ Կարապետյանի մասին խարույկի շուրջ իր եւ իր թիմակիցների հայտարարություններին, Փաշինյանն ասաց. «Եթե որեւէ մեկի հասցեին հնչում է հայտարարություն, չի նշանակում, որ այդ մարդու վերաբերյալ կայացվել է դատավճիռ»։