Արմեն Սարգսյանի հանձնարարությամբ ՍԴ անդամի թափուր պաշտոնի հավակնորդի ընտրության համար համապատասխան ընթացակարգ է մշակվում

ՀՀ նախագահ Արմեն Սարգսյանի հանձնարարությամբ Սահմանադրական դատարանի դատավորի թեկնածուի հավակնորդի ընտրության մրցակցային ու թափանցիկ գործընթաց ապահովելու նպատակով լրամշակվում է համապատասխան ընթացակարգ։ Այս մասին «Հայկական ժամանակ»-ին հայտնեցին նախագահի աշխատակազմի Հասարակայնության հետ կապերի վարչությունից՝ ի պատասխան մեր այն հարցի, թե Արմեն Սարգսյանը Սահմանադրական դատարանի դատավորի թափուր պաշտոնի համար պատրաստվո՞ւմ է առաջադրել փաստաբան Վահե Գրիգորյանի թեկնածությունը, եւ եթե ոչ, ապա ո՞ւմ թեկնածությունն է առաջադրելու։

Հիշեցնենք, որ Սահմանադրական դատարանի դատավորի թափուր տեղը շարունակում է դատարկ մնալ։ ՍԴ անդամի թափուր տեղ էր առաջացել, երբ լրացել էր ՍԴ նախկին նախագահ Գագիկ Հարությունյանի պաշտոնավարման ժամկետը: Վերջինս այժմ գլխավորում է Բարձրագույն դատական խորհուրդը, իսկ ՍԴ նախագահը ՀՀԿ-ական Հրայր Թովմասյանն է։

Նախորդ տարվա հոկտեմբերին Արմեն Սարգսյանը Սահմանադրական դատարանի դատավորի թափուր տեղի համար առաջադրել էր Վահե Գրիգորյանի թեկնածությունը՝ ըստ ՀՀ Սահմանադրության 166-րդ հոդվածի 1-ին մասի,  213-րդ հոդվածի եւ  «Ազգային ժողովի կանոնակարգ» սահմանադրական օրենքի 141-րդ հոդվածի 3-րդ մասի համաձայն․ ըստ Սահմանադրության՝ ՍԴ դատավորներին ընտրում է Ազգային ժողովը` պատգամավորների ընդհանուր թվի ձայների առնվազն երեք հինգերորդով, տասներկու տարի ժամկետով: Սահմանադրական դատարանը կազմված է ինը դատավորից, որոնցից երեքն ընտրվում են Հանրապետության նախագահի, երեքը՝ Կառավարության, երեքը` դատավորների ընդհանուր ժողովի առաջարկությամբ, ըստ ԱԺ կանոնակարգի՝ Սահմանադրական դատարանի դատավորի ընտրությունն անցկացվում է Սահմանադրական դատարանի դատավորի պաշտոնը թափուր մնալու դեպքում, ինչպես նաեւ Սահմանադրական դատարանի դատավորի լիազորությունների ավարտին կամ պաշտոնավարման տարիքը լրանալուն նախորդող վեց ամսվա ընթացքում:

Սահմանադրական դատարանի դատավորի նախորդ ընտրության հարցը քննարկվեց Ազգային ժողովի՝ հոկտեմբերի 23-ին գումարված հերթական նիստում։ Սակայն ՍԴ դատավորի թեկնածու Վահե Գրիգորյանը չընտրվեց, ավելի կոնկրետ՝ ՀՀԿ խմբակցության արդեն նախկին պատգամավորները չընտրեցին Գրիգորյանին․ քվեարկությանը մասնակցեց ընդամենը 53 պատգամավոր։ Վահե Գրիգորյանի օգտին քվեարկել էր 30 պատգամավոր, մինչդեռ անհրաժեշտ էր 63 քվե։

Սահմանադրական դատարանի դատավորի թեկնածուի ընտրության՝ հավասար, արդար և թափանցիկ ընթացակարգի հարցը նախորդ տարի բարձրացվել էր ավելի քան 30 հասարակական կազմակերպությունների և 100-ից ավելի փաստաբանների կողմից, ինչին ի պատասխան՝ Արմեն Սարգսյանը հայտարարել էր, որ պատրաստ է լսել այդ հարցում իրավաբանական համայնքի առաջարկությունները  եւ ողջամիտ ժամկետում համապատասխան ընթացակարգով ընտրել եւ առաջադրել թեկնածու:

Նախագահի աշխատակազմի Հասարակայնության հետ կապերի վարչությունից մանրամասնեցին, որ հաշվի առնելով Սահմանադրական դատարանի դատավորի թեկնածուի հավակնորդի ընտրության կարեւորությունը եւ նախորդ փորձը՝ մշակվող ընթացակարգի միջոցով կկանոնակարգվի ՍԴ դատավորի թափուր պաշտոնի համար թեկնածուի առաջադրման գործընթացը, որից հետո Արմեն Սարգսյանի կողմից ընտրված հավակնորդի թեկնածությունը կներկայացվի Ազգային ժողով։

Հաշվի առնելով մի քանի տասնյակ ՀԿ-ների եւ փաստաբանների հետեւողականությունն այս հարցում եւ երկրում տեղի ունեցած իշխանափոխությունը՝ Արմեն Սարգսյանի կողմից Վահե Գրիգորյանի թեկնածությունն առաջադրելու դեպքում վերջինս, ամենայն հավանականությամբ, կընտրվի ՍԴ դատավոր։

Տպել
2610 դիտում

Թյորբորն Յագլանդը հաստատել է ԵԽ-ի լիակատար աջակցությունը ՀՀ բարեփոխումների օրակարգին

ԵԽ գլխավոր քարտուղար Յագլանդը հաստատել է լիակատար աջակցություն ՀՀ բարեփոխումների օրակարգին

ՀՀ մարմնամարզիկները կարեւորագույն ստուգատեսներից առաջ փորձնական մրցումների կմասնակցեն

Նորընտիր ռեկտորը խոստացավ հրաժարականի պահանջին պատասխանել վաղը. ուսանողները հայտարարեցին՝ մինչ այդ բոլորը կմնան շենքում

Բակո Սահակյանը խորհրդակցություն է անցկացրել

60 տարի բեմում լինելու, վիրահատության եւ երաժշտական դադարի մասին պատմում է Ռոզի Արմենը. նա Հայաստանում է

Երաշխիք չունեմ, որ կեսից չեն փոշմանի ու հետ վերցնի. քաղաքապետարանը «Կանազ»-ի շենքը տրամադրելու ռիսկեր է տեսնում

Ազնավուրին ե՛ւ ճանաչում եմ, ե՛ւ չէ, մեր հանդիպումներն այդպես էլ չստացվեցին. Ռոզի Արմեն

ԱԺ խորհուրդը մերժեց արտահերթ նիստ հրավիրելու վերաբերյալ «Լուսավոր Հայաստան» խմբակցության միջնորդությունը

Հայտնի են Իտալիայում տուրիստական ավտոբուսի վթարից վիրավորված հայերի անունները. ԱԳՆ

Դատավորի հեղինակությունը պետք է պաշտպանված լինի. Դատավորների միության հայտարարությունը

Ներկայացվելու են անցումային արդարադատության ինստիտուտի միջազգային իրավական հիմքերը. Արդարադատության նախարարի տեղակալ

Հայաստանը չզիջեց. Ստանիսլավ Զասը կստանձնի ՀԱՊԿ-ի գլխավոր քարտուղարի պաշտոնը 2020 թ. հունվարի 1-ից

ԵԹԿՊԻ-ում իրավիճակը լարված է, ուսանողները փակել են մուտքերն ու ելքերը, խորհրդի անդամներին թույլ չեն տալիս դուրս գալ

Գեղարքունիքի մարզում մոտ 50 միլիոն դրամի յուրացման դեպք է արձանագրվել (տեսանյութ)

Մեկ օրում բացահայտվել է 54 հանցագործություն. ոստիկանություն

Ի՞նչ է կատարվում «Բագրատաշենի» անցակետում. ԱԱԾ-ն հաղորդագրություն է տարածել

Մինչ 2100թ. Լոնդոնն ու Նյու Յորքը կարող են ջրի տակ անցնել. գիտնականները զգուշացում են

Հայաստանի առաջնության հադիպումը կսպասարկի իսպանական մրցավարական անձնակազմը

ՌԴ ԱԴԾ-ն հայտնում է երկու կասկածյալ ահաբեկիչի սպանության մասին