Ափսոսում եմ, որ Արտակ Զաքարյանի համար անակնկալ է եղել հակառակորդի հարձակումը․ Անդրանիկ Քոչարյան

Ապրիլյան պատերազմի հանգամանքներն ուսումնասիրող խորհրդարանական քննիչ հանձնաժողովի այսօրվա նիստին հրավիրված էր շատ կարեւոր զինվորական, որը ե՛ւ այն ժամանակ է եղել կարեւոր պաշտոնում, ե՛ւ հիմա մեր Զինված ուժերում։ Այս մասին այսօր՝ լրագրողների հետ զրույցում, ասաց հանձնաժողովի նախագահ Անդրանիկ Քոչարյանը՝ չնշելով, սակայն, հրավիրյալի հստակ պաշտոնն ու անունը։

Ավելի վաղ «Հայկական ժամանակ»-ը գրել էր, որ քննիչ հանձնաժողովի հյուրը ՊԲ ռազմական հետախուզության նախկին պետն է։

Անդրանիկ Քոչարյանը հայտնեց միայն, որ հյուրն առնչություն ունեցել է ՊԲ-ի հետ․

«Նա մեր ամենաարժեքավոր զինվորականներից է՝ ե՛ւ փորձառության, ե՛ւ գիտելիքների առումով։ Եվ ես շատ ուրախ եմ, որ մեր Զինված ուժերում նման մարդիկ կան»,- շեշտեց պատգամավորը։

Այսօրվա քննարկումը, ինչպես հայտնեց Քոչարյանը, հնարավորություն տվեց ավելի լավ պատկերացնելու այն ժամանակվա մեր կարեւոր ծառայություններից մեկի թիրախային ուսումնասիրության հատվածը․

«Քննարկել ենք այն ժամանակվա իր ոլորտին վերաբերող խնդիրներ, ստացել ենք պատասխաններ եւ այդ պատասխանները նաեւ ավելացրել են մեր տեղեկատվությունը այս ամիսներին կատարած աշխատանքի շրջանակներում, որպեսզի ավելի լավ պատկերացնենք մեզ հետաքրքրող եւ ուսումնասիրվող ու ուսումնասիրվելիք հարցերի բնույթը»։

Լրագրողի հարցին՝ տեղեկություն կար, որ հետախուզությունն իմացել է հակառակորդի հնարավոր հարձակման մասին, բայց գերագույն-գլխավոր հրամանատարությունն այդ տեղեկությանը ուշադրություն չի դարձրել, այս կասկածները հրավիրյալը հաստատե՞ց, Անդրանիկ Քոչարյանը պատասխանեց․

«Ցանկացած դեպքում ամեն ծառայություն պետք է իրականացնի ֆունկցիոնալ իր պարտականությունները, որի արդյունքում որոշում կայացնողները պետք է ճի՛շտ որոշումներ կայացնեն: Հետեւաբար, հետախուզությունը եւ բանակի մյուս կառույցները շատ կարեւոր են եւ կարեւոր է, որ նրանք գործեն սինխրոնիզացված: Բանակի կառույցները հիմնականում գործել են սինխրոնիզացված։ Այլ հարց է՝ արդյոք որոշումները ժամանակային առումով համահո՞ւնչ են եղել, թե՞ ոչ։ Նաեւ դա պարզելու համար էլ ստեղծված է այս հանձնաժողովը»,- ասաց Քոչարյանը՝ հավելելով, որ բանակի այսօրվա ղեկավարության կառավարման տրամաբանության մեջ կա փոփոխություն, քաղաքական պատվերը բանակն ուժեղացնելու, սպայակազմի հմտությունները նպատակային բարձր շեշտադրումներով օգտագործելուն է միտված։

Ինչ վերաբերում է հանգամանքին, որ հետախուզության տվյալների առումով հակասություն կա, քանի որ Նիկոլ Փաշինյանը ժամանակին հայտարարել է, որ տեսել է հարձակման վերաբերյալ տվյալներ, իսկ ՊՆ նախկին տեղակալը (Արտակ Զաքարյանը) հայտարարել է, որ հարձակումն անակնկալ է եղել, Անդրանիկ Քոչարյանն արձագանքեց․

«Ես ափսոսում եմ, որ Արտակ Զաքարյանի համար անակնկալ է եղել, եթե անակնկալ չլիներ, հաստատ մենք լրիվ այլ վիճակում կլինեինք։ Ընդհանրապես պաշտպանության գերատեսչության ղեկավարները պետք է երբեք անակնկալի չգան, նրանք պետք է միշտ պատրաստ լինեն եւ իրենց պատրաստ լինելը նշանակում է բանակի ստորաբաժանումները պահել պատրաստ վիճակում, իսկ կառավարման մեջ սինխրոնիզացիան բերում է լիարժեք հաջողության»։

Հանձնաժողովի նախագահի համոզմամբ՝ այսօր մենք ավելի պատրաստված ենք եւ դժվար թե բանակի այսօրվա ղեկավարությունը որեւէ բանից անակնկալի գա․

«Այսօր դուք հաստատ չեք լսի որեւէ մի ղեկավարի, որն ասի՝ մեզ համար Ադրբեջանի էսինչ մտահղացումը կարող է անակնկալ լինել: Մենք պետք է ուշադիր լինենք՝ հակառակորդն ինչ սպառազինություն է ձեռք բերում եւ բանակն ինչպես է իր կարողություններն ավելացնում այդ սպառազինությունը գործողությունների մեջ չեզոքացնելու առումով։ Տարբերությունն այսօրվա եւ 2016 թվականի իրողությունների հենց դրա մեջ է»։

Լրագրողները Քոչարյանին հիշեցրին, որ նախկին վարչապետ Կարեն Կարապետյանն ԱԺ ամբիոնից հայտարարեց, որ պատերազմի օրերին որոշակի տեխնիկայի մեջ վառելիք չի եղել։ Պատգամավորն ասաց, որ այս ամիսների աշխատանքի ընթացքում իրենք փորձել են նաեւ այդ հարցերին պատասխաններ գտնել, սակայն, այս պահի դրությամբ, չեն լսել որեւէ դեպք, որ սպառազինությունը պակաս է եղել կամ բժշկական սպասարկումը թերի է եղել եւ այլն։

Դիտարկմանը, որ պնդումներ կան, թե զենքը վերջացել է եւ սկսել են բահով կռվել զինվորները, Քոչարյանն արձագանքեց, որ եթե այդպիսի բան է եղել եւ հակառակորդը հասել է դիրք, ուրեմն՝ քարն էլ, բահն էլ, բռունցքն էլ պետք է օգտագործել․

«Որեւէ մեկը ֆիքսե՞լ է զենք չլինելու փաստ, զենքը կա, զինամթերքը պրծել է, մի բանով պիտի շարունակե՞ն կռվել»,- հնչեցրեց նա՝ եւս մեկ անգամ շեշտելով, որ նման տեղեկություն իրենք դեռեւս չեն ստացել։

Հարցին՝ Կարեն Կարապետյանին լսելու անհրաժեշտություն չկա՞, պատգամավորը պատասխանեց, որ մինչեւ Կարապետյանը, դեռ էլի շատ կարեւոր մարդիկ կան, որոնք պետք է հրավիրվեն հանձնաժողով։

Ինչ վերաբերում է հարցին, որ զոհված զինվորներից մեկի հայրն ասել է՝ տղային դիահերձելուց հետո պարզվել է, որ խոտ են կերել, նշանակում է՝ սնունդ չի հասել առաջնագիծ, Քոչարյանը կտրականապես ասաց, որ ինքը նման բանի չի հավատում․

«Մեր աշխատանքի ողջ ընթացքում մենք նման տեղեկության չենք հանդիպել, չնայած արդեն լսել ենք բազմաթիվ զինծառայողների, այդ թվում՝ նրանց, որոնք ակտիվ մարտական գործողությունների են մասնակցել։ Նման դեպք դեռեւս չի արձանագրել»։