Հղիներին սոցիալական աջակցության ծրագիրն ընդլայնվել է. շահառուների ցանկերը թարմացվում են

Այս պահին կառավարությունը հաստատել է 11 ծրագիր, որոնցից 5-ը վերաբերում են տնտեսվարողներին, գործատուներին, որոնք այս ծրագրերի միջոցով պետք է աջակցեն իրենց բիզնես գործունեությանը, ինչպես նաեւ փոխհատուցեն աշխատակիցների աշխատավարձերը, իսկ 6-ը սոցիալական աջակցության ծրագրեր են:

Այսօր ասուլիսին աշխատանքի եւ սոցիալական հարցերի նախարար Զարուհի Բաթոյանը կրկին ներկայացրեց ծրագրերի գործարկման տիրույթները, դրանցից օգտվելու կարգը, նշեց, որ հղիների համար նախատեսված ծրագիրն ընդլայնվել է. դրանից կարող են օգտվել բոլոր հղիները, ում ամուսինները գործազուրկ են եղել մարտի 30-ի դրությամբ:

Նախարարը նշեց, որ, ըստ համարակալման, կառավարության ծրագրերից 4-րդը վերաբերում է մինչեւ 14 տարեկան երեխա ունեցող գրանցված աշխատանքից ազատվածներին, 6-րդը վերաբերում է մասնավոր հատվածում գրանցված աշխատանքից ազատվածներին, 7-րդը՝ չաշատող հղի կանանց, որոնց ամուսինը եւս չի աշխատում, 8-րդը՝ տուժած ոլորտների գրանցված աշխատողներին, 9-րդ ծրագիրը վերաբերում է երեխաներին, որոնց ծնողները չեն աշխատում: 11-րդ ծրագիրը վերաբերում է բնական գազի եւ էլեկտրաէներգիայի փոխհատուցմանը. այն բաժանորդները, որոնց 2020 թ. փետրվար ամսվա համար ծախսված գազի վարձը չի գերազանցում գազի պարագայում 10 հազար եւ էլեկտրաէներգիայի սպառման պարագայում 5 հազար դրամը: Այս միջոցառումից 222 հազար բաժանորդ կօգտվի, նշանակում է, որ վերաբերում է 6 հազար շահառուի:

4-րդ ծրագիրն ընթացքի մեջ է, եւ դրա համար դիմելու անհրաժեշտություն չկա: Պարզապես պետք է քաղաքացիները մուտք գործեն online.ssa.am կայք, մուտքագրեն տվյալները եւ տեսնեն՝ ծրագրի շահառու են, թե ոչ: Եթե շահառու են, ապա ուղղակի պետք է անձը հաստատող փաստաթղթով գնան բանկ: Այս ծրագրի շահառուների ցանկը թարմացվում է:

6-րդ ծրագրի փոխանցումներն իրականացված են, շահառուները 6723-ն են:

7-րդ ծրագրի շրջանակն ընդլայնվել է. այս ծրագրում ներառվել են ոչ միայն այն կանայք, որ չեն աշխատում, եւ իրենց ամուսինն էլ ազատված է աշխատանքից մարտի 13-ից մինչեւ մարտի 31-ն ընկած ժամանակահատվածում, այլեւ այն հղի կանայք, ում ամուսինները չեն աշխատել մարտի 30-ի դրությամբ: Այս ծրագրի շահառու է 5957 քաղաքացի, ցանկը թարմացվում է:

8-րդ ծրագրով ստացվել է ավելի քան 45 հազար դիմում, հաստատվել՝ 27 հազարը. 1.8 մլրդ աջակցությունն արդեն հասանելի է բանկերի եւ անձնական հաշիվների միջոցով: Այս ծրագիրը իրականացվում է դիմումների միջոցով:

9-րդ ծրագրի շահառուների ցանկը դեռ կազմվում է, քանի որ իրականացվում է դիմումների հիման վրա: Համակարգն առայժմ դադարեցված է, քանի որ բավական մեծ էր դիմումների հոսքը, եւ սխալ թույլ չտալու համար դադարեցվել է մի քանի ժամով, ավելի ուշ կրկին կգործարկվի: 8-րդ եւ 9-րդ ծրագրերի շահառուների ցանկը հրապարակվելու է:

Զարուհի Բաթոյանը նշեց, որ սննդի փաթեթների եւ տեխնիկական մաքրող միջոցների կարիքների բավարարման համար աշխատում են մարզպետարանները հասարակական կազմակերպությունների եւ կամավորական խմբերի հետ: «Նախարարությունն աշխատում է թիրախային խմբերը գտնելու եւ հասցեական օգնությունը հասցնելու ուղղությամբ, ավելի շատ համակարգում եւ տեղեկատվություն ենք փոխանակում: Այս աջակցության համար պիտի հորդորեմ, որ դիմեն քաղաքապետարաններ, մարզպետարաններ: Այս գործընթացն իրականացվում է շատ կազմակերպված ձեւով»,- ասաց նա: 

Նա հիշեցրեց, որ բոլոր հարցերի համար քաղաքաքացիները կարող են դիմել թեժ գծերին՝ շուրջօրյա 114 հեռախոսահամարին, ստացվել է ավելի քան 45 հազար զանգ, որով կարելի է ծանոթանալ հայտարարված ծրագրերի մանրամասներին, եւ միայն աշխատանքային ժամերին գործող 011 300 104 հեռախոսահամարին: