Չի կարելի հարձակվել մարդու վրա իր կարծիքի համար, ՀՀ-ում այլեւս բարձրագույն արժեք է ցանկացած մարդու կարծիք. Ալեն Սիմոնյան

Փետրվարի 20-ին ԱԺ փոխնախագահ Ալեն Սիմոնյանը հայտարարեց Արամ Խաչատրյանի երաժշտության հիման վրա նոր հիմնի տեքստի մրցույթի մասին:

Ավելի վաղ Ալեն Սիմոնյանն այս հայտարարությունն արել էր նաեւ ֆեյսբուքյան իր էջում, որը հանրության շրջանում ակտիվ քննարկումների առիթ էր դարձել: Այսօր շատերը Ալեն Սիմոնյանի այս առաջարկությունն անհեթեթություն են որակում՝ համարելով անիմաստ եւ անկարեւոր զբաղմունք: Շատերի կողմից էլ օրհներգը փոխելու ԱԺ փոխխոսնակի  գաղափարը ճիշտ հակառակ արձագանքին է արժանացել, խրախուսվել եւ մեծ ոգեւորությամբ է ընդունվել, ձեռք բերել նաեւ արվեստագետների աջակցությունը:

«Հայկական ժամանակ»-ի հետ զրույցում Ալեն Սիմոնյանը հայտնեց, որ իրեն բազմաթիվ քաղաքացիներ են զանգում, նամակներով դիմում եւ խնդրում անպայման ավարտին հասցնել սկսածը: ԱԺ փոխխոսնակն ավելի վաղ տեղեկացրել էր նաեւ օրհներգի աշխատանքային խմբի (համալրվող) կազմի մասին`

1․ Դանիել Երաժիշտ Դիրիժոր, երաժշտագետ
2․ Տեր Ասողիկ Հոգեւորական, Մայր Աթոռ
3․ Արամ Սաթյան Կոմպոզիտորների միության նախագահ
4․ Ալեն Սիմոնյան ԱԺ նախագահի տեղակալ
5․ Էդվարդ Միլիտոնյան Գրողների միության նախագահ
6․ Նիկոլայ Կոստանյան Կոմիտասի թանգարան-ինստիտուտի տնօրեն
7․ Արմինե Գրիգորյան Արամ Խաչատրյանի տուն-թանգարանի տնօրեն
8․Հենրիկ Հովհաննիսյան ՀՀ ԳԱԱ թղթակից անդամ, դոկտոր, պրոֆեսոր 
9․ Ֆելիքս Բախչինյան գրականագետ
10․ Դավիթ Գյուրջինյան Լեզվի պետական կոմիտեի նախագահ

Ալեն Սիմոնյանից հետաքրքրվեցինք, թե ինչպես է կազմվել վերը նշված 10 անձից բաղկացած աշխատանքային խումբը: Վերջինս ասաց, որ այնպիսի մարդկանց է առաջարկել, ովքեր ներկայացնում են տարբեր բնագավառներ, ունեն մտածելակերպ եւ հասարակության լայն շերտն են զբաղեցնում:

«Վստահ եմ, որ կազմը կհամալրվի: Երեկ ես մի շատ հայտնի արվեստագետի հետ եմ խոսել, խոսքը, Վահագն Հայրապետյանի մասին է: Նա իր աջակցությունն է հայտնել եւ ցանկություն ունի ներգրավվել աշխատանքային այդ խմբի մեջ: Մնացած մարդկանց մասին էլ չեմ խոսում, եւ եթե իմ առաջարկը վատը լիներ, կարծում եմ՝ նրանք չէին ներգրավվի:

ԱԺ փոխխոսնակից հետաքրքրվեցինք, թե մտավախություն չունի՞, որ առաջարկի շուրջ քարկոծումներն ու քննադատությունները գնալով ավելի մեծ թափով կտարածվեն եւ իր ծրագիրը պարզապես կարող է չիրականանալ. «Նախ եւ առաջ մի բան հասկանանք. չի կարելի մարդուն քննադատել եւ քարկոծել կարծիքի համար: Չի կարելի հարձակվել մարդու վրա իր կարծիքի համար: Հայաստանի Հանրապետությունում այլեւս բարձրագույն արժեք է ցանկացած մարդու կարծիք: Ուստի, ազատ կարծիք հայտնելու իրավունք ունենք բոլորս: Առավելեւս մարդ, որն անցած ճանապարհ ունի՝ օրինակ ես»:

Ալեն Սիմոնյանն ասաց, որ արդեն որոշակի արդյունքի հասել է. նախ՝ ֆիքսվել է, որ միանշանակ չէ վերաբերմունքը գործող օրհներգի՝ «Մեր հայրենիք»-ի նկատմամբ, երկրորդ՝ Հայաստանում կլինի այլընտրանքային օրհներգ, թեկուզ ոչ պաշտոնական՝ կդրվի շրջանառության մեջ:

«Օրհներգը հարգանքի պես մի բան է, այն չես կարող օրենքով սահմանել: Եթե մարդիկ իրենց  սրտերում որոշեցին, որ Արամ Խաչատրյանի երաժշտությունը եւ այն տեքստը, որը կգրվի այդ երաժշտության համար՝ շատ ավելի հոգեհարազատ է, ապա կարեւոր չի լինի, թե օրենքի մեջ ինչ է գրված: Այս փուլում ես դեռ չեմ էլ պատրաստվում օրենսդրական նախաձեռնությամբ հանդես գալ»-ասաց Սիմոնյանը՝ հավելելով, որ պարզապես այլընտրանք է ստեղծում այն բոլոր մարդկանց համար որոնց պայմանականորեն հույս է տվել: ԱԺ փոխխոսնակը նաեւ նշեց, որ չի ուզում այնպես ստացվի, որ մի բան է ասել, ապա իր խոսքից հետ է կանգնել. «Ես այդ մարդը չեմ»:

Հիշեցնենք, որ Ալեն Սիմոնյանը որոշ ժամանակ առաջ ֆեյսբուքյան իր էջում հարցում էր կատարել ՀՀ օրհներգը փոխելու վերաբերյալ, ապա ամփոփել օնլայն հարցման արդյունքները: Ըստ այդ հարցման՝ մարդկանց մեծամասնությունը կողմ է նոր օրհներգին:

Նկատենք, որ 2006 թվականին ստեղծվել էր հանձնաժողով, որը միաձայն քվեարկել էր Արամ Խաչատրյանի երաժշտությանը՝ որպես օրհներգի երաժշտության լավագույն տարբերակ: