ՀՖՖ նախագահի պաշտոնի համար տեղի են ունենում անդրկուլիսյան պայքարներ. Խորեն Քալաշյան

Հայաստանի ֆուտբոլի ֆեդերացիայի նախագահի պաշտոնի համար ընթացող պայքարը չի գոհացնում «Լեգալ սպորտ» ֆուտբոլային գործակալությանը: Այսօր՝ նոյեմբերի 28-ին, լրագրողներին հանդիպեցին կազմակերպության ներկայացուցիչները, այդ թվում՝ համահիմնադիր, գործադիր տնօրեն, ՀՀ հավաքականի նախկին անդամ Կարեն Դոխոյանը (լուսանկարում՝ աջից առաջինը), համահիմնադիր, ֆուտբոլային գործակալ Խորեն Քալաշյանը (լուսանկարում՝ ձախից առաջինը): Վերջինս շեշտեց, որ անդրկուլիսյան պայքար է ընթանում, հանդիպումներ են տեղի ունենում ՀՖՖ ժողովի անդամների միջեւ:

«Ցավոք, այս օրերին տեղի են ունենում անդրկուլիսյան պայքարներ: Մենք ունենք 1 թեկնածու: Մեր թիմի համար գերնպատակ չէ ներգրավված լինել նախագահի ընտրություններում, սակայն, եթե մոտակա օրերին հրապարակայնորեն ի հայտ չգան արժանի թեկնածուներ՝ համապատասխան ծրագրերով, ապա լեգալ սպորտը կառաջադրի իր թեկնածուին»,- ասաց նա՝ դեռեւս չցանկանալով հայտնել իրենց թեկնածուի անունը:

«Լեգալ սպորտի» ներկայացուցիչները նաեւ հայտնեցին այն չափանիշները, որոնք ապագա նախագահը պետք է ունենա: Ինչպես ներկայացրեց Քլաշյանը, նա պետք է լինի ապաքաղաքական, ֆուտբոլային գիտելիքներով, փորձով, հայկական ֆուտբոլի խնդիրներին եւ մարտահրավերներին ուղնուծուծով ծանոթ մարդ: Նոր նախագահը, ըստ նրանց, պետք է նաեւ հստակ ներկայացնի հայկական ֆուտբոլի զարգացման իր տեսլականը, կարողանա տալ մի շարք հարցերի պատասխաններ:

«Առաջադրվող ցանկացած թեկնածու պետք է, որպես հիմնական աշխատանք, ունենա բացառապես ՀՖՖ նախագահի պաշտոնը, թեեւ ՀՖՖ կանոնադրությունը դա չի պարտադրում: Պետք է ունենա տեսլական հայկական ֆուտբոլի հետագա զարգացմանը վերաբերող կարեւորագույն հարցերի շուրջ: Առանձնացրել ենք մի քանիսը. գործկոմի ընտրության ժամանակ առաջնային չափանիշները, տեխնիկական տնօրենի եւ իր թիմի, ինչպես նաեւ մոդելի, մանկապատանեկան ծրագրերի վերաբերյալ դիրքորոշումը, դրվելո՞ւ է արդյոք ազգային հավաքականի առջեւ հաջորդ որակավորման փուլ դուրս գալը, դիրքորոշումը անկախ պրոֆեսիոնալ լիգա ստեղծելու մասին, մարքեթինգային ռազմավարական պլանի վերաբերյալ տեսլական եւ արդյոք հայկական ֆուտբոլն ունի՞ վիրահատական միջամտության կարիք, եւ եթե՝ այո՛, ի՞նչ կտրուկ քայլեր են պետք»,- նշեց Քալաշյանը:

Ըստ «Լեգալ սպորտի»՝ խիստ պետք է լինեն նաեւ գործկոմի անդամներ ընտրելու չափանիշները: Նրանք պետք է լինեն սպորտային եւ հատկապես ֆուտբոլային ներկայացուցիչներ: Ֆուտբոլային գործակալությունը նաեւ այս մասով է կետեր առանձնացրել:

«Ներկայացուցիչներ պետք է լինեն Բարձրագույն եւ Առաջին խմբի առաջնություններից, ֆան-ակումբներից, Ֆիզիկական կուլտուրայի եւ սպորտի ինստիտուտից, ԿԳՄՍ նախարարությունից՝ սպորտի գծով տեղակալ, ֆուտբոլային վետերանների միությունից, ֆուտբոլիստների միությունից եւ որոշ կոմիտեների նախագահներ»,- «Լեգալ սպորտի» ընդհանուր տեսակետը ներկայացրեց Քալաշյանը:

Վերջին շրջանում ֆուտբոլային շրջանակներում ՀՖՖ նախագահի թեկնածուների վերաբերյալ խոսակցություններում հնչում են տարբեր անուններ: Լեգենդար ֆուտբոլիստ Խորեն Հովհաննիսյանն արդեն պաշտոնապես հայտարարել է իր թեկնածության մասին: Տարբեր քննարկումներում արծարծվում են ՀՖՖ ներկայիս գլխավոր քարտուղար, առաջին փոխնախագահ Արմեն Մելիքբեկյանի ու փոխնախագահ Արմեն Նիկողոսյանի անունները: Վերջին 2-ը, Քալաշյանի խոսքով, 1.5 տարվա ընթացքում այնպես չեն աշխատել, որ հավակնեն պաշտոնին, իսկ Հովհաննիսյանի մասով ասում է հետեւյալը.

«Խորեն Հովհաննիսյանը մեր լեգենդար ֆուտբոլիստն է: Կասեմ իմ դիրքորոշումը, նրա մասով հումորային պատասխանեմ. կոլորտն ապահովված է»,- ժպիտով ասաց Քալաշյանը:

«Լեգալ սպորտի» ներկայացուցիչները նաեւ ցանկություն հայտնեցին, որ լինեն հանրային քննարկումներ, բանավեճեր լրատվամիջոցներով, որպեսզի թեկնածուները գնան ու ներկայացնեն իրենց ծրագրերը, ցուցադրեն իրենց գիտելիքներն ու փորձը: Թեկնածուների առաջադրման վերջնաժամկետը, նրանց խոսքով, դեկտեմբերի 3-ն է: ՀՖՖ նախագահի ու գործկոմի ընտրությունները, ինչպես ՀՖՖ-ն հայտնել է, կկայանան դեկտեմբերի 23-ին նշանակված արտահերթ ժողովի ժամանակ:

ՀՖՖ-ն առանց նախագահի է մնացել Արթուր Վանեցյանի հրաժարականից հետո: Նա իր որոշման մասին հայտնեց նոյեմբերի 21-ին տեղի ունեցած գործկոմի նիստից հետո: