Ինչ է կատարտվում ՀՀ ֆուտբոլի ազգային հավաքականի ներսում. կուլիսների հետեւում

Մինչեւ ՀՀ ֆուտբոլի ազգային հավաքականի մարզաշապիկը հագնելն ու խաղադաշտ դուրս գալը թիմի ճամբարում ծավալվում են իրադարձություններ՝ կա ներքին խոհանոց, որը հասանելի չէ երկրպագուներին: Հասանելի չէ, սակայն հետաքրքիր է՝ ինչ են անում ազատ ժամանակ, ինչպես են շփվում: Եվրո 2020-ի ընտրական փուլի վերջին ուղեւորության ընթացքում ՀԺ-ն թիմի հետ էր ու նրանց ներսից տեսնելու հնարավորություն է ունեցավ:

Հունաստանի դեմ 4-րդ տուրի արտագնա հանդիպումից առաջ, իհարկե, խաղացողներն կենտրոնացած ու լուրջ էին, բայց լարվածություն չէր նկատվում: Երեւանում մինչեւ թռիչքը նրանք ինքնաթիռում նույնիսկ հասցրեցին բլոտ խաղալ:

Այն, որ թիմը դրական է տրամադրված նկատելի էր լրագրողների հետ նրանց շփումից, հարցերին տրված պատասխաններից: Առաջիկա հանդիպումների, դրանցից սպասելիքների, մրցակիցների վերաբերյալ հարցերին ֆուտբոլիստները սովորաբար նույնատիպ պատասխաններ են տալիս, որ ամեն ինչ անելու են, ներդնելու են ողջ ուժերը, որ գիտեն, որ երկրպագուներին հիասթափեցնել չի կարելի:

Այս անգամ այդ նույն պատասխանները հնչում էին ոչ թե ինչպես միշտ, այլ նկատելի վստահությամբ: Ընտրական փուլի առաջին 2 տուրերում կրած պարտություններից հետո ընտրանու որոշ խաղացողներ ասում էին, որ հավատի պակաս կա: Այս անգամ երեւում էր նաեւ, որ այդ առումով իրավիճակը փոխվել է: Նրանք էլ նշում էին, որ Լիխտենշտեյնի նկատմամբ հաղթանակը վսահություն է ներշնչել: Նաեւ ընդգծում էին, որ թիմում մթնոլորտը շատ լավ է:

Ընդհանուր առմամբ թե Լիխտենշտեյնի, եւ թե Հունաստանի դեմ հանդիպումներում հենց առաջին րոպեներից էլ զգացվում էր, որ նրանք հստակ գիտեն՝ ինչ պետք է անեն ու իրենց ուժերի սահմաններում անում են: Այլ հարց է, որ միաժամանակ մրցակիցների եւ հատկապես Հունաստանի մոտ չէր ստացվում օգտագործել ողջ հնարավորությունները:

Ինչ վերաբերում է նրան, թե ինչ էր կատարվում հանդերձարանում Հունաստանի դեմ խաղից հետո, ապա Հայաստանի ֆուտբոլի ֆեդերացիայի այս լուսանկարն արդեն հասցրել է տարածվել սոցիալական ցանցերում ու լրատվամիջոցներում:

^{ՀՖՖ-ի լուսանկարը հանդիպումից հետո հանդերձարանում}

Այն ժամանակ, երբ խառը գոտում հույն ֆուտբոլիստները պարտության մասին խոսում էին իրենց լրատվամիջոցների հետ, հայերի հանդերձարանից պարբերաբար ուրախ բացականչություններ էին լսվում:

Աթենքի օդանավակայանում ֆուտբոլիստները բարձր տրամադրությամբ ու սիրով լուսանկարվում էին ցանկացողների հետ, ու կարծես թե ամենեւին էլ հոգնած չէին ծանր հանդիպումից հետո, թեեւ արդեն բավական ուշ ժամ էր: Նույն տրամադրությունը շարունակվեց արդեն դեպի Հայաստան թռիչքի ժամանակ: Ողջ ընթացքում ֆուտբոլիստները տոնում էին, շփվում, երաժշտություն լսում:

Ի դեպ, թիմում Հենրիխ Մխիթարյանն ամենեւին էլ իրեն գերաստղ չի զգում: Երեւանում լինում է, որ հանդիպումներից հետո ոչ թե թիմի հետ ավտոբուսով, այլ առանձին մեքենայով է հեռանում մարզադաշտից, եւ դա տպավորություն է ստեղծում, որ իրեն հեռու է պահում, սակայն թիմակիցների հետ տեսնելիս նման կարծիք չի առաջանում: Նա շփվում է խաղընկերների հետ, կատակում: Մյուս կողմից հավաքականում համեմատար նորերն էլ իրենց կաշկանդված չեն զգում:

Այսպիսով հավաքականների հերթական փուլը հայ ֆուտբոլիստները եզրափակում են բարձր նոտայով ու լուրջ նվաճման փոքրիկ հույս են արթնացնում երկրպագուների մոտ: Հատկապես Հունաստանի՝ Եվրոպայի 2004 թ. չեմպիոնի նկատմամբ հաղթանակից հետո (անկան նրանից, որ հույների մոտ սեւ շրջան է) ընտրանուց սպասելիքները մեծանալու են:

Սա հայերի 2-րդ անընդմեջ հաղթանակն էր Լիխտենշտեյնին տանը 3:0 հաղթելուց հետո: Հույների համար էլ իտալացիներին 0:3 հաշվով պարտվելուց հետո 2-րդ անընդմեջ պարտությունն էր: ՀՀ-ն միավորների քանակը հասցրեց 6-ի ու շրջանցելով Հունաստանին հայտնվեց 3-րդ տեղում: Առաջինն Իտալիան է (12 միավոր), 2-րդը՝ Ֆինլանդիան (9), 4-րդը՝ Հունաստանը (4), Բոսնիա եւ Հերցեգովինան նույնքան միավորով 5-րդն է: Վերջինը՝ 6-րդը, Լիխտենշտեյնն է, որը միավորներ չունի: