«Փյունիկը» 3 տարվա ընթացքում ֆուտբոլային 5-6 ակադեմիա կկառուցի ՀՀ-ում

«Փյունիկ» ֆուտբոլային ակումբը ենթակառուցվածքները զարգացնելու լուրջ նպատակներ է դրել: Առաջիկա 3 տարիների ընթացքում նախատեսում է 5-6 ակադեմիա ունենալ ողջ Հայաստանում: Այս մասին այսօր՝ մարտի 1-ին, լրագրողների հետ հանդիպման ժամանակ ասաց սեփականատեր Արթուր Սողոմոնյանը: Նա պատմեց, որ Դիլիջանում արդեն կառուցվում է առաջինը, եւ եւս 4-5-ը կկառուցվեն առաջիկա տարիներին:

«2 ուղղություն ենք վերցրել՝ սոցիալական եւ սպորտային: Սոցիալականը կապված է ՀՀ-ում մանկապատանեկան ֆուտբոլի զարգացման հետ, որը մեծ ջանքեր ու ներդրումներ է պահանջում: Բոլորս հասկանում ենք, որ դա ներդում է ապագայի համար, բիզնես չէ: Բացի Երեւանի բազայից, որը նույնպես պետք է լրջորեն զարգացնել՝ այս տարի ստեղծում ենք մասնաճյուղ Դիլիջանում: Սկսել ենք կարգի բերել խաղադաշտը, որ վերջին մի քանի տարիների ընթացքում չի օգտագրծվել: Պայմանագիր ենք կնքել Դիլիջանի UWC դպրոցի հետ Ռուբեն Վարդանյանի, դաշտը պատկանում էր նրան: Մարտից կսկսենք շինարարական աշխատանքները: 1 ակադեմիայով կանգ չենք առնելու: Նախատեսում ենք 3 տարում եւս 4-5 ակադեմիա կառուցել ՀՀ-ում»,- ասաց նա՝ ավելացնելով, որ ակագայում իրենք շեշտը դնելու են հենց իրենց սաների վրա:

Դիլիջանում ակադեմիա կառուցելու համար, Սողոմոնյանի խոսքով, մոտ 400 հազար դոլար է անհրաժեշտ: Պետք է զրոյից կառուցել նոր խաղադաշտ, բարեկարգել մարզադաշտի շրջակայքը, վերանորոգել հանդերձարանները եւ մասնաշենքը, այնուհետեւ անհրաժեշտ է անձնակազմ հավաքել: Սողոմոնյանն ընդգծում է, որ իրենց ծրագրերն իրականացնելու հարցում համագործակցում են Հայաստանի ֆուբոլի ֆեդերացիայի հետ:

«Մյուս տարի մեզ կընդգրկեն ծրագրում, որով ՈՒԵՖԱ-ն գումար է տրամադրում արհեստական խաղադաշտեր կառուցելու համար»,- ասաց նա:

Սողոմոնյանը գիտակցում է, որ միայն ակադեմիաներով չէ, որ երեխաների վարպետությունը կարելի է զարգացնել: Նա լուրջ կապեր ունի ֆուտբոլում եւ արդեն հիմա փորձում է օգտագործել դրանք սաների համար: Վերջերս «Փյունիկի» մի քանի պատանիներ մի քանի օր մարզվեցին Մադրիդում՝ իսպանական «Լեգանեսի» ակադեմիայում: Նրանք նաեւ ներկա գտնվեցին Մադրիդի «Սանտիագո Բեռնաբեու» մարզադաշտում կայացած Իսպանիայի առաջնության «Ռեալ»-«Խիրոնա», ինչպես նաեւ Չեմպիոնների լիգայի 1/8 եզրափակչի «Ատլետիկո»-«Յուվենտուս» խաղերին: Շուտով մի քանի երեխաներ էլ մեկնելու է Ռուսաստան՝ «Կրասնոդարում» մարզվելու:

Սողոմոնյանը շատ է կարեւորում սպորտի դերը երեխաների՝ որպես անհատ զարգացման հարցում: Մյուս կողմից գիտակցում է, որ սպորտով տարվելով երեխաները հաճախ աչքաթող են անում կրությունը: Այդ պատճառով պատրաստվում են ինտերնատ ստեղծել:

«Մանկապատանեկան ֆուտբոլը պարզապես սպորտ չէ, այն դաստիարակության կարեւոր բաղադրիչ է: 3 երեխայի ծնող եմ, 3-ն էլ զբաղվում են սպորտով: Հասկանում եմ, որ սպորտը կարող է ավելին տալ, քան ծնողը: Այն սովորեցնում է պայքարել, սովորել դրսեւորել քեզ կոլեկտիվում, դիմակայել սթրեսներին: Գաղտնիք չէ, որ, երբ տարվում են սպորտով, ֆուտբոլով, կրթությունը հաճախ տուժում է: Հիմա տեսնում ենք, որ բազմաթիվ երիտասարդ ֆուտբոլիստներ բացեր ունեն կրթության հարցում: Մյուս տարվանից ստեղծելու ենք ինտերնատ: Հայաստանի լուրջ դպրոցների հետ պլանավորում ենք 2020 թ. գործի դնել «Փյունիկ սպորտային ինտերնատը»: Հուսով ենք՝ մեր օրինակը վարակիչ կլինի»,- ասաց նա:

«Փյունիկը» չի մոռանում նաեւ մեծ ֆուտբոլում հաջողությունների մասին: Գլխավոր նպատակը միջազգային ասպարեզում բարձր մակարդակով հանդես գալն է: Ակումբի ղեկավարությունը ցանկանում է, որ թիմը խաղա Եվրոպա լիգայի խմբային փուլում:  

«3-4 տարում պետք է այնպիսի թիմ ստեղծենք, որը կկարողանա խաղալ Եվրոպա լիգայի խմբային փուլում»,- ասաց Սողոմոնյանը:

Հեռու գնացող նպատակներ դնելու հետ մեկտեղ «Փյունիկի» ղեկավարությունը կարեւորում է նաեւ ակումբի խորհրդանիշները: Այսօր ներկայացվեց նոր տարբերանշանը: Դրա հիմնական բաղադրիչների է նուռը, որը, ինչպես Սողոմոնյանը բացատրեց, նշանակում է միասնություն: «Փյունիկի» հիմնական գույնը նռնագույնն է լինելու: Այդ գույնի են լինելու մարզաշապիկները: Այսօր ներկայացվեց նաեւ «Փյունիկի» նոր կայքը՝ fcpyunik.am:

Ահա, թե ինչ է նշանակում ակումբի նոր տարբերանշանը.