Պաշտպանել քաղաքացուն իր վրա ոտքերը սրբել պատրաստվող կենդանիների ոհմակից. Արման Բաբաջանյանն առաջարկում է շուրջը նայել

ԱԺ պատգամավոր Արման Բաբաջանյանի կարծիքով՝ գործող Ազգային ժողովի կարեւոր անելիքն այսօր Սահմանադրական դատարանի շուրջ ստեղծված ճգնաժամի հաղթահարումն ու դրանով իսկ արյունալի իրադարձությունների անթույլատրելի ու անհնար դարձնելն է:

Այսօր այդ մասին խոսելով ԱԺ ամբիոնից՝ Բաբաջանյանը հիշեց 2004-ի իրադարձությունները. «Հայ ժողովուրդը մեկ անգամ իր վստահությունը հայտնել է Սահմանադրական դատարանին. դա 2003 թվականի խայտառակ ընտրությունների արդյունքների վիճարկման ժամանակ էր, երբ Սահմանադրական դատարանը որոշեց վստահության հանրաքվե անցկացնել: Եվ այն, ինչ տեղի ունեցավ Բաղրամյան պողոտայում ուղիղ մեկ տարի անց, կհիշեն լրագրողներ Նաիրա Զոհրաբյանը, Վահագն Հովակիմյանը եւ դաժան ծեծի ենթարկված, այդ իրադարձությունները լուսաբանող Հայկ Գեւորգյանը: Թե ինչ տեղի ունեցավ այստեղ դարանակալած հատուկջոկատայինների դուրս բերմամբ մեր հազարավոր քաղաքացիների հետ, տասնյակ կուսակցությունների առաջնորդներ ինչպես ընդհատակում մնացին այդ իրադարձություններից հետո, Սահմանադրական դատարանի եւ ոչ մի անդամ, ոչ մի նախագահ չփորձեց պաշտպանել իր իսկ որոշման հետեւանքով մեկ տարի հետո Բաղրամյան պողոտայում հայտնված քաղաքացուն»,- հայտարարեց պատգամավորը՝ հավելելով, որ «այդ դատարանի նկատմամբ տոտալ անվստահությունն էր պատճառը, որ մարդիկ չսպասեցին դատարանի որոշմանը, եւ 2008 թվականին օրեր շարունակ մնալով փողոցում, պայքարելով՝ սպանվեցին»:

Բաբաջանյանի բնորոշմամբ՝ պետության գլխին հայտնված բանդիտական խմբավորումը թույլ չէր տվել գոնե մեկ վստահելի ինստիտուտի գոյություն, որը կարող էր մարդկանց համար փողոց դուրս գալու եւ չսպանվելու այլընտրանք լինել:

Ըստ նրա՝ սահմանադրական ճգնաժամը հնարավոր է լուծել միայն արմատական քայլերի միջոցով: «Ով, եթե ոչ Ազգային ժողովը, պետք է գնահատի պետության բռնազավթման հասցրած ռազմական, տնտեսական վնասները եւ ազգային անվտանգությանը հասցրած անդառնալի վնասը: Դուք դեռ մտածում եք՝ այդպիսի գնահատական տա՞լ, թե՞ ոչ, իսկ այդպիսի գնահատականը առնվազն կբացառեր Հայաստանում նմանօրինակ բռնազավթման կրկնությունը, բայց որ ավելի կարեւորն է, նման գնահատականը կարգելեր, որ նախկին հանցագործները այսօր հագնեին ընդդիմության դիմակը եւ եվրոպաներում քաղհալածյալ ներկայանային»,- ասաց Արման Բաբաջանյանը:

Այնուհետեւ դիմելով ԵԽԽՎ-ում Հայաստանի պատվիրակության ղեկավար Ռուբեն Ռուբինյանին՝ Բաբաջանյանը հիշեցրեց նրա մի հայտարարություն այն մասին, թե արդարացված են 2015 թ. ընդունված Սահմանադրության ոգու պահպանման նպատակով Ազգային ժողովի մինչ օրս գործադրված ջանքերը:

«Ուզում եմ ձեզ տեղեկացնել, որ 2015 թվականին, այսպես կոչված, ընդունված Սահմանադրության ոգին, Սերժ Սարգսյանի գլխավորությամբ, քրեական հանցագործների, օլիգարխների, թալանչիների, պետության եւ պետական մեքենան կեղեքողների, ավազակապետության եւ գողապետության կամ ավելի կարճ ձեւակերպեմ սերժիզմի հավերժացումն էր: Այդ Սահմանադրությունը չի ընդունվել, այն բոլորիս աչքի առաջ հարյուրհազարավոր կեղծիքներով փաթաթվել է մեր ժողովրդի ու պետության վզին: Այդքան միամիտ մի եղեք եւ մի փորձեք պաշտպանել այդ Սահմանադրության ոգին»,- նկատեց անկախ պատգամավորը:

Շարունակելով իր ելույթը ԱԺ արտահերթ նիստում՝ Բաբաջանյանն ասաց, որ Սահմանադրության 2-րդ հոդվածը բոլոր պատգամավորներին պարտավորեցնում է պաշտպանել այդ նույն քաղաքացուն իր վրա ոտքերը սրբել պատրաստվող կենդանիների ոհմակից: Նա խորհուրդ տվեց նայել շուրջը, «զգալ Ազգային ժողովը շրջափակած կենդանակերպերի առերեւույթ փսլնքոտ շնչառությունը, որոնք զրկվել են Հայաստանի քաղաքացուն պերմանենտ հոշոտելու, կեղեքելու հաճույքից»:

«Կուզենք մենք, թե ոչ, մեզ բոլորիս այստեղ բերել է 2018-ի հեղափոխությունը: Կուզեք ընդունեք, կամ ոչ, բայց մեր գերակշիռ մասը այստեղ չէր լինի, եթե չլինեին այդ իրադարձությունները եւ տեղի չունենային անցնցում եւ անարյուն: Այդ արյան բացակայությունը մեր ինքնիշխանության ցուցիչն է»,- ընդգծեց Բաբաջանյանը՝ հավելելով, որ առաջարկվող հանրաքվեով իրենք սոսկ Սահմանադրական դատարանի հարց չեն լուծում, այլ լուծում են բռնազավթված Սահմանադրությունը ժողովրդին վերադարձնելու հարցը: