Մենք չենք միանում այդպիսի նախաձեռնություններին․ պետք է կոնկրետ հիմք լինի․ Պետրոսյանը՝ «Իմ քայլի» որոշման մասին

Հրայր Թովմասյանն իմ աչքի լույսը չէ, բայց դա չի խանգարելու ասել ճշմարտությունը։ Այս մասին այսօր խորհրդարանական խմբակցությունների ճեպազրույցների ժամանակ ասաց ԲՀԿ-ական պատգամավոր Գեւորգ Պետրոսյանը՝ անդրադառնալով ՍԴ նախագահ Հրայր Թովմասյանի լիազորությունները դադարեցնելու գործընթաց սկսելու վերաբերյալ «Իմ քայլը» խմբակցության որոշմանը։

«ՍԴ մասին սահմանադրական օրենքում սպառիչ թվարկված են այն հիմքերը, որոնք բավարար են, որ ՍԴ-ն որոշում կայացնի իր անդամի լիազորությունները դադարեցնելու վերաբերյալ։ Հիմա նախաձեռնությամբ հանդես եկող «Իմ քայլը» պարտավոր է ՀՀ գործող օրենսդրության համաձայն՝ պատգամավորների ընդհանուր թվի 3/5-ով ներկայացնել այդ նախաձեռնությունը։ Թե ինչպիսի որոշում կներկայացնի ՍԴ-ն, մենք իրավունք չունենք կանխակալ կարծիք հայտնել»,- ասաց Պետրոսյանը։

Արման Աբովյանն էլ թեեւ ասաց, որ հարցի շուրջ քննարկումները շարունակվում են, բայց նման կարծիքները գնահատեց որպես դատարանի նկատմամբ ճնշող․

«Թողնենք, թող դատարանը որոշի։ Որովհետեւ սպառիչ թվարկած են հիմքերը, եթե ՍԴ-ն կգտնի, որ Հրայր Թովմասյանը հարուցել է ՍԴ մասին օրենքի զայրույթը, թող որոշում կայացնի։ Բայց մենք այն քաղաքական ուժը չենք, որ միանանք ինչ-որ նախաձեռնության, առանց դրա հիմքերն ուսումնասիրելու եւ վերլուծելու։ Այս պահին մենք նման հիմք չենք տեսնում։ Այս պահին ՍԴ-ում չկա վիճակ, որը լինի անկառավարելի, մարմինը գործում է, այլ է խնդիրը, որ առանձին անձինք չեն ներկայանում նիստերին, որոշումների ընդունմանը չեն մասնակցում, բայց իրենց գոյության մասին այլ կերպ են հիշեցնել տալիս»,- ասաց Աբովյանը՝ նշելով, որ առաջարկվող մեխանիզմը բավականին մշուշոտ է։ Պետք է իրավական դաշտում բոլոր խնդիրները բացառապես իրավական դաշտում լուծվեն։ Այս կամ այն խնդրի լուծումը իրավական սահմաններից դուրս գալու դեպքում վտանգ է պարունակում։ Մենք բոլոր քննարկումների համար բաց ենք, բայց իրավական առումով պրոցեսի վերջնակետը մի քիչ անհասկանալի է։

Գեւորգ Պետրոսյանն իր հերթին հավելեց, որ իրենք չեն միանում այդպիսի նախաձեռնություններին, որովհետեւ պետք է լինի կոնկրետ հիմք։

Թե իրենք ի՞նչ տարբերակներ ունեն դատաիրավական համակարգի հանդեպ հանրության վստահությունը վերադարձնելու համար, Արման Աբովյանը պատասխանեց, որ դատական համակարգը բարեփոխումների կարիք ունի, այո՛, եւ իսկապես գոյություն ունի վստահության պակաս, բայց բոլոր պրոցեսները պետք է լինեն իրավական դաշտում։

Գեւորգ Պետրոսյանն էլ ասաց, թե մենք ուղղակի քար կգցենք իրավական պետություն գաղափարի վրա, եթե ամեն իշխանություն ուզենա իր դատարանը բերել,

«Այսօր իրավական համակարգի ոլորտի առնվազն 80 տոկոսը նախկին իշխանության օրոք են նշանակվել։ Հիմա եթե էս իշխանության օրոք չեն նշանակվել, ուրեմն, վստահություն չե՞ն ներշնչում։ Դրանից ավելի արագ կործանվել հնարավոր չէ։ Եթե վիրահատական միջամտություն լինի, 250 դատավոր դուրս գան, ովքե՞ր են իրականացնելու արդարադատություն։ Այդ դեպքում գալիք իշխանությունն էլ չի վստահելու այսօրվա իշխանության կարգած դատավորներին»,- եզրափակեց Պետրոսյանը։