Կան գյուղեր, որտեղ ավանդույթի ուժով կանանց արգելված է գնալ գյուղապետարան, հարսներին՝ ծնողական ժողով. Աննա Հակոբյան

Ընդամենը 1,5 տարվա գործունեություն ունեցող հիմնադրամը, որի ռեալ աշխատանքային ժամանակը 1 տարի է, ունեցել է այս ընթացքում ավելի քան 5 միլիոն դոլար բյուջե:

Այս մասին երեկ երեկոյան կայացած «Իմ քայլը» հիմնադրամի ամենամյա բարեգործական գալա ընթրիքի ժամանակ հայտարարել է հիմնադրամի հոգաբարձուների խորհրդի նախագահ, ՀՀ վարչապետի տիկին Աննա Հակոբյանը:

Իր ելույթի սկզբում նա ողջունել է ընթրիքի բոլոր հյուրերին, ներկաներին ու նաեւ նրանց, ովքեր չեն կարողացել ներկա գտնվել եւ շարունակել է.

«Ողջունում եմ այս դահլիճում ներկա բոլոր գործարարներին, ովքեր իրենց ամենօրյա աշխատանքով շենացնում են մեր երկիրը: Ձեր ներկայությունը ես համարում եմ որպես վստահության եւ գնահատանքի դրսեւորում:

Ես ուզում եմ նշել առաջին հայացքից այն ոչ տեսանելի գործը, որն արվում է հիմնադրամների արդյունքում: Ինչպես գիտեք, այս հիմնադրամը սկսեց գործել իմ ամուսնու՝ ՀՀ վարչապետ ընտրվելուց հետո: Ինչպես գիտեք, այդ ժամանակ գործող շատ հիմադրամներ փակվեցին, իրենց գործունեությունը դադարեցրեցին: Ես հիշեցնում եմ իմ այն հայտարարությունը, որ ես արել եմ՝ նշելով, որ այս հիմնադրամի գործունեությունն ամբողջությամբ հանձնելու եմ հաջորդ վարչապետի տիկնոջը եւ իմ խոսքերը վերահաստատւմ եմ:

Ուզում եմ նշել, որ ընդամենը 1,5 տարվա գործունեություն ունեցող հիմնադրամը, որի ռեալ աշխատանքային ժամանակը 1 տարի է, ունեցել է այս ընթացքում ավելի քան 5 միլիոն դոլար բյուջե:

Վստահ եմ, որ հանդիպել եք բազմաթիվ մութ գործարքների, խոսակցությունների, բայց ես այսօր կանգնած եմ այստեղ բաց ճակատով, որովհետեւ եթե որեւէ մեկի վրա մեր կողմից ճնշում լիներ, դուք կիմանայիք, եթե մութ գործարքներ լիներ, դուք կիամանայիք: Մեր գործունեությունն անցել է բաց եւ ամենօրյա գրաֆիկով:

Ո՞րն է հիմնադրամի՝ առաջին հայացքից ոչ տեսանելի կողմը: Մեր հասարակաության մեջ որպես ղեկավարի տիկին աշխատելն ու գործունեություն ծավալելը շատ դժվար է, չափազանց դժվար: Սա մեր հասարակությունն է, մեր կրթությունն է, մեր դաստիարակությունն է: Օրինակ Հայաստանի գյուղերից մեկում ավանդույթի ուժով գյուղի կանայք իրավունք չունեն գյուղապետարան մտնելու, երիտասարդ հարսներն իրավունք չունեն ծնողական ժողով գնալու, այլ սկեսուրներն են գնում:

Մեքենայից իջնում եմ գյուղապետարանի շենքի մոտ եւ տեսնում եմ՝ այնտեղ հավաքված միայն տղամարդկանց եւ չգիտեմ՝ բարեւեմ, թե՞ ուղղակի գլուխս կախ անցնեմ, որովհետեւ չգիտեմ բարեւելն է ճիշտ ընկալվելու, թ՞ե ուղղակի անցնելը: Ես իհարկե բարեւում եմ: Այս ընթացքում չի եղել մեկ ամիս, որ ես չմտածեմ, այսպես ասած, վարչապետի տիկնոջ գործունեություն վարելու մասին: Ես այդ գործունեությունը չեմ դադարեցրել միայն ամուսնուս պատճառով, որը բառիս բուն իմաստով թույլ չի տալիս ինձ հանձնվել:

Հետաքրքիր է, եթե մտածենք՝ պե՞տք է արդյոք մեր երկրին ՀՀ վարչապետի տիկնոջ գործունեությունը: Արդյո՞ք մենք՝ որպես հասարակություն, վարչապետի տիկնոջն ու առհասարակ կանանց դիտարկում ենք  որպես ուժ եւ ռեսուրս, որը կարող է եւ պետք է մասնակցի մեր պետության գործունեությանը:

Մենք անում ենք աշխատանք, որն այս պահին դեռեւս պետական միջոցներով հնարավոր չի լինում իրականացնել: Օրինակ, մեր ծրագրերից մեկով նախատեսում ենք վերանորոգել մարզերում գտնվող հանրակրթական դպրոցների՝ աղետալի վիճակում գտնվող սանհանգույցները: Պարզ է, որ պետական միջոցներով սա վաղ թե ուշ արվելու էր, բայց քա՞նի տարի էր պետք լինելու, եւ մենք ցանկանում ենք լրացուցիչ միջոցներ ներգրավելով անել ավելի շատ աշխատանք:

Սա միայն մեկ օրինակ է, մեկ այլ օրինակ է այն, որ այս 1,5 տարվա ընթացքում մեր հիմնադրամը հոգացել է մեր փայուն դասական երաժշտախմբերի ֆինանսավորումը, որպեսզի նրանք բնականոն կերպով կարողանան իրականացնել իրենց աշխատանքը: Օրինակները բազմաթիվ են եւ այստեղ ես կանգ կառնեմ, քանի որ կարծում եմ՝ հասկանալի է իմ ասելիքը:

Ինչպես արդեն նշեցի, իմ ամուսինը թույլ չի տալիս ինձ հանձնվել, նա խորհուրդ է տալիս ինձ լինել դուխով, եւ միաժամանակ խոնարհ՝ որպես կին: Այս երկու հակադրությունները պահպանելը, խոստովանում եմ,  չափազանց բարդ է»,-եզրափակել է Ա. Հակոբյանը: