Իսպանացի հայտնի մարզիչ Կապառոսը միջազգային չափանիշներով փոքր աշխատավարձ է ստանալու ՀՀ հավաքականում. Արմեն Նիկողոսյան

Իսպանական «Սեւիլիայի» նախկին գլխավոր մարզիչ Խոակին Կապառոսը, միջազգային չափանիշներով, այնքան էլ մեծ աշխատավարձ չի ստանալու Հայաստանի ֆուտբոլի ազգային հավաքականում աշխատելիս: Այս մասին «Հայկական ժամանակ»-ի հետ զրույցում ասաց Հայաստանի ֆուտբոլի ֆեդերացիայի փոխնախագահ Արմեն Նիկողոսյանը՝ չցանկանալով նշել, թե կոնկրետ որքան է հայտնի մասնագետն ստանալու: Նիկողոսյանն ընդգծեց, որ աշխատանքի իր մեթոդներով Կապառոսը, որը ՀՖՖ-ի հետ պայմանագիր է կնքել մինչեւ 2021թ. նոյեմբերի 30-ը, համապատասխանում է ֆուտբոլի զարգացման այն մոդելին, որը ՀՖՖ-ն ներդրել է: Նաեւ խոսեց բանակցությունների ընթացքից, Կապառոսի առջեւ դրված խնդիրներից, ինչպես նաեւ պատմեց, ինչն է նման հայտնի մասնագետին գրավել ՀՀ հավաքականում:

- Մենք մի քանի մասնագետների հետ ենք քննարկումներ արել: Քննարկումների մասին ամենասկզբից տեղյակ են եղել գործկոմի բոլոր անդամները, իմացել են՝ ում հետ եւ ինչ հարցեր ենք քննարկել: Տարբեր մարզիչներ ներկայացրել են իրենց մոտեցումները եւ պայմանները: Ամենաընդունելին մեզ համար եղել է Կապառոսի տարբերակը: Առաջիկա 2-3 օրերի ընթացքում նա կժամանի Երեւան, մնալու է Երեւանում: Գալիս է իր օգնականի հետ: Մենք հույս ունենք, որ այն խնդիրները, որոնք կան, Կապառոսը կիրականացնի: Թեկնածությանը կողմ է եղել նաեւ մեր տեխնիկական տնօրեն Խինես Մելենդեսը, մի քանի անգամ ՀՖՖ նախագահ Արմեն Մելիքբեկյանը հանդիպել է Կապառոսի հետ:

- Նա այստե՞ղ է ապրելու, թե՞ գնալ-գալու է:

- Նա Երեւանում է ապրելու պայմանագրի ողջ ընթացքում:

- Մելենդեսի գործոնը նպաստե՞լ է, որ նա պայմանագիր կնքի:

- Մելենդեսի գործոնը եղել է հետեւյալում. մենք ունենք մանկապատանեկան ֆուտբոլի ազգային ծրագիր, որն արդեն հաստատվել է, եւ մեր ակադեմիան ու մի քանի ակումբներ արդեն այդ ծրագրով են աշխատում: Հույս ունենք՝ շուտով բոլոր ակումբներն այդ ծրագրով կաշխատեն: Մենք հիմա բերում ենք մարզիչ, որն այդ ծրագրի մեջ տեղավորվում է: Այսինքն՝ այդ մանկապատանեկան ֆուտբոլի ծրագիրը, որն ունենք, եւ Կապառոսի ծրագրերը, աշխատանքի մեթոդներն ամբողջությամբ համապատասխանում են իրար: Իհարկե, կապ ունի, որովհետեւ մենք բերում ենք մարդ, որը մեր ծրագրերին համահունչ է:

- Նախկինում եղել է Ջիանի դե Բիազիի տարբերակը, ու խոսակցություններ կային, որ նա չի համաձայնել, քանի որ ՀՀ հավաքականը շատ թույլ է: Ինչպե՞ս է հաջողվել նրանից ավելի հայտնի մասնագետի ներգրավել:

- Դե Բիազին չի եղել, եղել է այլ մարզիչ: Դե Բիազին ամբողջությամբ պատրաստ էր աշխատելու, նույնիսկ հիմա էր պատրաստ, բայց նրա թեկնածությունը չենք քննարկել, քանի որ նրա ծրագրերը եւ այն ծրագիրը, որը մենք ունենք, իրար հետ չեն համընկնում: Նրանը իտալական ֆուտբոլի մոդել է, սա՝ իսպանական: Համարում ենք, որ Կապառոսն այս պարագայում լավագույն լուծումն է:

- Ո՞ր մարզիչն է եղել, որ համարել է, որ ՀՀ ընտրանին թույլ է ու չի եկել:

- Չեմ կարող ասել անունը:

- Եվ ինչպե՞ս է ստացվել այսպիսի հանրահայտ մասնագետի համոզել գլխավորել ՀՀ ընտրանին:

- Նա մեծ սիրով է համաձայնվել, իհարկե, շատ մեծ կապ ունեն նաեւ բանակցությունների ընթացքը եւ Մելենդեսի գործոնը:

- Երկրպագուները միշտ ցանկացել են հայտնի մասնագետի տեսնել, սակայն ամեն անգամ էլ, երբ հայտնի մասնագետ է ներգրավվել ՀՖՖ աշխատանքներում, քննարկել են նրա աշխատավարձը: Որքա՞ն է Կապառոսի աշխատավարձը:

- Նրա աշխատավարձի չափն իրավունք չունենք հրապարակելու, բայց մոտավորապես մի փոքր ավելին է, քան նախկինում եղել է մեր հայ մարզիչների աշխատավարձը: Այդքան մեծ չէ:

- Շատ մեծ աշխատավարձ չէ...

- Ո՛չ: Միջազգային չափանիշներով՝ փոքր աշխատավարձ է, ուղղակի այստեղ կան ամբիցիաներ, կա մեծ ցանկություն Հայաստանի հավաքականի հետ աշխատելու եւ հաջողությունների հասնելու:

- Եթե աշխատավարձը գրավիչ չէ, ի՞նչն է գրավել, որ գա:

-ՀՖՖ-ի ծրագրերը եւ նպատակը:

- Հավաքականի խաղացողները տեղյա՞կ են եղել նրա մասին եւ ի՞նչ կարծիք ունեն:

- Որոշ մարդիկ տեղյակ են եղել բանակցությունների ընթացքից:

- Ավա՞գը:

- Չեմ ասի անուններ:

- Ընթացքում շրջանառվում էին նաեւ այլ մարզիչների՝ Սանտիագո Սոլարիի, Օսկար Գարսիայի եւ Այտոր Կարանկայի անունները: Նրանց հետ բանակցություններ եղե՞լ են:

-Ձեր թվարկած անուններից որոշ մասի հետ եղել են, որոշ մասի հետ՝ ո՛չ:

-Կոնկրետ որո՞նց հետ:

-Չենք կարող նշել, որովհետեւ դա կլինի էթիկայի խախտում:

- Ի՞նչ խնդիր է Կապառոսի առջեւ դրվելու:

- Մենք պետք է ունենանք հավաքական, որը պետք է ունակ լինի նվաճելու աշխարհի կամ Եվրոպայի առաջնության ուղեգիր: Հույս ունենք, որ դա կլինի մինչեւ 2024թ.:

-Իսկ մոտակա ծրագի՞րը...

-Ազգերի լիգայում հաղթելը:

- Ըստ մարզչի՝ որքանո՞վ են այդ նպատակները հնարավոր:

- Բնականաբար, նա պատրաստ է այդ ծրագրին:

-Ե՞րբ է լինելու Կապառոսի մամուլի ասուլիսը:

-Ամենայն հավանականությամբ ուրբաթ օրն ասուլիս կանենք: