Կրակեց, կպավ թեւիս, թեւս պոկվեց, կախվեց, արյունաքամ էի լինում. ոստիկան Գագիկ Մկրտչյանի քույրը մանրամասնում է

Երեւան քաղաքի ընդհանուր իրավասության դատարանի Շենգավիթի նստավայրում՝ դատավոր Մեսրոպ Մակյանի նախագահությամբ, շուրջ մեկ ամիս տեւած դադարից հետո շարունակվում է «Սասնա ծռեր» խմբի 10 անդամների գործով դատական նիստը:

Սույն գործով նախորդ նիստը տեղի էր ունեցել ապրիլի 17-ին, որից հետո դատարանը գնացել էր արձակուրդ:

Դատարանում այսօր հարցաքննվեց ՊՊԾ գնդի գրավման օրերին հրազենային վիրավորում ստացած եւ մի քանի օր անց հիվանդանոցում մահացած ոստիկան Գագիկ Մկրտչյանի քույրը՝ Մերի Մկրտչյանը: Նա հայտնեց, որ առավոտյան ժամը 8-ին, դեպքի օրը, իրեն է զանգահարել հարսի քույրը եւ ասել, որ ՊՊԾ գնդի վրա հարձակում է տեղի ունեցել եւ Գագիկի վրա կրակել են: «Գնացինք հիվանդանոց, բավականին երկար տեւեց վիրահատությունը, բժիկները սկզբում որ դուրս էին գալիս, ասացին, որ ձեռքի վիրավորում է ստացել, բժիշկը ներկայացրեց, որ ձեռքը վիրավորվել է եւ փամփուշտը մտել է մի կողմից, մյուսից դուրս է եկել եւ ամբողջ աղիքները, լյարդը, ստոծանին, ամբողջը վնասված է, բավական բարդ վիրահատություն էր եւ մոտ 6-5 ժամ տեւեց: Դրանից հետո շատ իրարամերժ ինֆորմացիաներ էր պտտվում համացանցում. գրում էին, որ ներսում եղել են կրակոցներ որ ոստիկաններն են իրար վրա կրակել, իբր Գագիկը վիրավորվել է ոստիկանի փամփուշտից: Բոլորս սպասում էինք հույսով, որ նա կարթնանա եւ կպատմի: Փառք Աստծո, նա արթնացավ, բժիշկը թողեց երկու հոգու մտնել, սկզբում պատմել է Հասմիկին, որից հետո ես եմ ներս մտել, առաջին հարցը, որ եղել է Գագիկին՝ ո՞վ է իրեն խփել, արդյոք ոստիկաներն են խփել: Գագիկը ասաց՝ ոչ, իրեն խփել է Սասնա ծռերի անդամներից մեկը, թե ով՝ չեմ կարող ասել, որովհետեւ ինքը կցկտուր էր խոսում, պատմեց՝ երկու-երեք հոգով մտել են, դուռը կոտրել են, մտել են ներս, ասել են՝ պառկի, պատմեց, որ շատ մոտիկից է կրակոցը եղել: Նա ասաց, որ կրակեց, կպավ թեւիս, թեւս պոկվեց, կախվեց, իրենք վերցրեցին իրանց մայկով թեւս կապեցին, բայց, թույլ չեն տվել, որպեսզի դուրս գա: Գագիկը պատմեց՝ արյունաքամ էի լինում, խնդրում էի, որպեսզի դուրս գամ, ասեցին՝ ոչ, սպասի: Ահագին ժամանակ հետո նոր թողել են, իր ծառայակից ընկերներից մեկին կանչել են  օգնել են, որպեսզի դուրս գա»,- պատմեց ոստիկանի քույրը:

Մեղադրող դատախազ Պետրոս Պետրոսյանի հարցին՝ ձեր կողմից նկարագրված իրադարձությունները ո՞ր հիվանդանոցում են եղել, Մերի Մկրտչյանը պատասխանեց, որ Առաջին համալսարանական հիվանդանոցում է եղել, այնտեղ մտել, խոսել են դեպքից 2-3 օր հետո: «Բժիշկը ասաց, որ լյարդը շուտ վերականգնվող է, բայց, իհարկե, կրիտիկականը 7-րդ օրն է, քանի որ աղիքներն էլ պետք է կպնեն: 4-րդ օրը շատ ուրախացանք, որովհետեւ լյարդը շուտ վերականգնվեց, հետո շատ չէին թողնում խոսեինք, ուժ էր պետք, վստահ էինք, որ կլավանա, նոր հարցադրումներ կանեինք: Իհարկե, ես ինքս այդ պահին համացանցում ում նկարը որ տեսնում էի «Սասան ծռեր» խմբի անդամներից հարցնում էի Գագիկին՝ սա՞ է խփողը, թե՝ ոչ, ինքը գլխով ասում էր՝ ոչ»,- ասաց Մերի Մկրտչյանը: Դատախազի ճշտող հարցին ի պատասխան վկան ասաց, որ ցույց է տվել Պավել Մանուկյանի, ապա խմբի անդամներից բանդանայով եւ ակնոցով մեկի լուսանկարը:

Վկա Մերի Մկրտչյանի հարցաքննությունը շարունակվում է:

Նշենք, որ Գագիկ Մկրտչյանի սպանության մեջ մեղադրվում է «Սասնա ծռեր» խմբի անդամ Արմեն Բիլյանը, որն առաջադրված մեղադրանքում իրեն մեղավոր չի ճանաչում: