ՀՀ ֆուտբոլի հավաքականը երանելի վիճակում չէ. գլխավոր մարզիչ

Մի շարք ֆուտբոլիստների վնասվածքները ծանր վիճակի մեջ են դրել Հայաստանի ֆուտբոլի ազգային հավաքականին: Այս մասին այսօր՝ նոյեմբերի 14-ին, լրագրողների հետ հանդիպման ժամանակ ասաց նորանշանակ գլխավոր մարզիչ Աբրահամ Խաշմանյանը: Բազմաթիվ խաղացողներ, այդ թվում՝ թիմի ավագն ու առաջատար Հենրիխ Մխիթարյանը, վնասվածքների պատճառով չեն կարող մասնակցել Եվրո 2020-ի վերջին 2 տուրերի՝ Հունաստանի եւ Իտալիայի դեմ խաղերին: Վաղը «Հանրապետական» մարզադաշտում կայանալիք 9-րդ տուրի Հունաստանի դեմ խաղից առաջ Խաշմանյանը խոսել է թիմի վիճակի մասին:

- Ի՞նչ վիճակում է թիմը, ի՞նչ խնդիր է դրված Ձեր առջեւ առաջիկա 2 խաղերում:

- Գաղտնիք չէ, որ այնքան էլ երանելի վիճակում չենք՝ հաշվի առնելով բազմաթիվ ֆուտբոլիստների կորուստը, բայց սա ֆուտբոլ է, ամեն ինչ պատահում է, մենք իրավունք չունենք կառչելու դրանից եւ բացասական մտածելու: 3 օր ունեցել ենք, 3 օրվա մեջ փորձել ենք անել առավելագույնը: Կարող եմ ասել, որ հավաքականը պատրաստ է վաղվա խաղին: Նպատակը մեկն է՝ քաղել առավելագույնը:

- Ի՞նչ կարծիք ունեք Հունաստանի հավաքականի մասին:

- Լավ ուսումնասիրել ենք Հունաստանի հավաքականը: Դուք էլ լավ գիտեք՝ ամբողջովին կազմը փոխված է: Դիտել եմ վերջին 2 խաղերը՝ Իտալիայի ու Բոսնիա եւ Հերցեգովինայի դեմ խաղերը: Կարող եմ ասել, որ շատ կազմակերպված եւ արդյունավետ ֆուտբոլ են խաղում:

- Հենրիխ Մխիթարյանի բացակայությամբ ո՞վ է կրելու ավագի թեւկապը: Ինչո՞վ եք առաջնորդվել ընտրելիս:

- Ավագի թեւկապը կրելու է Հովհաննես Համբարձումյանը: Առաջնորդվել ենք նրա փորձառությամբ: Գիտեք, առավել եւս այս 3-4 օրվա ընթացքում էլ հասկացա, որ նա ունի առաջատարի բնավորություն:

- Իտալական մամուլում տեղեկություն էր տարածվել, որ ՀՖՖ-ն Մխիթարյանին հրավիրել է հավաքական՝ Հունաստանի դեմ խաղում թիմի կողքին լինելու համար, սակայն նա հրաժարվել է: Ինչպե՞ս կմեկնաբանեք:

- Երբեմն նյութեր են լինում, նայում ասում ես՝ ֆանտաստիկ ժանրից են: Լավ գիտակցում ենք, հաշվի ենք առել ամեն ինչ: Նրան ընդհանրապես հրավեր չենք ուղարկել: Մարդը վնասվածք ունի, բնական է, որ պետք է ապաքինվի:

-(խմբ. ՀՖՖ մամուլի քարտուղար) Մխիթարյանին մինչեւ Խաշմանյանի նշանակումը ուղարկվել է հրավեր՝ ի թիվս մյուս ֆուտբոլիստների, ուղղակի հրավեր, որպեսզի պաշտոնապես տեղեկանանք վնասվածք ունի՞ տվյալ ֆուտբոլիստը, թե՞ ոչ: «Ռոմա»-ից եկել է պաշտոնական նամակ, որ Մխիթարյանը վնասվածք ունի: Դրանից հետո որեւէ հրավեր նրան չի եղել: Նա բնակվում է Հռոմում: Եթե ֆիզիկական վիճակը կբավականացնի, ցանկություն կունենա, կգա, կմիանա, կտեսնի հավաքականին:

- Արդյո՞ք ֆեդերացիայի ղեկավարությունից ստացել եք բավարար երաշխիքներ, որ, անկախ այս 2 խաղերի արդյունքից, կպատրաստեք թիմին Ազգերի լիգայում:

- Պայմանագիրս 1+1 ձեւաչափով է: Դա նշանակում է, որ 100 տոկոսով կան երաշխիքներ եւ վստահություն, որ մենք պետք է շարունակենք մեր գործընթացը: Այն չէր էլ կարող կախված լինել այս 2 խաղերից:

- Ի՞նչը համոզեց, դրդեց, որ ստանձնեք գլխավոր մարզչի պաշտոնը:

- Ստացել եմ կոնկրետ հրավեր, բանակցություններ են գնացել, եւ սա մեր ազգային հավաքականն է: Դրդելու պատճառ չեմ կարող ասել, բանակցություններից հետո սիրով համաձայնել եմ գլխավորել:

- Շատ է խոսվում, որ հավաքականի կազմը պետք է երիտասարդացնել: Ի՞նչ կարծիք ունեք այս հարցի վերաբերյալ:

- Բոլորին հուզում է այդ հարցը, ամենաշատը՝ մեզ: Խոսակցությունները շատ են, բայց չպետք է երազանքներով առաջնորդվենք: Պետք է ռեալ նայենք ու խոսենք ռեալ: Իսկ ի՞նչ կարող ենք անել սերնդափոխության համար, ի՞նչ սերունդ ունենք: Այո՛, ժամանակն է սերնդափոխության, բայց նայեք՝ այսօր 7 ֆուտբոլիստ բացակայում է: Այդ 7 ֆուտբոլիստները տարիներ շարունակ ազգին տվել են ամեն ինչ: Նրանք բարձրակարգ խաղացողներ են՝ Հենոյի գլխավորությամբ։ Պետք է հաշվի առնենք, որ նրանք 30 տարեկան են։ Սերնդափոխությունն անհրաժեշտ է, բայց ի՞նչ ունենք, ինչո՞վ սերնդափոխություն անենք, ուղղակի խոսքերո՞վ: Ունենք 1 էրիկ Վարդանյան, բայց նա դեռ պետք կայանա՝ որպես հավաքականի ֆուտբոլիստ: Հավաքականը չի կարող լինել փորձադաշտ, սա ամենաբարձր կետն է: 4-րդ լիգայում մի տեղ՝ աշխարհի մի մասում, հայի ազգանունով մեկին գտնում են, ասում են՝ հրավիրեք: Չի կարելի այդ մտածելակերպով առաջնորդվել: Պետք է ունենալ սերնդափոխություն, բայց ոչ փորձարկումներ: Դրա համար պետք է ունենանք ռեսուրսներ, որն այսօր չունենք: Տարիներ շարունակ խոսվել է այդ մասին, որ մենք պատրաստում ենք ֆուտբոլիստներ ազգային հավաքականի համար: Հիմա հարց է ծագում՝ ուր են այդ ֆուտբոլիստները:

- Երկար դադարից հետո հրավիրվել է դարպասապահ Գեւորգ Կասպարովը: Ի՞նչ մարզավիճակում են դարպասապահները, եւ, եթե գաղտնիք չէ, ո՞ւմ եք վաղը վստահելու դարպասը:

- Դա գաղտնիք է (խմբ. ժպտում ): Բոլոր իմ որոշումները բխում են ու բխելու են ֆուտբոլային դաշտից: Կա նաեւ մարդկային գործոն որոշումների մեջ: Կասպարովին պատահական չեմ հրավիրել: Նման խաղացողներին, որ ամբողջ կյանքում խաղացել են լավ մակարդակով ազգային հավաքականում, հոգի են տվել…. նա իմ մոտ խաղացել է, շատ լավ ճանաչում եմ նրան: Նման խաղացողներին պետք  է կարողանանք հարգանքի տուրք տալ: Բայց, առաջին հերթին, իմ բոլոր որոշումները բխելու են ֆուտբոլային խաղադաշտից:

- Ո՞ր սկզբունքով եք Էրիկ Վարդանյանին հրավիրել՝ մարդկայի՞ն, թե՞ խաղադաշտի գործոնով պայմանավորված: Նրա ոչ մարզական պահվածքը վերջերս մեծ արձագանք էր ստացել:

- Առաջինը ֆուտբոլայինն է: Համարում եմ, որ այսօր եթե ունենք մի խաղացող, որը վաղը կարող է ամրապնդվել ազգային հավաքականում, Էրիկ Վարդանյանն է: Հասկանում եմ մեդալի հակառակ կողմը: Կյանքում բոլորն էլ սխալվում են: Չեմ կարծում, որ պետք է շատ խիստ դատել:

- Տեւական ժամանակ անց հրավիրվել է նաեւ Արթուր Սարկիսովը: Ի՞նչ կասեք նրա մարզավիճակի մասին:

- Նշեցի, որ մենք այսօր ոչ երանելի վիճակում ենք՝ հաշվի առնելով՝ ինչքան կորուստներ ունենք: Աշխատել ենք մոբիլիզացնել բոլորին: Կարծում եմ՝ միգուցե 1-2-ին բաց ենք թողել, բայց դրա մեջ չեմ տեսնում մեծ խնդիր: Ինձ համար դժվար է 3 օրվա մեջ ասել՝ ինչ մարզավիճակում է, բայց կարող եմ վստահ ասել, որ ցանկությունը շատ մեծ է ու ապացուցելու բան էլ ունի:

- Հավաքականի նախորդ մարզչական շտաբում նաեւ աշխատում էր իսպանացի մասնագետ, ֆիզպատրաստության մարզիչ Խավյեր Մինյանոն: Նա հիմա Ձեր շտաբում չէ: Տպավորություն կար, որ նրա աշխատանքը լավ է անդրադառնում թիմի վրա: Չե՞ք զգացել նրան մարզչական շտաբում ընդգրկելու կարիք:

- Շատ բարձրակարգ մասնագետ է, բայց, իմ տեղեկություններով, նրա պայմանագիրը վերջացել է ու միացել է, եթե չեմ սխալվում, «Վալենսիա»-ին: Շատ ուրախ կլինեի, որ նման մասնագետ լիներ մեր մարզչական շտաբում: