Մխիթարյանը «Ռոմա»-ի եւս մեկ կարեւոր հանդիպում բաց կթողնի

Հայաստանի ֆուտբոլի ազգային հավաքականի եւ «Ռոմա»-ի կիսապաշտպան Հենրիխ Մխիթարյանն իր ակումբի եւս մեկ կարեւոր հանդիպում բաց կթողնի: Նա չի մասնակցի վաղը՝ նոյեմբերի 2-ին, կայանալիք Ա Սերիայի 2019-20 մրցաշրջանի 11-րդ տուրի «Նապոլի»-ի դեմ խաղին: «Գայլերի» պաշտոնական կայքը հրապարակել է հայտացուցակը, որում ընդգրկված 19 ֆուտբոլիստների ցուցակում հայ ֆուտբոլիստի անունը չկա:

«Նապոլի»-ի դեմ տնային հանդիպումը կարեւոր է ոչ միայն որպես ուժեղ մրցակիցների դիտարժան դիմակայություն: Նաեւ մեծ նշանակություն ունի մրցաշարային տեսանկյունից: Այն կարող է փոխել Իտալիայի առաջնության մրցաշարային աղյուսակի վերին հատվածի դասավորվածությունը: Այս պահին «Ռոմա»-ն 4-րդն է 19 միավորով: «Նապոլի»-ն 18 միավորով 7-րդ տեղում է եւ հաջողության դեպքում կարող է բարելավել մրցաշարային դիրքերը, վեր բարձրանալ՝ միաժամանակ խանգարելով «Ռոմա»-ին:

Սա կլինի հռոմեական թիմի 7-րդ հանդիպումը, որին Մխիթարյանը չի մասնակցում վնասվածքի պատճառով: Նա բաց է թողել Եվրոպա լիգայի 2 եւ Ա Սերիայի 4 խաղ: Դրանց թվում է Ա Սերիայի 9-րդ տուրի «Միլան»-ի դեմ խաղը՝ առաջնության կենտրոնական հանդիպումներից մեկը:

Այս ընթացքում կիսապաշտպանը չի կարողացել օգնել նաեւ Հայաստանի ֆուտբոլի ազգային հավաքականին: Նա թիմի հետ չի եղել հոկտեմբերին կայացած Եվրո 2020-ի որակավորման փուլի Լիխտենշտեյնի ու Ֆինլանդիայի դեմ հանդիպումներում: Եվ արդեն մոտ են ընտրական փուլի վերջին 2 խաղերը, որոնք տեղի են ունենալու նոյեմբերի 15-ին եւ 18-ին եւ որոնցում մրցակիցները լինելու են համապատասխանաբար Հունաստանն ու Իտալիան:

Օրեր առաջ Ռոմայի» գլխավոր մարզիչ Պաուլու Ֆոնսեկան ասել է, որ նրա վերադարձը մոտ է: Արտասահմանյան սպորտային պարբերականները նշում են, որ ֆուտբոլիստը զգուշություն է ցուցաբերում եւ այդ պատճառով էլ չի մասնակցի «Նապոլի»-ի դեմ խաղին: Լրատվամիջոցները կարծում են, որ նա գուցե վերադառնա Եվրոպա լիգայի խմբային փուլի 4-րդ տուրի Մյունխենգլադբախի «Բորուսիա»-ի դեմ արտագնա խաղում, որը տեղի է ունենալու նոյեմբերի 8-ին:

Մխիթարյանը վնասվածք էր ստացել սեպտեմբերի 29-ին կայացած Ա Սերիայի 6-րդ տուրի «Լեչե»-ի դեմ արտագնա խաղում, որում «Ռոմա»-ն հաղթել էր 1:0: Այդ խաղում նա 56-րդ րոպեին Էդին Ջեկոյին գոլային փոխանցում էր կատարել: Հետագայում վնասվածքի պատճառով չէր կարողացել ավարտել հանդիպումը եւ փոխարինվել էր: