Նիկոլ Փաշինյանի հանձնարարականը Գյումրիում չի կատարվել

Գյումրիում ընթացքող փողոցաշինական աշխատանքներում տեղ գտած բազմաթիվ թերությունների մեջ գերակշիռ է հատկապես շինարարական կուլտուրայի բացակայությունը: Այս մասին դեռեւս ապրիլի 5-ին փաստել էր վարչապետ Նիկոլ Փաշինյանը Գյումրի կատարած այցի ընթացքում, երբ քայլելու ընթացքում ուղղակիորեն հյուրերը հայտնվել էին ավազաբլրի գագաթին, այնուհետ քարակույտերի մեջ եւ փոսերում: Այդ օրը շինարարներին քանդված փողոցներն արագ կարգի բերելու եւ հետիոտնի համար ժամանակավոր անցումներ ստեղծելու հանձնարարություն էր տրվել:

«Լավ է, որ ծրագիր ենք իրականացնում, բայց էս ընթացքում մեր ճարտարապետները, շինարարները մտածու՞մ են, թե քաղաքացին որտեղով է քայլելու, գնալու, գալու: Սա մայթ է եղել, քանդել են, հա, շատ լավ է, շատ պոզիտիվ է, բայց մտածե՞լ եք, ասենք հիմա կաբլուկով կանայք ո՞նց են քայլելու: Մայթը քանդած է, փողոցը քանդած է»,- հարցրեց վարչապետը: Սամվել Բալասանյանն ասաց՝ խճապատում ենք, քայլում են, մինչեւ կարողանանք վերջնական ասֆալտապատել: Իմ ասածը հետեւյալն է, որ եթե շինարարություն ենք սկսում, կապ չունի՝ ինչ շինարարություն է, պետք է մտածենք միջավայրի մասին: Հիմա, ասենք էդ շինարարությունը մի տարի տեւեց, մենք գյումրեցիներին ասում ենք՝ գնացեք Գյումրիից, մի տարուց հետո կգա՞ք: Էդ մի տարվա ընթացքում պարտավոր եք իրա միջավայրն ապահովեք: Հիմա մեր բոլոր շինհրապարակների 90 տոկոսն աղբանոց է: Բայց մենք նորմեր ունենք, չէ՞: Բերեք գնանք Եվրոպա, ցանկացած տեղ: Տեսնենք՝ նման վիճակ որտե՞ղ կա, որ մայթը քանդեն, փողոցը քանդեն, քաղաքացին քայլելու տեղ չունենա»,- ասել էր վարչապետը:Մեկ ամսից ավել է անցել վարչապետի այցից, խնդիրը, սակայն, լուծվելու փոխարեն ավելի է խորացել:  Դեռ նախորդ տարվանից սկսած՝ բոլորը Գյումրիում ոչ թե քայլում, այլ բառի ուղիղ իմաստով ոստոստում են փողոցներում: Եթե ձմռան ամիսներին խնդիրն առավել մեղմ էր, եւ ձյան շերտը որոշակի առումով բարձրություն էր ապահովում մայթի եւ մայթից ներքեւ առկա փոսի մեջ, հիմա պատկերն առավել քան աննկարագրելի է: Բարձր մայթից բոլորը չէ, որ կարողանում են սահուն վայրէջքով իջնել, նաեւ քչերի ոտքերն ունեն մինչեւ 60 եւ ավելի աստիճան բացվելու հնարավորությունը, որ կարողանան առանց հենման կետի փողոց-փոսից բարձրանան մայթ, վայրէջք-վերելք ռեժիմով մի կերպ ճանապարհը շարունակեն: Ընկնել-բարձարանալով, իրար քաշել-քաշքշելով մի կերպ ամբողջ Գյումրին երթեւեկում է:

Ո՞վ էր պատասխանատու վարչապետի հանձնարարականի կատարման համար եւ ինչո՞ւ շինարարն այդպես էլ կամրջակներ չի ապահովում՝ ՀԺ-ի հարցին Շիրակի մարզպետ Տիգրան Պետրոսյանը պատասխանեց՝ ես էլ կուզեի այդ հարցի պատասխանն իմանալ: «Որովհետեւ մենք էդ խնդիրը քննարկել ենք, քանի որ կարճ ժամանակավոր գործընթաց էր, պետք է արագ խնդիրը լուծվեր: Այնպես չի, որ գյումրեցիները սկզբունքայնորեն բողոքում են, թե ինչու եք մեզ անհանգստացնում, հասկանալով, որ այդ անհարմարությունները հարմարություն ստանալու համար են: Բայց, երբ որ էդ անհարմարությունը խորանում է, ապա կամրջակի բացակայությունը դառնում է լուրջ խնդիր: Հիմա կուզենանք հասկանանք, թե խնդիրն ինչումն է, նախագծման խնդի՞ր է եղել, շինարարի կողմի՞ց է թերությունը: Վաղը քննարկում ունենք Երեւանում, կհասկանանք»:

Այս հարցին որոշակի պատասխան ունի քաղաքապետ Սամվել Բալասանյանը: Ասում է՝ խոսել է շինարարների հետ: «Դե մի քանի փայտից կամրջակ դրել են, ասում են՝ մարդիկ գողացել, տարել են, դրա համար էլ նորերը չեն դնում»:

Իրավապահ համակարգից փողոցաշինության մասով ինչու՞ էիք դժգոհել՝ հարցրեցին լրագրողները: Տիգրան Պետրոսյանն ասաց՝ հատուկ այդ նպատակով չէ, որ հանդիպել է Նիկոլ Փաշինյանի հետ: Եղել է ընդհանուր քննարկում, որին նաեւ իրավապահներն են մասնակցել, եւ ի թիվս այլ հարցերի, նաեւ դրա մասին է բարձրաձայնել եւ ընդգծել, որ մեկ տարի առաջ, երբ քաղաքացին գոռում էր «ոստիկանը մերն է», ապա այսօր նաեւ դրա շարունակականության ապահովումն է անհրաժեշտ:

«Խոսքն անձերի մասին չէ, այլ երեւույթի, իրավապահ համակարգի նկատմամբ հանրային վստահության ավելի բարձր մակարդակ ապահովելու մասին է: Էսօր շատ են բողոքները, ես, որպես մարզպետ, դրանք ստանում եմ, նաեւ ֆեյսբուքյան հարթակում եմ տեսնում, սկսած երթեւեկության խախտումից մինչեւ փոսն ընկած առաջին մարդուց, դա հասնում է Շիրակի  մարզպետարան, մարզպետ, այնուհետ Գյումրու քաղաքապետարան, քաղաքապետ եւ այլն: Շինարարության ընթացքը դադարեցնել, մեղավորներ գտնել, սրան դատել, կամ նրան, ինքնանպատակ չէ: Նպատակն է՝ Շիրակի  մարզում եւ Գյումրիում ունենալ որակյալ ճանապարհներ՝ ճիշտ շինարարական գործընթացով: Բոլորս հասկանում ենք, թե ինչքան կարեւոր է այսօր օր շուտ, բայց ոչ որակի հաշվին, Գյումրիում ավարտել փողոցաշինությունը: Կան գործընթացներ, որոնք կանգնեցնում են մեր քաղաքի համար կենսական նշանակություն ունեցող պրոցեսը, որն էլ ներկայացվել է վարչապետին: Ունենք ունիկալ իրավիճակ, ունենք գումար, ունենք շինարար, ունենք պատվիրատու, ունենք նախագծող, ունենք վերահսկող, ունենք հանրային դժգոհություն, ունենք երկար ձգվող շինարարական աշխատանքներ, եւ էս ամեն ինչի արդյունքում՝ անվտանգության հետ կապված ռիսկեր: Այսօր ոչ թե հարցը դրվում է՝ գտնել, պատժել մեղավորին, այլ հակառակը: Ասֆալտ անողներին ասֆալտին փռելու խնդիրը չկա»,-պաշտոնավարման 100 օրվա առիթով կազմակերպված ասուլիսի ժամանակ ասաց Շիրակի մարզպետ Տիգրան Պետրոսյանը: