ՍԴ-ի շուրջ ստեղծված լարվածությունը Հրայր Թովմասյանի քաղաքական հայտարարությունների արդյունքն է․ Ռուբինյան

«Իմ քայլը» խմբակցության պատգամավոր, ԵԽԽՎ-ում հայաստանյան պատվիրակության ղեկավար Ռուբեն Ռուբինյանը միանշանակ կիսում է ԵԽԽՎ համազեկուցողների անհանգստություններն առ այն, որ Հայաստանում երկու ինստիտուտների՝ Սահմանադրական դատարանի եւ վարչապետի աշխատակազմի միջեւ կա մեծ լարվածություն։ ԱԺ-ում ԵԽԽՎ ձմեռային նստաշրջանի աշխատանքների վերաբերյալ մամուլի ասուլիսի ընթացքում ասաց պատգամավորը․

«Կարծում եմ՝ սա նորմալ չէ, կարծում եմ նաեւ, որ սա արդյունքն է նրա, որ ՍԴ նախագահն արել է բազմակի քաղաքական հայտարարություններ, որոնք կրում են ընդդիմադիր բնույթ: Այսինքն՝ ՍԴ նախագահը, որը չպետք է զբաղվի քաղաքականությամբ, փաստացի անում է քաղաքական հայտարարություններ»,- ասաց Ռուբինյանը։

Նա կարեւորեց, որ համազեկուցողները ֆիքսել են՝ ՀՀ-ում շատ ցածր է դատական համակարգի հանդեպ վստահությունը, ֆիքսել են, որ մինչ օրս ԱԺ-ն եւ կառավարությունը իրավիճակը փորձել են հանգուցալուծել իրավական ընթացակարգերի պահպանմամբ։ Բացի այս՝ նշել են, որ ՍԴ անդամների՝ վաղ կենսաթոշակի անցնելու մեխանիզմն ստացել է Վենետիկի հանձնաժողովի դրական եզրակացությունը․

«Նրանք ընդգծել են, որ այս լարվածությունը չպիտի խաթարի ընթացքի մեջ գտնվող կամ պլանավորած բարեփոխումները։ Ես նույնպես կարծում եմ, որ այս լարվածությունը ոչ մի կերպ չի նպաստում բարեփոխումների ընթացքին, այս հարցը պետք է լուծվի, եւ վստահ եմ, որ շուտափույթ կլուծվի»։

Հիշեցնենք, որ Եվրոպայի խորհրդի խորհրդարանական վեհաժողովի մոնիթորինգային հանձնաժողովի Հայաստանի մասով համազեկուցողներ Անդրեյ Շիրցելն ու Կիմմո Կիլժունեն հանդես են եկել հայտարարությամբ Սահմանադրական դատարանի եւ վարչապետի ինստիտուտի միջեւ եղած իրավիճակի վերաբերյալ՝ նշելով, որ չափազանց մտահոգ ենք այն բարձր աստիճանի լարվածությամբ, որն առկա է Հայաստանի երկու պետական ինստիտուտների՝ ՀՀ վարչապետի գրասենյակի եւ Սահմանադրական դատարանի նախագահության միջեւ․

«Զսպումներն ու հակակշիռներն առանցքային են ցանկացած ժողովրդավարական համակարգում: Սա ենթադրում է, որ իշխանության բոլոր ճյուղերը պետք է գործեն իրավունքի գերակայության սկզբունքին համահունչ եւ հարգեն այն իրենց գործողություններում եւ խոսքերում, ներառյալ՝ անմեղության կանխավարկածի սկզբունքը։ Եթե նրանք ձախողեն այս սկզբունքներին համաձայն գործելը, թուլացնում եւ վնասում են միմյանց: Ուստի մենք անհանգստացած ենք աննախադեպ մակարդակի հասած լարվածության երկարաժամկետ վնասով, որը կարող է հասցվել դատական համակարգին, որի նկատմամբ վստահության մակարդակն արդեն իսկ շատ ցածր է»,- ասել են համազեկուցողները։

Անդրադառնալով Վենետիկի հանձնաժողովի նախագահ Ջ. Բուքիքիոյի հայտարարություններին՝ դարձյալ Սահմանադրական դատարանի եւ վարչապետի աշխատակազմի շուրջ ստեղծված իրավիճակի վերաբերյալ, Ռուբեն Ռուբինայնը հայտարարեց, որ այդ լարվածությունն առաջացել է Հրայր Թովմասյանի գործունեության արդյունքում․

«Այս իրավիճակին, իհարկե, պետք է լուծում գտնել։ Պարոն Բուքիքիոն հիշեցնում է Վենետիկի հանձնաժողվի կարծիքը, որ կենսաթոշակի մեխանիզմը իրապես կամավոր պետք է լինի, եւ դատավորները պետք է զերծ լինեն որեւէ տեսակի քաղաքական կամ անձնական ճնշումներից։ Ես կարեւորում եմ այս հայտարարությունը, որովհետեւ դրանից առաջ արդարադատության նախարար Ռուստամ Բադասյանը հայտարարել էր, որ տարբեր շրջանակներ տարատեսակ ճնշումների են դիմում, որպեսզի այն դատավորներին, որոնք կարող են օգտվել վաղ կենսաթոշակի իրավունքից, հետ պահեն այդ մտքից։ Եվ, փաստորեն, դրանից օրեր անց Բուքիքիոն ասում է, որ չպիտի լինեն ճնշումներ, որպեսզի նրանք կայացնեն այս կամ այն որոշումը»,- ասաց Ռուբեն Ռուբինյանը՝ հայտարարելով, որ կիսում է նաեւ նախարար Բադասյանի կարծիքը, որ տարբեր շրջանակներ փորձել են ճնշում գործադրել ՍԴ անդամների վրա, սակայն ինքն անձամբ կառավարող ուժի կողմից որեւէ ճնշման դեպք չի հիշում։